Read Quechua Bolivia DC Bible 2 CRÓNICAS 19 Bible Online

2 CRÓNICAS 19 - Quechua Bolivia DC Bible bible

2 CRÓNICAS 19

¹Judáj reynin Josafattaj allillan kutimporqa Jerusalempi palacionman.

²Hananej wawan Profeta Jehutaj payta taripaj llojserqa, nerqataj: Imaraykutaj yanapanki chay sajra runata, munakunkitaj Señorpa chay enemigontarí? Chayraykumanri Señorqa qanwan phiñakun.

³Chaywampis qampi tarikullantaj allin imas, chay Asera lantista kay nacionesmanta chinkachisqasniyki, tukuy sonqoykiwan Diosta mask'aj churakusqayki ima, nispa.

⁴Josafatqa Jerusalempi tiyakorqa, jinapis payqa ayllunta waturej rejpuni, Bersebamantapacha Efraín orqokama, ñaupa tatasninkoj Señor Diosninkuman kutichimunampaj.

⁵Chay jawaqa juezkunata churarqa Judapi tukuy jark'achisqa llajtaspi, tukuy chaqanejpi.

⁶Chay juezkunamantaj nerqa: Allinta qhawarikuychej imatachus ruwashasqaykichejpi, manamin runaspa sutimpichu imatapis cheqanta ruwankichej, manachayqa Señorpa sutimpi qankunawan payqa kashan, justiciata ruwashajtiykichej.

⁷Ajinaqa, Señorta manchachikoyqa qankunapi kachun, allintataj imatachus ruwashasqaykichejta qhawakuychej, imaraykuchus Señor Diosniykichejqa manamin mana allin kajtaqa qhawallanchu. Payqa mana ujllamanchu kutikun, nitaj lluk'ichikunchu.

⁸Jinallatataj Josefatqa Jerusalempi churarqa wakin levitasta, sacerdotesta, Israel wasi ayllumanta kurajkunatawan ima, sirvinankupaj Señorpa kaj imasnimpi cheqanchaspa. Jinallataj Jerusalempi tiyakojkunaj pleitosninkuta cheqanchaspa.

⁹Kay jinatataj kamacherqa: Qankunaqa imatapis ruwanaykichej Señorta manachachikuspapuni, cheqan kaywan, tukuy sonqowantaj.

¹⁰Ima pleitollatapis llajta masisniykichej llajtaspi tiyakojkunamanta apamusunkichejman, chaypitaj nisunkichejman, wañucheyqa juchachus kasqanta manachus chayta, chayri junt'achinaykichejpaj leykunata, yachachiykunata, kamachiykunata, nisqakunatawan, chayqa, allintapuni k'amiychej, ama Señorpa contrampi juchallinankupaj, Señor ama qankunawan, nitaj paykunawan phiñakunampaj. Chayta qankunaqa ruwaychej, manataj qankunaj juchaykichejchu kanqa.

¹¹Kuraj kaj sacerdote Amariastaj Señorpa imasnimpeqa aswan kuraj kanqa. Judá aylloj kurajnintaj Israelpa wawan Zabadiastaj, imaschus reywan ruwanas kajmanta mink'asqa kanqa; levitastaj qankunaj yanapajkunasniykichej kanqanku. Kallpachakuychej ari, llank'ajtaj churakuychej. Señortaj allin kajta ruwajwan kachun.