Read Quechua Bolivia DC Bible 1 CRÓNICAS 29 Bible Online

1 CRÓNICAS 29 - Quechua Bolivia DC Bible bible

1 CRÓNICAS 29

¹Chaymanta rey Davidqa tukuy tantasqa runasman nerqa: Waway Salomón k'atallata Diosqa ajllan, payqa wayna runallaraj, wasi ruwanataj may jatun kashan, imaraykuchus kay ruwanaqa mana runaj tiyakunampajchu kashan, manachayqa Señor Diosta yupaychana wasi kanqa.

²Tukuy kallpaywan maychus kananta wakichini Diosniypa yupaychana wasin ruwakunampaj: Qorita qori imaspaj, qolqeta qolqe imaspaj, bronceta bronce imaspaj, fierromanta fierro imaspaj, maderamanta madera imaspaj. Wakichillarqanitaj: Cornalina nisqa rumita k'askachinapaj, k'acha rumista, yana rumista, tukuy laya colorwan k'achanchasqa rumista, tukuy laya k'achanchasqa rumista, marmol nisqa rumimantawan may chhikata wakichini.

³Yupaychana wasipaj tukuy wakichisqaymanta jawaqa, Diosniypa yupaychana wasinta munakusqayrayku jaywallanitaj qorita, qolqetapis noqajpata kajmanta:

⁴Aswan llimphu kaj qorimanta pachaj waranqa kilosta, ch'uwachas qolqemantataj iskay pachaj kinsa chunkayoj waranqa kilosta, chaykunawan wasej tukuy perqasninta qhataykunaypaj.

⁵Qorita qori imaspaj, qolqeta qolqe imaspaj, qoni. Jinataj chay artesanos tukuy kajta chaykunawan ruwanankupaj. Kunanqa, pitaj qankuna kikiykichejmanta Señorman jaywanata qoyta munan?

⁶Chaypacha wasi ayllumanta kamachejkuna, Israel ayllumanta kajkuna, waranqa soldadosta kamachejkuna, pachaj soldadosta kamachejkuna, reypaj llank'ajkunamanta kamachejkuna, paykuna kikinkumanta qorqanku.

⁷Diosta yupaychana wasej imasnimpaj qorqanku pachaj sojta chunka phishqayoj waranqa kilos qorita, chanta chunka waranqa qori phatastawan, qolqemantataj kinsa pachaj kinsa chunkayoj waranqa kilosta, broncemantataj yaqha sojta pachaj waranqa kilosta, fierromantataj kinsa millones kinsa pachaj waranqayoj kilosta.

⁸Ajinallatataj valorniyoj k'acha rumisniyoj kajkunaqa jaywarqanku Diosta yupaychana wasipi jallch'asqa kanampaj, chay jallch'anampajtaj Gersompa ayllunmanta Jehiel churasqa karqa. Gersompa ayllunmanta karqa.

⁹Tukuy runasqa kusikorqanku chay jina k'acha sonqoyoj kasqankumanta. Chay tukuy imasta Señorman tukuy sonqosninkuwan qosqankurayku rey Davidpis mayta kusikorqa.

¹⁰Chaypacha Davidqa Señorqa bendicerqa tukuy ayllus tantasqaspa ñaupaqempi: Israel tataykoj Señor Diosnin qonqa Señor wiñaymanta wiñaypaj bendicisqa kayta.

¹¹Señor qampatamin jatunchasqa kayqa, atiypis, kusiypis, atipaypis, jatunchasqa kaypis! Qampatamin kay pachapi, janaj pachapi, tukuy ima kajpis. Reinopis qampallatataj, Señor, qanlla tukuymanta aswan jatun atiyniyoj kanki.

¹²Qanmantamin qhapaj kaypis jatun kaypis jamun. Qan kamachinki tukuyta. Kallpapis, atiypis makiykipi kashan. Makisnillaykipitaj kashan tukuyman jatunchasqa kayta, atiytapis qoyqa.

¹³Chayrayku kunanqa qan Diosniykuman graciasta qoyku, yupaychaykutaj jatunchasqa sutiykita.

¹⁴Kunanrí, pitaj noqa kani, aylluypis pitaj kasqa chhika imasta qanman qoyta atinaykupajri? Cheqamanta tukuy imaspis qanmanta jamun, qanmanqa qoyku qanmanta jap'erqayku chayllamantataj.

¹⁵Qampa rikuyniykipeqa mana llajtayoj ñan purejkuna jinalla kayku. Jinallataj ñaupa tatasniykupis karqanku, kaypachapi kausayniykoqa llanthu jina pasapullan, mana ima suyayniyoj.

¹⁶Señor Diosniyku, qampatamin kanku, qanmantataj jamunku, kay chhika tukuy imasqa, kaykunata wakichiyku qampa llimphu sutiykipi yupaychana wasita jatarichinaykupaj!

¹⁷Noqa yachani, Diosníy, qanqa sonqosta allinta qhawanki, cheqan kajtaj qanta kusichisunki. Chayrayku cheqa sonqowan kay tukuyta jaywayki. Kunanqa kusiywan rikuni, kaypi tukuy aylluyki tantasqas jaywanasninkuta munakuywan apamususqankuta.

¹⁸Qanqa ñaupa tatasniykoj Señor Diosnin kanki, Abrahampata, Isaacpata, Israelpatawan. Kay aylluykej sonqonman churaypuni ari, wiñaypaj chay jina k'uchi sonqoyoj kayta, qanmantaj astawan sonqonkuta wajyay.

¹⁹Waway Salomonmampis qollaytaj cheqa sonqoyoj kayta, kamachisqasniykita, nisqasniykita, leykunasniykitapis junt'ayta atinampaj. Tukuy chaykunata ruwaspa Diosta yupaychana wasita sayarichinampaj, chaypajqa noqa wakichiniña.

²⁰Chay qhepamantaj Davidqa tukuy tantasqas kasharqanku chaykunaman nerqa: Kunanqa Señor Diosniykichejta bendiciychej. Chaypacha tantasqas kajkunaqa tukuyninku ñaupa tatasninkoj Señor Diosninta bendicerqanku, qonqorikuspa k'umuykukuspataj yupaycharqanku, Señorpa ñaupaqempi, reypa ñaupaqempiwan.

²¹Q'ayantintaj uywasta ñak'aspa Señorman jaywaykorqanku, wakinkunataj q'olachiporqanku: Waranqa torillosta, waranqa carnerosta, waranqa corderostawan, sapa ujninkuta vinowan ch'ajchuykuspa, jinataj may chhika uywa ñak'asqastawan jaywarqanku, tukuynin Israel ayllusrayku.

²²Chay diapeqa mikhorqanku, ujyarqankutaj Señorpa ñaupaqempi may kusiywan. Chaymantataj uj kutitawan nerqanku Davidpa wawan Salomón reyninku kanampaj. Diospa ñaupaqempitaj llimphu aceitewan jawiykorqanku kuraj kamachejninku kanampaj, Sadoctataj sacerdote kanampaj.

²³Ajinata Salomonqa tatan Davidpa cuentanmanta Señorpa tronompi tiyakorqa, tukuy imapitaj may allimpuni rerqa. Tukuy Israel ayllutaj payta kasorqa.

²⁴Tukuy kamachejkuna, wapu maqanakojkuna, Davidpa tukuy wawasninwan ima, Salomonman k'umuykorqanku.

²⁵Señorqa Salomonta may atiyniyojta ruwarqa, tukuy Israel aylloj ñaupaqempi. Reinonta chay jina sumajtapuni llimphucharqa. Paymanta ñaupajtaqa Israelpi ni mayqen reypis pay jina karqachu.

²⁶Isaej wawan Davidqa Israelta kamacherqa.

²⁷Israelpa reynin karqa tawa chunka watasta, chaykunamantataj Hebrón llajtapi qanchis watasta, Jerusalempitaj kinsa chunka kinsayoj watasta.

²⁸Wañuporqataj allin machuyaynimpitaj ashkha watasniyoj, ashkha kapuyniyoj, tukuy kusiyniyoj ima. Wawan Salomontaj paypa qhepanta kamacherqa.

²⁹Rey Davidpa ruwasqasninmantaqa, qallariyninmantapacha tukuykuyninkamaqa profeta Samuelpa willana librosnimpi qelqasqa kashanku. Chanta profeta Natampapi, chanta profeta Gadpa librosnimpi ima.

³⁰Tukuy kamachisqanmanta, atiyninmanta, chay t'ukuna imas, payta qhatirisqasninmanta, jinataj Israel aylluta chay waj nacionestawan.