Read Quechua Bolivia DC Bible 2 CRÓNICAS 17 Bible Online

2 CRÓNICAS 17 - Quechua Bolivia DC Bible bible

2 CRÓNICAS 17

¹Rey Asaj qhepantataj wawan Josafat kamacherqa, payqa Israel aylloj contrampi kallpachakorqa.

²Judapi tukuynin jark'achisqa llajtaspi, soldadosta churarqa, tukuynin Judá jallp'api qhawanankupaj, Efraín llajtaspipis, tatan Asa qhechurasqa chaykunapi.

³Señorqa Josafatwan karqa, imaynatachus tatan David qallariynimpi ruwasqa ajinata ruwasqanrayku. Manataj yupaycharqachu Baalpa tukuy laya lantisnintaqa.

⁴Manachayqa tatampa Diosninta mask'arqa, kamachisqasninta junt'aspa, manataj Israel runaspa ruwasqasninkuman jinachu ruwarqa.

⁵Chayrayku Señorqa makimpi sinch'ita reinota sayacherqa. Judamanta kajkuna tukuyninku payman t'inkasta aparqanku, chayrayku may qhapaj rikhurerqa, may jatunchasqataj.

⁶Sonqompitaj mayta kallpachakorqa, Señorpa ajllasqan ñankunasninta qhatinampaj. Judamantataj qhechurarqa loma patapi kaj millay lanti yupaychana wasista, jinataj Aseraman rijch'akoj lantistapis.

⁷Kinsa watastaña kamachisqanmantataj kacharqa yanapajkunasninta Behailta, Abdiasta, Zacariasta, Natanaelta, Micaiasta ima, Judá llajtaspi yachachimunankupaj.

⁸Paykunawantaj kacharqa levitasmanta Semaiasta, Netoniasta, Zabadiasta, Asaelta, Semiramotta, Jonatanta, Adoniasta, Tobiasta Tobadoniastawan. Paykunawan rillarqankutaj sacerdotesmanta Elisamawan, Joramwan.

⁹Paykunaqa Señorpa leyninmanta librowan Judamanta runaswan yachachimorqanku. Paykunataj Judapi tukuy llajtasnejta purerqanku tukuy runasman yachachispa.

¹⁰Chaypachataj Judá qayllapi kaj tukuy jallp'asmanta reykunasqa Señorta sinch'ita manchachikorqanku. Chayrayku Josafatpa contrampeqa maqanakuyta mana munarqankuchu.

¹¹Filisteokunamantataj Josafatman t'inkata apamorqanku, qolqetapis impuestota jina. Arabespis apamullarqankutaj qanchis waranqa qanchis pachajniyoj carnerosta, chivosmantapis chay chhikallatataj.

¹²Josafatqa astawan atiyniyojman tukusharqa. Judapitaj jark'achisqa llajtasta, jinataj mikhuykunasta, waj imastawan jallch'ana llajtastawan ruwacherqa.

¹³Chantapis Judá llajtaspeqa may ashkha imastawan ruwacherqa. Jerusalempitaj may wapu soldadosnin tiyaporqa.

¹⁴Wasi ayllusninkuman jinataj kay jina qelqasqas karqanku: Judá ayllumantaqa waranqa soldadosta kamachejkunajpa kurajnenqa Adnas karqa, paywantaj kinsa pachaj waranqa soldados kasharqanku.

¹⁵Paypa qhepampitaj kasharqa kamachej Johanán, iskay pachaj pusaj chunkayoj waranqa soldadoswan.

¹⁶Paypa qhepampitaj Sicrej wawan Amasías kasharqa, iskay pachaj waranqa wapu soldadoswan. Payqa munaynillanmanta Señorta servikoj churakorqa.

¹⁷Benjamimpa ayllunmantataj Aliada karqa. Payqa may wapu maqanakoj runa karqa. Paywantaj kasharqanku iskay pachaj soldados wakisqas arcosninkuwan, jinataj escudosninkuwan ima.

¹⁸Paypa qhepampitaj kasharqa Josabad. Paywantaj kasharqanku pachaj pusaj chunkayoj waranqa soldados maqanakunankupajpacha wakisqas.

¹⁹Chaykunaqa reypa kamachimpi karqanku, manataj yuparqankuchu rey churasqa Judapi chay jark'achisqa llajtasman chaykunaqa.