Read Quechua Bolivia DC Bible 1 CRÓNICAS 20 Bible Online

1 CRÓNICAS 20 - Quechua Bolivia DC Bible bible

1 CRÓNICAS 20

¹Chay qhepan kaj watapi, reykuna maqanakuman llojsej kanku chay tiempopi, Joab wakichikuspa llojserqa soldadosninwan, amonitaspa jallp'ankutataj q'ararparerqa; ñaupajman astawan rispataj Rabá llajtata muyuykorqa. Chayman yaykuspataj raqaykunasllataña saqerparerqa. Chaykamataj Davidqa Jerusalempi qhepakorqa.

²Chaymantataj Davidqa reyninkoj umanmanta pilluta orqhorqa, chaytaj valorniyoj rumi t'ikanchasniyoj karqa, kinsa chunka kinsayoj kilostaj pesarqa. Chay pillutataj Davidman churaykorqanku. Chaymanta Davidqa chay llajtamanta waj ashkha valorniyoj imastapis orqhollarqataj.

³Chay llajtapi puchorqankuraj, chay runastataj orqhomuytawankama sierraswan llank'acherqa, fierro trillanaswan, hachaswan ima. Davidqa kikillantataj ruwarqa amonitaspa tukuy llajtasninkuwan. Chaymantataj tukuy soldadosninwan khuska Jerusalenman kutiporqa.

⁴Chaymantataj filisteoswan Gezerpi maqanaku karqa. Chay kutipeqa usatita Sibecaeqa chay jatuchaj runaspa mirayninmanta Sipaita wañurparicherqa, filisteostaj k'umuykachachisqas karqanku.

⁵Filisteoswan waj kutipi maqanakuypitaj Jairpa wawan Elhanan wañurparicherqa Lahimta. Payqa Gatmanta Goliatpa wauqen karqa. Kay runaj lanzampa pata puntanqa may jatumpuni karqa, awana telarpa k'aspin chhikampuni.

⁶Gatpitaj waj maqanaku kallarqataj. Chaypitaj uj jatun sayayniyoj runa kallarqataj. Payqa iskay chunka tawayoj dedosniyoj karqa, sapa makimpi sojtakama, sapa chakisnimpipis sojtakama. Paypis jatuchaj runaspa miraynillanmantataj karqa.

⁷Paytaj Israelta phiñacherqa, Davidpa wauqen Simeaj wawan Jonatantaj wañurparicherqa.

⁸Kay jatuchaj runasqa Gatmanta Refaj wawasnin karqanku. Paykunataj wañorqanku Davidpa makisnimpi, chay yanapajkunasnimpa makisnimpiwan.