Read Quechua Bolivia DC Bible 1 CRÓNICAS 21 Bible Online

1 CRÓNICAS 21 - Quechua Bolivia DC Bible bible

1 CRÓNICAS 21

¹Supayqa israelitaspa contrampi oqharikorqa, Davidpa sonqonman churarqataj israelitasta yupachinampaj.

²Chaypacha Davidqa Joabta Israel ayllu ukhupi kamachejkunatawan kamacherqa: Rispa Israelta yupamuychej Bersebamantapacha Dankama, chanta willawaychejtaj, mashkhachus tukuypi kasqankuta.

³Joabtaj kuticherqa: Señorqa ayllunman yapaykuchun uj pachaj jinastawan kunan kasqankumanta nisqaqa. Reyníy, manachu tukuyninku qampa kamachisniyki kanku? Imaraykutaj chayta ruwayta munankiri, reyníy? Imapajtaj Israelta juchallichisunmanri?

⁴Chaywampis, reyqa rinantapuni nerqa. Joabtaj chaymanta jatarikuspa tukuy Israelnejta purerqa. Chanta, Jerusalenman kutiporqa.

⁵Joabqa Davidman willarqa mashkhachus kasqankuta, israelitas yupachikusqankuman jina chayta. Tukuynin israelitaspitaj kasqanku uj millón pachaj waranqayoj runas maqanakupaj jina. Judá ayllupitaj kasqanku tawa pachaj qanchis chunkayoj waranqa runas.

⁶Manataj yuparqachu Levéj ayllunmanta kajkunata, nitaj Benjaminmanta kajkunatapis, reypa kamachisqan Joabman mana allinchu rijch'asqanrayku.

⁷Diosmantaj kay tukuyta ruwasqanqa mana walejchu rijch'arqa. Chayrayku Israelman uj jasut'ita apachimorqa.

⁸Chaypacha Davidqa juchasninta Diosman willakorqa: Kay tukuyta ruwaspaqa may jatun juchata ruwarqani. Mañakuyki kay kamachiykej juchasninta perdonanaykita, uj wampu jina ruwasqayrayku.

⁹Chaypacha Señorqa, pitachus David tapurej chay profeta Gadman nerqa:

¹⁰Rey Davidwan tinkumuy, niytaj kinsa laya imasta qoyta munasqaymanta ujninta chijllakunanta, mayqentachus noqa ruwayta munani chayta.

¹¹Gadtaj Davidman rispa nerqa: Kay jinata Señor nin: Qampaj chijllakuy kinsa watata yarqhay kananta, kinsa killata maqanakupi atipachikuspa enemigosniykej espadampa ñaupaqenta ayqeyta, chayri kinsa diasta wañuy onqoy tukuy jallp'aman yaykumunanta Señorpa espadannejta, Señorpa angelninwan Israel tukuy jallp'api wañurachisqas kanankumanta. Kunampacha niway imatachus munasqaykita chay kachamuwajman nimunaypaj.

¹³Gadman Davidqa kuticherqa: Sinch'i llakiypi kashani. Kunanqa aswan walej kanman Señorpa makisninman urmanayqa, paypa khuyakuynin may jatun kasqanrayku, manataj walejchu kanman waj runaspa makisninman urmanayqa.

¹⁴Chaypacha Señorqa uj wañuy onqoyta Israelman apachimorqa. Wañorqankutaj qanchis chunka waranqa israelitas.

¹⁵Diosqa uj angelta kacharqa Jerusalén llajtata tukuchimunampaj. Maypachachus llajtata tukuchisajtintaj, Señorqa chayta rikuspa mayta llakikorqa, chay llakiyta ruwashasqanmanta. Chay wañurachisharqa chay angeltataj kamacherqa: Chayllaña, amaña wañurachiychu, nispa. Chay ratopeqa Señorpa angelnin kasharqa, maypichus jebuseo Ornán trigota trillasharqa chaynejpi.

¹⁶Davidtaj qhawarispa rikorqa Señorpa angelninta, janaj pachawan kay pachawan chay patapi oqharisqata, makinwan Jerusalenman espadanta rikuchishajta. Davidtaj chay kurajkunaswan ima llakiypi churakuna p'achasninkuwan uyamanta pampaman k'umuykukorqanku.

¹⁷Chaypacha Davidqa Diosman nerqa: Noqamin kani aylluta yupachejqa. Noqamin kani juchallejqa, sajratataj ruwachejqa. Kay mana juchayojkunaqa imatataj ruwasqankuri? Señor Diosníy, mañarikuyki ari, chay jasut'iykeqa noqaman, chanta aylluymanwan jamunanta, saqeytaj kay aylluykita jasut'iytaqa.

¹⁸Chaypacha Señorpa angelnenqa kamacherqa Gadta, Davidman nimunanta, Señorpaj uj altarta jatarichipunanta, maypichus jebuseo Ornán trigota trillasharqa chaynejpi.

¹⁹Chaypacha Davidqa ruwamoj rerqa imatachus Señorpa sutimpi Gad nerqa chayta.

²⁰Ornantaj trigota trillasharqa. Kutirikuspataj chay angelta rikorqa. Paywan kasharqanku chay tawa qhari wawasnintaj angelta rikuspa pakakamorqanku.

²¹David qayllajtin Ornán kasharqa chayman, Ornanqa qhawarerqa Davidta. Trigota trillasharqa chaymanta llojsispataj, Davidpa ñaupaqempi pampakama k'umuykukorqa.

²²Chaypacha Davidqa Ornanman nerqa: Trigota trillasharqanki chay cheqata qoway, chaypi uj altarta oqharinaypaj Señorpaj. Mashkhachus valesqampi vendepuway, jinamanta chay wañuy onqoy Israelmanta ithirikunampaj.

²³Ornantaj kuticherqa: Jap'illay, reyníy, ruwaytaj imachus allin rijch'asusqanman jina. Noqa qosqayki torosta ñak'aspa q'olachinaykipaj, llant'apajtaj trigota saruchina k'ullusta qosqayki, trigotapis Señorman jaywanaykipaj qosqayki. Chay tukuyta qoyki, reyníy.

²⁴Rey Davidtaj Ornanman kuticherqa: Ni imarayku. Rantinaypuni tiyan mashkhachus valesqampi, mana atiymanchu qhechusuyta qampata kajtaqa Señorman qonaypajqa, chantapis mana rantisqaytaqa, Señorpaj mana q'olachipuyta atinichu.

²⁵Jinamanta Davidqa Ornanman pagarqa chay cheqamanta sojta pachaj qori qolqesta.

²⁶Chaypitaj Señorpaj uj altarta oqharerqa, uywasta ñak'aspa q'olachipunampaj, allinyakuy jaywanastawan qonampaj. Chaymantataj, Señorta wajyakorqa. Señortaj kuticherqa cielomantapacha runata apachimuspa, q'olachina altar pataman.

²⁷Chaypacha, Señorqa angelta kamacherqa, espadanta jallch'aykakapunanta.

²⁸Jebuseo Ornampa erampi Señor uyarisqanta rikuspa Davidqa chay ratopacha uywasta ñak'aspa Señorman jaywasqa.

²⁹Moisés ch'in pampapi Señorpaj uj toldo wasita oqhariporqa, q'olachinapaj altartawan. Chaykunaqa Gabaón loma patapi kasharqanku.

³⁰Davidtaj chayman Diosta tapurej riyta mana aterqachu Señorpa angelnin espadanta rikuspa mancharisqa kasqanrayku.