Read Quechua Bolivia DC Bible 2 CRÓNICAS 15 Bible Online

2 CRÓNICAS 15 - Quechua Bolivia DC Bible bible

2 CRÓNICAS 15

¹Diospa Espíritun Obedpa wawan Azariasman jamorqa.

²Paytaj Asata taripaj llojserqa, nerqataj: Uyariwaychej, Asa, jinataj tukuy Judamanta kajkuna, Benjamimpamanta kajkunapis, Señor qankunawan kanqa, qankuna paywan kashankichej chayqa. Sichus qankuna payta mask'ankichej chayqa, tarinkichej. Sichus saqerparinkichej chayri, paypis saqerpallasonqachejtaj.

³Israelqa may unayta mana Dioswanchu karqa, mana yachachej sacerdoteyoj, nitaj leymanta ima yachachiyniyoj.

⁴Jinapis llakiynimpi, Israel aylloqa, Israelpa Señor Diosninman kutirikuspa mask'ajtenqa, payqa tarichikorqa.

⁵Jaqay tiempopeqa mana pipajpis sonqo tiyasqa kakuy karqachu, manachayqa may chhika mancharikuykunaslla karqa, chay jallp'aspi tiyakojkunapajqa.

⁶Nacioneswan llajtaswanqa ujkuna ujkunata tukuchinakorqanku, Señor paykunataqa tukuy llakiykunaswan manchachisqanrayku.

⁷Chayrayku qankunaqa wapuchakuychej, amataj iskayrayaychejchu tukuy ruwasqasniykichejmanta t'inkachisqas kankichej.

⁸Maypachachus Asa uyarerqa profetaj nisqanta, chaypacha kallpachakorqa, chinkacherqataj chay millay lantista tukuy Judá jallp'amanta, Benjamín jallp'amantawan. Jinataj chay Efraín orqospi jap'erqanku chay llajtasmantapis. Chaymantataj allincharqa Señorpa altarninta Señorpa wasimpi corredorpa ñaupaqempi kasharqa chayta.

⁹Chaymantataj tantacherqa tukuy Judamanta, Benjaminmanta kajkunatawan, jinataj Efrainmanta jamojkunata, Manasespamanta jamojkunatawan, Simeompamanta jamojkunatawan. Chaypacha ashkha israelitasmanta Asajman pasakapusqanku, yachaspa Señor Diosninku paywan kashasqanta.

¹⁰Jerusalempi tantakorqanku, Asa chunka phishqayoj watastaña kamachishajtin, kinsa killampi, chay diataj Señorman uywasta ñak'aspa jaywaj kanku, qanchis pachaj wakasta, qanchis waranqa ovejastawan. Chaykunaqa enemigosninkumanta qhechusqasninku karqa.

¹²Chaymantataj sumaj tratota ruwarqanku, ñaupa tatasninkoj Señor Diosninkuta mask'anankuta, tukuy sonqonkuwan.

¹³Nillarqankutaj pichus Israelpa Señor Diosninta mana mask'ayta munajqa, wañuchisqa kananta, jatumpis, juch'uypis kachun, chayri qharipis warmipis kachun, nispa.

¹⁴Señormantaj chayta jurarqanku, may sinch'iwan parlaspa, kusiywan qhaparispataj, trompetaspa, pututuspa ch'ajwaynimpi.

¹⁵Judamanta kajkunataj tukuyninku chay juramentota ruwasqankumanta kusikorqanku, tukuy sonqowan jurasqankurayku, tukuy munayninkuwantaj Señorta mask'asqankurayku. Señortaj paykunawan tarichikusqa, qayllankupi tiyakoj llajtaswantaj allin kausayta qosqa.

¹⁶Chay jawataj rey Asaqa, jatun maman Maacamantaqa reina kayninta qhechurparerqa, Asera lantita ruwachikusqanrayku. Asaqa t'unarparerqa chay lantitaqa. Juch'uykunasman t'unaraytawantaj Cedrón mayupi ruphachimorqa.

¹⁷Asaqa mana chinkacherqachu Israelpi lomas patapi lanti churana wasistaqa. Chaywampis payqa tukuy kausaynimpi cheqan sonqoyoj karqa.

¹⁸Diospa yupaychana wasinmantaj aparqa tukuy qorita, qolqeta, waj imastawan, paywan ima Señorpaj t'aqasqankutawan.

¹⁹Asa kinsa chunka phishqayoj watasta kamachinankamaqa maqanakusqa mana karqanku.