Read Quechua Bolivia DC Bible 2 CRÓNICAS 20 Bible Online

2 CRÓNICAS 20 - Quechua Bolivia DC Bible bible

2 CRÓNICAS 20

¹Uj tiempomantawanqa Moabitaswan, amonitaswan, meunitaswan imaqa tantaykukuspa Josafatwan maqanakoj rerqanku.

²Chaypacha wakin rispa Josafatman willamorqanku: Edommanta, Wañusqa Mar qocha nisqa chay chimpanmanta ashkha soldados contraykipi jamushanku. Ñapis Hazezon-tamarpiña kashanku, chayri En-gadi nisqa chaypi.

³Josafatqa manchachikorqa, Señormantaj k'umuykorqa payta tapurinampaj. Tukuy Judá ayllumantaj kamacherqa ayunanankuta.

⁴Judamanta kajkunataj tantakorqanku Señormanta yanapata mañarikunankupaj. Tukuynin Judá llajtamanta runastaj chayamorqanku Señormanta yanapata mañakunankupaj.

⁵Josafattaj Jerusalempi Judamanta tantakorqanku chay tukuy runaspa chaupimpi sayaykorqa, Señorpa wasimpa mosoj patiompa ñaupaqempi.

⁶Nerqataj: Ñaupa tatasninkoj Señor Diosnin, qan janaj pachamanta Dios kanki, qan kamachinki tukuy nacionesta. Makisniykipi kashanku kallpapis, atiypis: Mana pipis ñaupaqeykipi sayaykuyta atinmanchu.

⁷Diosniyku, qan wijch'orqanki aylluyki Israelpa ñaupaqenmanta kay jallp'api tiyakojkunata, wiñaypajtaj qoporqanki Abraham kausaqeykej mirayninman.

⁸Paykunataj kay jallp'api tiyakuspañaqa, qampaj uj yupaychana wasita jatarichipusorqanku, nerqankutaj:

⁹Ima mana allimpis jamuwaykuman chayqa, maqanakuy, onqoy, chayri yarqhaypis kanman chayqa, kay yupaychana wasiykiman jamusqayku, qampa ñaupaqeykimantaj, imaraykuchus sutiykeqa kay wasipi kashan. Tukuy llakiykunasniykupitaj qanmanta yanapata mañakoj jamusqayku, qantaj uyariwasqayku, salvawasqaykutaj.

¹⁰Kunanqa kaypi kashanku amonitas, moabitas, Seir orqosmanta kajkunapis. Paykunaj jallp'ankuman qanqa mana munarqankichu israelitas yaykunankuta Egiptomanta jamushajtinku. Nerqankitaj paykunamanta ithirikunankuta, paykunata mana chinkachispalla.

¹¹Qhaway, paykunataj kutichishawayku qampa jallp'aykimanta noqaykuta wijch'uspa; noqaykuman chayaqeykupaj jina qowarqayku chay jallp'amanta.

¹²Diosniyku! Manachu paykunata jasut'inki? Noqaykojtaqa mana kallpayku kanchu chay chhika soldados contraykupi jamushawayku chaykunawan maqanakunaykupajqa. Manataj yachaykuchu imaynatachus ruwanaykuta, chayrayku qanman ñawisniykuta oqharikamuyku.

¹³Judamanta kajkunaqa tukuyninku Señorpa ñaupaqempi sayasqas kasharqanku, warmisninkuwan, qhari wawasninkuwan, jinataj aswan juch'uy wawasninkuwan ima.

¹⁴Tukuy ayllu tantasqas kashajtinku Señorpa Espíritun jamorqa, Zacariaspa wawan Jahazielman. Payqa Benaiaj allchhin karqa. Benaiasqa Jeielpa wawan karqa. Paytaj Mataniaspa wawan karqa. Jahazielqa levita karqa Asafpa ayllunmanta.

¹⁵Jahazielqa nerqa: Allinta uyariychej Judapi, Jerusalempipis tiyakoj runas, qampis rey Josafat. Señor nisunkichej: Ama manchachikuychejchu, nitaj kharkaychejchu, chay ashkha soldadospa ñaupaqempeqa. Kay maqanakoyqa mana qankunajtachu, manachayqa Diospatamin.

¹⁶Q'ayapacha riychej maqanakoj. Paykunaqa Sis chaynejta wicharimonqanku, qankunataj taripankichej mayu qayllanejpi, Jeruel ch'in pampaj chimpampi.

¹⁷Kay kutipeqa manamin qankunachu maqanakunkichej. Chaynejpi allinta sayakuychej, kakullaychej mana kuyukuspa, rikunkichejtaj imaynatachus Señor qankunata librasusqaykichejta. Jerusalempi, jinataj Judapi tiyakojkuna runas ama manchachikuychejchu, nitaj kharkaychejchu, q'ayapacha riychej paykunawan maqanakoj, Señorqa qankunawan kashan.

¹⁸Chaypacha Josafatqa qonqoriykukuspa pampakama k'umuykorqa. Judamanta kaj runastaj, Jerusalenmanta kaj runaspis jinallatataj Señorpa ñaupaqempi pampakama k'umuykukorqanku, yupaychanankupaj.

¹⁹Coatpa ayllunmanta kajkuna, Corejpamanta kajkunapiwan levitasqa sayarikuspa Israelpa Señor Diosninta sinch'ita qhaparispa yupaycharqanku.

²⁰Q'ayantintaj tutamanta jatarikorqanku, Tecoa ch'in pampanejman puririnankupaj. Puririshajtinkutaj Josafatqa sayarikuspa nerqa: Jerusalempi, jinataj Judapi tiyakojkuna uyariwaychej: Señor Diosniykichejpi atienikuychej, sumaj waqaychasqastaj kankichej, profetasnimpipis confiaychej, tukuy imapitaj allin risonqachej.

²¹Aylluta tapuriytawantaj wakinta takinankupaj churarqa, llimphuchasqa p'achasninkuwan churaykusqas soldadospa ñaupaqenta rinankupaj, Señorta yupaychaspa kay takiywan, Señorman graciasta qoychej, munakuynin wiñaypaj kasqanrayku.

²²Chay rato kusiywan takiykunasta takiyta qallarishajtinkutaj, Señorqa pantachinakuyta apachimorqa, amonitasman, moabitasman, Seir orqopi kajkunamanwan Judá aylluman maqanakoj jamusharqanku chaykunaman. Paykuna-puralla tukuchinakorqanku.

²³Chaypacha amonitasqa, moabitaswan ima Seir orqomanta kajkunata maqaj llojserqanku, tukuyninkutataj wañuracherqanku. Chanta paykuna purataj wañuchinakorqanku.

²⁴Judamanta runastaj wicharerqanku ch'in pampanejpi kaj torreman, chaymanta qhawarispataj chay enemigosninkutaqa, ayasllataña mast'apachata rikorqanku. Mana mayqempis ayqeyta atisqachu.

²⁵Chaypacha Josafatqa runasninwan ima enemigosninku imastachus saqesqanku chay imasta oqharej chimparqanku. Tarerqankutaj ashkha qhapaj imasta, armasta, p'achasta, valorniyoj imasta, chay tukuy imastataj jap'ikaporqanku. Ashkha imas kasqanrayku mana tukuyninta apayta aterqankuchu. May ashkhapuni kasqanrayku, kinsa diatapuni pallarqanku chay imastaqa.

²⁶Chaymanta tawa kaj p'unchaynimpitaj Beraca vallepi tantakorqanku, chaypitaj Señorta bendicerqanku. Chayrayku chay cheqataqa suticherqanku Beraca valle nispa. Chaytaj kunankama sutenqa.

²⁷Chaymantataj tukuy qharis Judamanta, Jerusalenmantapis, may kusisqas kutimporqanku Josafatpa qhepanta Jerusalenman, Señor paykunaman chay kusikuyta qosqa enemigosninkumanta libraspa.

²⁸Jerusalenman chayaspataj Señorpa yupaychana wasinman rerqanku salteriospa, arpaspa, jinataj trompetaspa ch'ajwaynimpi.

²⁹Tukuy nacionestaj Diosta mayta manchachikorqanku, yachaspa Señorqa maqanakusqanta Israelpa enemigosninwan.

³⁰Ajinata Josafat kamachishajtenqa mana ima ch'ajwaspis karqachu, Dios chay qaylla nacioneswan sonqo tiyasqa kausayta qorqa.

³¹Ajinata Josafatqa Judá aylluta kamacherqa. Kamachiyta qallarishajtenqa kinsa chunka phishqayoj watasniyoj karqa. Jerusalempitaj iskay chunka phishqayoj watasta kamacheqa. Mamampataqa Azuba sutin karqa, payqa Silhej wawan karqa.

³²Josafatqa tatan Asa jina cheqanta purerqa. Ruwasqasnimpis cheqan karqanku Señorpa rikuynimpeqa.

³³Chaywampis lomas patapi wasisqa mana wijch'usqaschu karqanku. Aylloqa manaraj kallpachasqarajchu kasharqa ñaupa tatasninkoj Diosninta qhatinankupaj.

³⁴Kausayninmanta wakin willaykunasqa qelqasqa kashan Hananej wawan Jehujpa librompi, chaytaj Israelpa reyesnimpa librompi kashan.

³⁵Kay imasmanta qhepatataj Judáj reynin Josafatqa ujchakorqa Israelpa reynin Ocoziaswan, payqa sajra kausayniyoj karqa.

³⁶Yanapanakorqankutaj barcosta ruwaypi Tarsisman rinankupaj, chaykunatataj ruwarqanku Ezion-geberpi.

³⁷Chaypacha Maresamanta Dodavaj wawan Eliozer parlarqa Josafatpa contrampi kay willayta: Chay ruwasqasniykita Señor t'unarparenqa Ocoziaswan yanapachikusqaykirayku. Jinataj chay barcosqa llimphuta t'unarparikorqanku, manataj Tarsisman riyta aterqankuchu.