Read Quechua Bolivia DC Bible 2 CRÓNICAS 13 Bible Online

2 CRÓNICAS 13 - Quechua Bolivia DC Bible bible

2 CRÓNICAS 13

¹Abiasqa Judapi kamachiyta qallarerqa, Jeroboam chunka pusajniyoj watastaña kamachishajtin.

²Jerusalempitaj kinsa watasta kamacherqa. Mamampataqa Micaías sutin karqa. Payqa Gabaamanta Urielpa wawan karqa. Abiamwan Jeroboamwantaj maqanakuyta qallarerqanku.

³Abiamqa maqanakuyta qallarerqa tawa pachaj waranqa ajllasqa soldadoswan, Jeroboamtaj maqanakoj churakullarqataj Abiampa contrampi pusaj pachaj ajllasqa soldadoswan.

⁴Chaypacha Abiamqa Efraín orqonejpi Zemaraim orqopi sayarispa qhawarerqa: Jeroboam jinataj Israel ayllupis uyariwaychej.

⁵Qankunaqa manachu yachankichej, Israelpa Señor Diosnenqa reinota Davidman, chanta mirayninmampis wiñaypaj qosqanta, mana p'akinapaj nisqa tratopi?, nispa.

⁶Chaywampis Nabatpa wawan Jeroboamqa reynimpa contrampi oqharikorqa, payqa Davidpa wawan Salomompa kamachin karqa.

⁷Paywan tantakorqanku qhella sajra runas, Salomompa wawan Roboammanta astawan aterqanku. Payqa waynallaraj, chantapis llanu runa kasqanrayku, paykunawan mana churanakuyta aterqachu.

⁸Kunan qankunaqa churanakuyta munashankichej Davidpa mirayninnejta kamachisqa kashan chay Señorpa reinonman chaytaqa ruwashankichej, may ashkha kasqaykichejman atienikuspa. Chay jawaqa qorimanta waka uñasta Jeroboam ruwapusorqachej dioskunata jina yupaychanaykichejpaj.

⁹Manachu qankunaqa chaykunaman atienikuspa Señorpa sacerdotesninta chanta qharqorqankichej, Aarompa mirayninmanta kaj levitastapi, mana Diosta rejsejkuna naciones jina sacerdotesta churakorqankichej? Pillapis llimphuchakuyta munaspa jamojtin uj waka uñawan, qanchis corderoswantaj, sacerdote kayta munaj kaj dioskunamanta?

¹⁰Noqaykupajqa Señormin Diosniykoqa, manataj paytaqa saqerpariykuchu. Señorpa kamachimpi kashanku chay sacerdotesqa Aarompa mirayninmanta kanku, yupaychaykunaspaj churasqastaj levitasmanta kanku.

¹¹Paykunaqa uywasta ñak'aspa Señorpaj q'olachipunku paqarimpi, tardempipis, inciensostapis q'olachipullankutaj, llimphuchasqa mesaman churallankutaj Diospaj t'antata, sapa tardetaj jap'ichinku k'anchanasta, qorimanta ruwasqa k'anchanapi k'anchanampaj. Imaraykuchus noqaykoqa Señor Diosniykoj nisqasninta junt'ayku. Qankunataj paytaqa saqerparinkichej.

¹²Kayta yuyarikuychej Diosqa noqaykuwan kashan kamachejniyku jina. Sacerdotesnintaj wakisqaña kashanku trompetaswan, contraykichejpi qankunawan maqanakunaykupaj. Chayrayku qankuna Israel ayllumanta kajkuna ñaupa tatasniykichejpa Señor Diosnimpa contrampi ama maqanakuychejchu, imaraykuchus paytaqa mana atipawajchejchu.

¹³Jeroboamqa kamacherqa qhepamanta kaj soldadosnin, muyuykuspa Judamanta soldadospa qhepankuman maqanakoj rinanta. Jinamanta Jeroboampa soldadosnenqa aswan ashkha kaj Judajpa ñaupaqempi kasharqanku, chaykamataj qhepamanta kaj soldadosqa Judáj qhepanmanta maqaj wakisharqanku.

¹⁴Judamanta kajkunataj qhepaman qhawarikuspaqa, reparakorqanku ñaupajmanta qhepamantataj paykunawan maqanakoj jamushasqankuta. Chaypacha Señorman qhaparikorqanku, sacerdotestaj trompetasta waqacherqanku.

¹⁵Judamanta kajkuna maqanakuman yaykunankupaj qhaparikojtinkutaj, chaypacha Diosqa Jeroboamta tukuy israelitastawan atipacherqa Abiampa Judáj ñaupaqempi.

¹⁶Israelitasqa Judamanta kajkunamanta ayqerqanku, Diospuni paykunaj makinkuman jaywaykusqanrayku.

¹⁷Abiamwan runasninwan imaqa maytapuni ashkhata wañuraykucherqanku, chaypacha phishqa pachaj waranqa Israelpa ajllasqa soldadosnin kajmanta wañorqanku.

¹⁸Jinata chay kutipeqa israelitasqa k'umuykachachisqas karqanku. Judamanta kajkunataj may atiyniyoj kallpachasqastaj rikhurerqanku, ñaupa tatasninkoj Señor Diosninkupi atienikusqankurayku.

¹⁹Abiamqa Jeroboamta qhatiykorqa, kay llajtasta jap'ikaporqa: Betelta, Jesanata, Efrainta ima, chay qaylla ranchosninta ima.

²⁰Jeroboamqa mana astawan atiyniyoj kayta aterqañachu Abiam kausashajtin. Chaymantataj Señorqa llakicherqa, paytaj wañuporqa.

²¹Chaykamataj Abiamqa aswan atiyniyoj karqa. Warmisnimpis chunka tawayoj karqanku. Qhari wawasninrí iskay chunka iskayniyoj karqanku. Warmi wawasnintaj chunka sojtayoj karqanku.

²²Abiampa wakin nisqasnin, tukuy kausaynimpi ruwasqasninmantapis, qelqasqas kashanku profeta Iddoj librompi.