Read Quechua Bolivia DC Bible 1 CRÓNICAS 28 Bible Online

1 CRÓNICAS 28 - Quechua Bolivia DC Bible bible

1 CRÓNICAS 28

¹Davidqa Jerusalempi Israelmanta tukuy kamachejkunata tantaykorqa, reypa kamachiynimpi kasharqanku chay t'aqa soldadospa kamachejkunasninta, jinataj chay waranqa t'aqa soldadospa kamachejkunasninta, pachaj soldados t'aqamanta kamachejkunastapis, reypa chajrasinmanta poqoykunata qhawajkunasta, uywasninta qhawajkunata wasisninta qhawajkunatapis, aswan allichaj runasta, wapu maqanakojkuna soldadostawan ima.

²Chaypacha Davidqa sayarikuspa nerqa: Uyariwaychej hermanosníy, qankuna aylluymanta kajkunapis. Noqa munarqani uj wasita jatarichiyta, Señorpa trato ruwasqa cajonninta chayman churanapaj. Chaypitaj Diosninchejpa tiyakunan kanampaj, wakichikorqaniñataj tukuy imasta chay wasita ruwachinaypajqa.

³Diostaj kay jinata niwarqa: Mana qanchu yupaychana wasiyta jatarichejqa kanki, imaraykuchus qanqa ancha maqanakusta ruwaj runa kanki, yawartataj ashkhata jich'achinki.

⁴Chaywampis, Israelpa Señor Diosnenqa, tukuy aylluy ukhumanta ajllawarqa Israelpaj wiñaypaj reynin kanaypaj. Pay ajllarqa Judá aylluta kamachej ayllu kanampaj. Judá ayllumantataj noqaj wasi aylluyta ajllarqa, wauqesniy ukhumantataj noqata, tukuy Israel jallp'amanta rey kanaypaj ajllawarqa.

⁵Kunantaj Señor qowarqa chay ashkha wawasniy ukhumanta waway Salomonta ajllan, tukuy Israel jallp'api Señorpa sutimpi kamachinampaj.

⁶Señorqa nillawarqataj: Qampa wawayki Salomonmin yupaychana wasiyta ruwapuwanqa, paytaqa waway kanampaj ajllakuni, noqataj tatan kanaypaj, wiñaypajtaj reinonta sayachisaj, sichus pay kallpachakonqa, kamachisqasniyta, nisqasniytawan kunan p'unchaykama jina junt'anqa chayqa.

⁸Kunanqa Señorpa sutimpa tantasqa tukuy Israel aylloj ñaupaqempi, jinataj Diospa uyarinampi k'uchis kaychej, Señor Diosniykichejpa tukuy kamachisqasninta waqaychanaykichejpaj, jinamanta kay k'acha jallp'aykichejqa qankunajllatapuni kanampaj, chaymantataj wawasniykichejman wiñaypaj saqepunaykichejpaj.

⁹Qanrí, wawáy Salomón, tataykej Diosninta allinta kasuy usqhayta kasukuspataj, Señorqa tukuypa sonqonta rejsin, jinallataj ima yuyasqantapis Payqa rejsin. Ajinata payta mask'anki chayqa, tarinki. Paymanta t'aqakuywaj chayri, wiñaypaj qhesachasonqa.

¹⁰Yuyarikuypuni. Señor qanta ajllakususqanta uj tiyakuna llimphu wasita ruwapunaykipaj. Chayrayku kallpachakuy, ruwaytataj.

¹¹Chaypacha Davidqa wawan Salomonman jaywaykorqa oqharichina plano ruwasqata yupaychana wasej ñaupaqempi corredormanta, wasisninmanta, kapuykunasta jallch'ana cuartosmanta, patan alto cuartosmanta, ukhumpi kaj cuartosmanta, Diospa parlamunan cheqamanta ima.

¹²Qollarqataj imastachus ruwayta yuyasharqa chaykunamanta planosta, yupaychanapaj wasej pationmanta, jinataj muyuynimpi cuartosmanta, chay valorniyoj imasmanta, Señorpaj t'aqasqasninku jaywanata, jallch'ana cuartosmantapis.

¹³Ajinallataj mit'asniyoj sacerdotespaj, levitaspaj, jinataj Diosta yupaychana wasipi tukuy kaj ruwanaspaj cuartosmantapis, jinallataj Diosman yupaychaypi imastachus apaykachanku chay imasta jallch'anapajpis.

¹⁴Ajinallatataj pesopi qorqa ashkha qoritawan, qolqetawan, Diosta yupaychana imaschus ruwakunan karqa, qorimanta chayri qolqemanta chaykunapaj.

¹⁵K'ancha churanapaj k'anchanasninta ruwanapaj ima qorimanta, jinataj qolqemantapis, sapa ujpaj mashkhachus kanan karqa, chayman jina pesopi qorqa.

¹⁶Jinallatataj pesopi qorqa sapa mesapaj qorimanta kajpaj, qolqemanta kajpajpis, chay mesasqa Diospaj t'aqasqa t'antasta sinrullata churanapaj karqa.

¹⁷Qollarqataj llimphu qorita, trinchesta ruwanapaj, jatuchaj vasostapis qorimanta, jinataj qolqemantapis, tasasta, copasta, ruwanapajpis, chaykunapajqa wakinampaj jina qorqa, sapa ujpaj mashkhachus pesasqanman jina.

¹⁸Incienso q'osñichina altarta ruwanapajpis llimphu kaj qorita ashkhata jaywarqa. Chanta qorita qollarqataj querubinespaj carretata ruwanankupaj. Chay querubinesqa lijrasninkuwan qhataykoj kanku Señorpa trato ruwasqa cajonninta.

¹⁹Davidtaj nerqa: Chay tukoyqa qelqasqa karqa Señor mosqoypi rikuchiwasqanman jina. Yachachillawarqataj chay planoman jina imaschus ruwakunanmantapis.

²⁰Chaypacha Davidqa Salomonman nerqa: Kallpachakuy, sinch'itataj sayay, llank'aj pachataj churakuy. Ama iskayrayaychu, nitaj manchachikuychu, Señor Diosneyqa qanwampuni kanqa. Payqa mana saqesonqachu, nitaj qonqarparisonqachu, Señorpa yupaychana wasimpi tukuy ruwanasta tukuyaykikama.

²¹Kaypi kashanku sacerdotespa, jinallataj levitaspa mit'asninkupis wakisqas yupaychana wasipi kaj ruwanasta ruwanankupaj. Tukuy laya llank'anaspi allin sonqowan ruwajkuna kanqanku, yanapasunankupaj, tukuy imapi sumaj yachayniyoj runas ima ruwanallapajpis, kamachejkunapis, tukuynin Israel ayllupis kamachiyki urapi kanqanku.