Read Quechua Bolivia DC Bible 1 CRÓNICAS 23 Bible Online

1 CRÓNICAS 23 - Quechua Bolivia DC Bible bible

1 CRÓNICAS 23

¹Davidqa ñapis machu runa ashkha watasniyojña kaspa, wawan Salomonta Israel aylloj kamachejnin kanampaj churarqa.

²Israelmanta tukuy kuraj kamachejkunata, sacerdotesta, levitastawan tantaykorqa.

³Chaypacha levitasta yuparqanku kinsa chunka watayojmanta pataman, yupasqankupitaj yachakorqa kinsa chunka pusajniyoj waranqa runas kasqankuta.

⁴Kaykunamanta iskay chunka tawayoj waranqa runas churasqas karqanku Diosta yupaychana wasita qhawaspa ruwachinankupaj. Sojta waranqataj kamachejkuna, juezkunapajtaj churasqas karqanku.

⁵Tawa waranqa runastaj punku qhawajkuna karqanku. Tawa waranqataj churasqas karqanku Señorta yupaychanankupaj tocanasninkuwan, David chaypaj nispa ruwacherqa chaykunawan.

⁶Davidqa t'aqaspi rak'irarqa Levéj qhari wawasnin Gersón, Coat, Merari ima, kaykunaman jina.

⁷Gersompa wawasnin karqanku: Laadán, Simei ima.

⁸Laadampa wawasnintaj kinsa karqanku: Jehiel, chay kuraj, chanta Zetam, Joel ima.

⁹Simeejpa wawasnintaj kinsa karqanku: Selomit, Haziel, Harán ima. Kaykuna karqanku wasi aylluspi kamachejkuna Laadampa miraynin kajkunamanta.

¹⁰Simeej wawasnintaj tawa karqanku: Jahat, Ziza, Jeús, Bería ima.

¹¹Kuraj kajqa Jahat karqa, Zizataj sullk'a kaj, Jeuswan, Beriawan, mana chhika wawasniyoj kasqankuraykutaj, paykunataqa uj aylluta jinalla yuparqanku Diosta yupaychana wasipi ruwanasta ruwanankupaj.

¹²Coatpa wawasnintaj tawa karqanku: Amrán, Izhar, Hebrón, Uziel ima.

¹³Amrampa wawasnintaj karqanku: Aaronwan, Moiseswan. Aaronqa t'aqasqa karqa aswan llimphu kaj qonasta Diosman jaywanampaj, jinataj inciensota q'osñichinampaj, Señorpa ñaupaqempi. Paypaj imastapis ruwapunampaj, bendicionta churanampajtaj. Chaykunaqa Aarompata, wawasnimpatawan wiñaypaj ruwanasninku karqa.

¹⁴Diospa runan Moisestataj, ayllunmanta kajkunatawan ima Leví ayllupi yuparqanku.

¹⁵Moisespa wawasnin karqanku: Gersonwan, Eliezerwan.

¹⁶Gersompa wawasninmantataj kuraj kajqa Sebuel karqa.

¹⁷Eliezerpa kuraj kaj wawantaj Rehabías karqa. Chaymanta astawanqa manaña karqachu wawasnenqa. Rehabiaspata wawasnenqa ashkha karqanku.

¹⁸Izharpa kuraj kaj wawanqa Selomit karqa.

¹⁹Hebrompa wawasnintaj karqanku: Jeraías, kuraj kaj, sullk'a kajtaj Amarías; kinsa kajtaj Jahaziel; tawa kajtaj Jecamán karqa.

²⁰Uzielpa wawasnintaj karqanku: Micaías, Isaías ima.

²¹Merarejpa wawasnintaj karqanku, Mahliwan, Musiwan. Mahlejpa wawasnintaj karqanku Eleazarwan, Ciswan.

²²Eleazarqa mana uj qhari wawasniyoj kaspalla wañuporqa; warmi wawasnillan karqanku, paykunataj casarakorqanku tionkoj Cispa qhari wawasninwan.

²³Musej wawasnintaj kinsa karqanku: Mahli, Edar, Jeremot ima.

²⁴Kaykuna karqanku Levéj ayllunmanta kajkunaqa, sapa familiamanta kurajkuna yupana libropi qelqachikusqankuman jina, iskay chunka watayojmanta pataman, paykunaqa Diosta yupaychana wasipi kaj ruwanaspi llank'aj kanku.

²⁵Davidqa nerqa: Israelpa Señor Diosnenqa, ayllunman sonqo samasqapi kausakuyta, wiñaypajtaj Jerusalempi tiyakonqa.

²⁶Chayrayku levitasqa manaña Señorpa toldo wasintaqa apaykacharqankuñachu, nillataj Diosta yupaychanaspi imastachus oqharinku chaykunastapis apaykacharqankuña chu.

²⁷Ajinaqa, Davidpa qhepa kaj nisqasninman jina, Leví ayllumanta kajkunata yuparqanku iskay chunka watayojmanta pataman.

²⁸Paykunataj Aarompa mirayninmanta kaj sacerdotespa kamachiynin urapi kasharqanku. Yupaychana wasipi kaj ruwanaspi yanapanankupaj, paykunaqa patiosmanta, cuartosmantawan mink'asqas karqanku; jinataj chay Señorpaj t'aqasqas kaj imasta llimphuchanamantapis, jinataj yupaychana wasipi tukuy ima waj ruwanasmantapis.

²⁹Diospaj t'aqasqa t'antasta sinrullata churanamantapis mink'asqas karqanku, ch'aki mikhuykunamanta jaywana jak'umantapis, mana levadurayoj sillp'a t'antasmantapis, paylapi chayachisqa kaj jaywanasmantapis, wajpi chayachisqasmantapis, tukuy pesasmanta medidasmantawan.

³⁰Chay jawaqa, sapa día tutamanta tardesnimpiwan yupaychana wasipi kananku karqa Señorman graciasta qonankupaj, yupaychanankupajtaj.

³¹Jinallataj uywasta ñak'aspa Señorpa q'olachinankupaj samakuna p'unchaykunapi sapa killa qallarikuypi, jatuchaj fiestaspipis, Señorpaj ruwapuspapuni sapa kuti, mashkhachus kasqankuman jina, imatachus ruwanankuman jinataj.

³²Ajinallatataj paykunaqa Dioswan parlana toldo wasita Diospaj t'aqasqa cheqata qhawanankupaj churasqas karqanku, jinamanta ayllu masisninkuwan Aarompa mirayninmanta kajkunawan khuska yupaychana wasipi imatapis ruwaspa.