Read Quechua Bolivia DC Bible 2 CRÓNICAS 21 Bible Online

2 CRÓNICAS 21 - Quechua Bolivia DC Bible bible

2 CRÓNICAS 21

¹Josafat wañuporqa, ñaupa tatan Davidpa llajtampitaj p'ampasqa karqa. Paypa cuentanmantataj wawan Jorám kamacherqa.

²Jorampa wauqesnin Josafatpa wawasnin karqanku: Azarías, Jehiel, Zacarías, Micael, Sefatias ima. Tukuy paykunaqa Judáj reynin Josafatpa wawasnin karqanku.

³Tatankoqa paykunaman ashkha imasta waqesqa, qorimanta kajta, qolqemanta kajta, waj valorniyoj kaj imastapis. Qollarqataj jark'achisqa llajtastapis Judá jallp'api kajkunata. Chaywampis rey jina kamachinataqa Joramman qoporqa kuraj qhari wawan kasqanrayku.

⁴Joramtaj, tatampa tiyanampi kamachinampaj allinta tiyaykukuspañaqa tukuynin wauqesninta cuchillowan wañuracherqa, ajinallatataj Israelmanta wakin kamachejkunatapis.

⁵Kamachiyta qallarishajtenqa kinsa chunka iskayniyoj watasniyoj karqa, pusaj watastataj Jerusalempi kamacherqa.

⁶Payqa qhatirerqa Israelpa reykunasnimpa kausayninta, jinataj Acabpa ayllunmantapis, warmenqa Acabpa ayllunmanta kasqanrayku. Jinamanta paypa ruwasqasnenqa mana allinchu karqa Señorpa rikuynimpeqa.

⁷Señortaj mana tukuchiyta munarqachu Davidpa mirayninmanta kajkunataqa, Davidwan tratota ruwasqanrayku, nisqanraykutaj payman wawanmampis uj k'anchana jap'ichisqa mirayninkupi k'anchakunallantapuni.

⁸Joram kamachishajtenqa, Edomqa Judáj contrampi oqharikorqa, paykunaqa uj reyta ajllakorqanku.

⁹Chaypacha Joramqa soldados kamachejkunasninwan khuska rerqa maqanakupaj carretasninwan ima. Paywan maqanakunapaj carretasnimpa kamachejkunasninwan imaqa ch'isin jatarikuspa maqanakorqanku edonitaswan muyuykuchikusqankumanta llojsinankupaj.

¹⁰Edomtaj chaymantapacha kunankama Judamanta librakorqa. Chay tiempollapitaj Libna llajtapis Jorampa atiyninmanta librakorqa, ñaupa tatasninkoj Diosninta saqerparisqanrayku.

¹¹Chay jawaqa Judá orqopi lantispaj wasista jataricherqa, pay juchayoj karqa Jerusalempi tiyakojkuna Señormanta t'aqakapunankupaj, jinataj Judapi tiyakojkunapis Señorpa contrampi juchallikunankupaj.

¹²Chaypachataj Joramqa, profeta Eliasmanta uj cartata jap'erqa, chaypitaj nerqa: Ñaupa tatayki Señor Diosnin nisunki: Mana qanqa tatayki Josafatpa ñankunasnimpichu purinki, nitaj Judáj reynin Asaj ñankunasnimpichu.

¹³Manachayqa Israelpa reykunasnimpa ñankunasnimpi purinki, qan juchayoj karqanki, Judá jinataj Jerusalempi tiyakojkunapis Señormanta t'aqakunankupaj, imaynatachus ruwarqa Acabpa ayllun ajinata. Chay jawaqa hermanosniykita qanmanta aswan allin runasta wañuracherqanki.

¹⁴Chayrayku Señorqa may jatuchaj jasut'iykunata apachimonqa, llajtaykiman, qhari wawasniykiman, warmisniykiman, jinataj tukuy kapuyniyki patamanwan.

¹⁵Qampa pataykimantaj ashkha onqoykunasta apachimonqa. Wijsaykimanta onqosqa rikhurinki, mana usqhayta thañisqanraykutaj ch'unchulisniyki jawaman llojsinankama onqonki.

¹⁶Chaypacha Señorqa ruwarqa filisteoswan, arabeswan, Etiopiaj qayllanmanta arabeswan phiñarikunankuta Jorampa contrampi.

¹⁷Chayraykutaj Judaman rerqanku, tukuy jallp'amantaj junt'aykorqanku, apakaporqankutaj reypa palaciompi tukuy imas kajta tarisqankuta, wawasninkuta, warmisninkutawan. Joacaz sullk'a kaj wawallan qhepakorqa.

¹⁸Chaymanta qhepamantaj Señorqa jasut'erqa wijsanmanta mana thañikuyta atej onqoywan.

¹⁹Ashkha p'unchaykuna pasajtinña iskay watanman jinaqa chay onqoyrayku ch'unchulisnin jawaman llojsiporqanku, may sinch'i nanaykunawantaj wañuporqa. Llajtanrí chay jatun ninata mana jap'icherqachu payta yuyarispa, imaynatachus ñaupa tatasnimpaj ruwaj kanku jinata.

²⁰Kinsa chunka iskayniyoj watasniyoj karqa kamachiyta qallarishajtenqa, Jerusalempitaj pusaj watasta kamacherqa. Wañupusqanmantataj mana pipis waqarqachu. Davidpa llajtampitaj p'ampaykorqanku, jinapis mana reykuna p'ampakoj kanku chaypichu.