Read Quechua Bolivia DC Bible 2 CRÓNICAS 16 Bible Online

2 CRÓNICAS 16 - Quechua Bolivia DC Bible bible

2 CRÓNICAS 16

¹Rey Asaqa kinsa chunka sojtayoj watasta kamachisqanmantaña Israelpa reynin Baasaqa rerqa Judawan maqanakamoj, Ramá llajtataj aswan sinch'ita jark'aykucherqa, Judamanta reyman ni pi yaykunampaj, nitaj pipis llojsinampaj.

²Chaypacha rey Asaqa Señorpa yupaychana wasinmanta orqhorqa qorita, qolqetawan, chay jallch'ana cuartosmanta, reypa palacio wasinmanta ima. Apacherqataj Ben-adadman, payqa Siriamanta rey karqa, tiyakorqataj Damascopi, kay willaytawan apacherqa:

³Qanwan noqawan uj tratota ruwanachej, imaynatachus tatasninchej ruwarqanku jinata. Kay apachimuyki qoritawan, qolqetawan, Israelpa reynin Baasawan tratoykita p'akiy, payqa kaymanta ripunampaj.

⁴Ben-adadqa rey Asaj nisqanta uyarerqa, chaymantataj soldadosnimpa kurajkunasninta Israel llajtasman kacharqa maqanakunankupaj. Jinamanta jap'ikaporqanku Ijonta, Danta, Abelmaimta, Neftalipi mikhuy jallch'ana tukuy llajtasnintawan.

⁵Baasataj chayta yachaspa saqerparerqa Ramá llajtapi ruwachishasqanta.

⁶Chaypachataj rey Asaqa Judá aylluta pusariykukuspa rerqa Ramá llajtamanta apakampoj rumista, k'aspista, mayqenkunawanchus Baasaqa chay llajtata jark'acherqa chaykunata. Chaykunawantaj Gebatawan, Mizpatawan jark'acherqa.

⁷Chay tiempopeqa profeta Hanni Judáj reynin Asata waturej rerqa, nerqataj: Siriaj reynimpa soldadosnin makisninkumanta llusp'inku Siriaj reynimpi atienikusqaykirayku, manataj Señor Diosniykipichu.

⁸Manachu etiopeswan, libioswanqa may atiyniyoj soldados karqanku, ashkha soldados caballospi maqanakojkunasniyoj, jinataj maqanakupaj carrestasniyoj ima? Chaywampis Señorqa makisniykiman churarqa paypi atienikusqaykirayku.

⁹Señorqa sumajta qhawamushan tukuy kay pachata, kallpachanampaj tukuy sonqowan paypi atienikunku chaykunata. Kaykunataqa uj wampu runa jina ruwanki. Chayrayku kunanmanta ñaupajmanqa maqanakus qhatirillasonqapuni.

¹⁰Chaypacha rey Asaqa sinch'itapuni phiñarikorqa chay profetaj contrampi. Carcelmantaj wisq'aykuchimorqa. Jinallatataj chay kutipeqa wakin israelita runasqa llakiyta ñak'aricherqa.

¹¹Asaj ruwasqasninmanta willaykunasqa qallariymanta tukukuyninkama qelqasqa kashan Judamanta, Israelmantawan reyninkoj librompi.

¹²Kinsa chunka isq'onniyoj watastaña kamachishajtintaj Asaqa sinch'ita onqoykorqa chakisninmanta, chay onqoynimpitaj mana Señormanchu rerqa, manachayqa jampejkunaman.

¹³Wañuporqataj tawa chunka ujniyoj watastaña kamachishaspa.

¹⁴P'ampaykorqankutaj Davidpa llajtampi, ñaupajmantaña covachata ruwachikusqa chaypi. Ayantataj uj cajonman churaykorqanku, chaymantataj q'apaj jampista, tukuy laya q'apaj jampistawan churaykorqanku, chay imasta ruwayta yachajkunaj wakichisqankuta. Chaymantataj paypa sutimpi may jatun ninata larwacherqanku.