Read Quechua Bolivia DC Bible 1 CRÓNICAS 16 Bible Online

1 CRÓNICAS 16 - Quechua Bolivia DC Bible bible

1 CRÓNICAS 16

¹Diospa cajonnenqa apasqa karqa. Churaykorqankutaj uj carpa wasiman, David chaypaj ruwacherqa chayman. Chay ratopacha uywasta ñak'aspa q'olacherqanku Diospa ñaupaqempi allinyakunapaj nisqa rikuchikutapis.

²Davidtaj chay imasta Diosman jaywaytawankamaqa, tukuynin Israel aylluta Señorpa sutimpi bendicerqa.

³Tukuynin israelitasman, qharisman, warmismanwan qorqa uj t'antakama, palma poqoymanta ruwasqa t'antata, uvas k'isamanta ruwasqa t'antatapis.

⁴Davidqa levitasmanta ajllarqa yanapajkunata, Diospa cajonnimpa ñaupaqempi mink'asqas karqanku imastapis ruwanankupaj, graciasta qonankupaj, yupaychanankupajtaj Israelpa Señor Diosninta.

⁵Kamachejninkoqa Asaf karqa, paypa qhepantataj Zacarías karqa, chaymanta Jeiel, Semiramot, Jehiel, Matataías, Eliab, Benaía, Obed-edom, Jeiel ima. Paykunaqa tocanasnintin ima karqanku, salteriosniyoj, arpasniyoj ima. Asafqa platillosta tocarqa.

⁶Sacerdotesmantataj Benaiaswan, Jahazielwan, trompetasta tocaspalla karqanku Dioswan trato ruwasqa cajompa ñaupaqempi.

⁷Chay kikin diallataj Davidqa kamacherqa Asaftawan, chay hermanosnintawan Señorman oqharinankuta uj takiyta, graciasta Diosman qospa, ñaupaj kaj takiyta kay jinata:

⁸Señorman graciasta qoychej! Sutinta qhapariychej! Tukuy ayllusman willaraychej ruwasqasninmanta.

⁹Paypa sutimpi takiychej takiykunata. Jatuchaj ruwasqasninmanta parlaychej!

¹⁰Llimphu sutinmantaqa parlaychej. Sonqosninkupi kusikuchunku, Señorta mask'ajkunaqa!

¹¹Señorman qayllaykuychej, atiyninman qayllaykuychej; tukuy tiempopi Señorman qayllaykuychej.

¹²Jatuchaj ruwasqasninmanta yuyarikuychej, chay t'ukuna ruwasqasninmantapis. Chay kamachiykunasta qosqasninmantapis yuyarikuychej.

¹³Qankuna Israelpa ayllunmanta kamachin kajkuna, qankuna Jacobpa wawasnin, ajllasqas kankichej chaykuna.

¹⁴Payqa Señor Diosninchej; Pay kamachin tukuy kay pachata!

¹⁵Waranqa runa mitasñapis pasachunku, mana jayk'aj qonqaponqachu chay trato ruwasqamantaqa.

¹⁶Abrahamwan ruwarqa chay tratomantaqa, Isaacman jurarqa chaymantapis.

¹⁷Chay tratotaj Jacobman kamachiykunasta jina qorqa, Israelpaj wiñay trato kanampaj.

¹⁸Kay jinata nispa: Canaán jallp'ata qosqayki, maychus chayaqeyki jina tocasunki chayta.

¹⁹Paykunaqa pisilla karqankupis, ñan purejkuna jina pisilla.

²⁰Uj nacionmanta waj nacionman purejkuna jina, uj reinomanta waj reinoman rishajkuna jinataj.

²¹Dios jark'arqa paykunata maqanankumanta. Reykunastapis k'amerqa kay jinata:

²²Ajllasqa runasniyta ama llankhankichejchu, amataj profetasniytapis imanankichejchu, nispa.

²³Señorman takiychej, tukuy kay pachapi tiyakojkuna runas, sapa día salvacionninmanta willaraychej.

²⁴Parlaychej may jatun kayninmanta t'ukuna imasta, ruwasqasninmantawan tukuy aylluspa ñaupaqempi, jinataj nacionespa ñaupaqempipis.

²⁵Señorqa may jatunmin, sinch'i yupaychanapaj jinapuni. Tukuy dioskunamanta nisqaqa aswan manchachikuna.

²⁶Waj ayllumanta runaspa dioskunasninkoqa mana imachu kanku. Señorqa tukuy janaj pachakunata ruwarqa.

²⁷Ñaupaqempeqa jatun chay kashan. Atiywan kusiywan llimphu wasimpeqa kashan.

²⁸Señorman qoychej, llajtas ukhupi kaj ayllus, qoychej ari Señorman atiyta, kusiytapis.

²⁹Señorman qoychej sutinman tukuy jatunchayta qona kajta, ñaupaqenman jaywanaykichej kajwan chimpaykuychej. Señorpa ñaupaqempi qonqorikuychej k'acha llimphu wasimpi.

³⁰Tukuy kay pachapi kajkuna ñaupaqempi kharkatitichichunku. Paymin kay pachatapis mana kuyukojta sayacherqa.

³¹Janaj pachakunapis kay pachakunapis kusikuchunku. Tukuy nacionesman willakuchun Señorqa rey kasqanta.

³²Mar qocha, jinataj chaypa tukuy kajkunapis qhaparichunku. Campopis, tukuy chaypi kajkunawan ima kusikuchunku.

³³Orqospi sach'aspis kusiywan qhaparichunku. Señorpa ñaupaqempi payqa kay pachata kamachej jamushan.

³⁴Señorman graciasta qoychej, payqa may k'achamin, munakuynin wiñaypaj kasqanrayku.

³⁵Niychej: Salvawayku Diosniyku, qampis salvadorniykoqa kanki. Naciones ukhumanta tantaykuwayku, kacharichiwaykutaj, yupaychanaykupaj llimphu sutiykita, kusisqas qanta yupaychanaykupaj.

³⁶Bendicisqa kachun Israelpa Señor Diosnenqa wiñay wiñaynintimpaj! Tukuynin ayllutaj kuticherqa, ajina kachun, nispa. Señortataj yupaycharqanku.

³⁷Ajinata Davidqa Señorwan trato ruwasqa cajompa ñaupaqempi saqerqa Asafta hermanosnintawan, chaypi sapa p'unchay imaschus ruwanas kasqanman jina imastapis ruwanankupaj.

³⁸Saqellarqataj Obed-edonta chay sojta chunka pusajniyoj hermanosnintawan. Punku qhawajkunapajtaj: Jedutun wawan Obed-edonta, Hosata ima.

³⁹Sadoctawan wauqesnin sacerdotestawan saqerqa Gabaón yupaychana wasipi Señorwan parlana toldo wasej ñaupaqempi.

⁴⁰Chaypi Señorman chay ruphachina altarpi ñak'asqa uywasta rikuchikusta Señorpaj q'olachinallankupajpuni paqarinnimpi, jinataj tardempipis, Señorpa leynimpi imaynatachus nisqanman jina. Chayta Señorqa uj kamachita jina Israel aylluman saqerqa.

⁴¹Saqellarqataj paykunatawan khuskata Hemanta, Jedutunta, chay ajllasqas kajkunamanta puchojkunatawan ima, paykunaqa sutisninkumanta ajllasqas karqanku, mink'asqastaj takinankupaj: Señorman graciasta qoychej, imaraykuchus jatunmin munakuynenqa, nispa.

⁴²Paykunaqa pututusta, chanta platillosta ima tocaj kanku, waj takichinaspaj nisqa tocanastawan Diosman takiykunasta takichispa. Jedutumpa wawasnenqa punkuta qhawanamanta mink'asqas karqanku.

⁴³Chaymantataj, tukuyninku wasisninkuman kutiporqanku, Davidpis wasinman kutipullarqataj ayllunta bendicimunampaj.