Read Quechua Bolivia DC Bible 2 CRÓNICAS 22 Bible Online

2 CRÓNICAS 22 - Quechua Bolivia DC Bible bible

2 CRÓNICAS 22

¹Jerusalempi tiyakojkunataj Jorampa cuentanmantaqa paypa sullk'a kaj wawan Ocoziasta reyninkupaj ajllakorqanku, imaraykuchus uj kutipeqa suwaswan arabeswan ima jamuspa jarankuman junt'aykusqanku, chaypitaj Judáj reynin Jorampa tukuy kuraj kaj qhari wawasninta wañurparichisqanku. Jinamanta Judáj reynin Jorampa wawan Ocoziasqa kamachiyta qallarerqa.

²Ocozías kamachiyta qallarishajtenqa iskay chunka iskayniyoj watasniyoj karqa, Jerusalempitaj uj watata kamacherqa. Mamampataqa Atalía nisqa sutin karqa, payrí Omrej wawan karqa.

³Ocoziasqa Acabpa ayllumpa ñankunasnillampitaj purerqa sajrapi purinanta umachasqanrayku. Ocoziasqa sajra kajta ruwarqa Señorpa ñaupaqempeqa.

⁴Acabpa ayllun Ocoziaspa tatan wañupojtinkama, paykunaqa umacharqanku sajra kajta ruwananta mana allin rinampaj.

⁵Paykuna umachasqankuraykutaj Ocoziasqa Israelpa reynin Acabpa wawan Joramwan ujchakorqa, maqanakojtaj rerqa Siriaj reynin Hazaelpa contrampi Galaadpi kashan Ramot chay llajtaman. Chaypitaj sirios Jotamtaqa nanarparichisqanku.

⁶Joramqa Jezreelman kutimporqa nanasqasninta jampichikoj, Ramot llajtapi Siriaj reynin Hazaelwan maqanakushajtinku nanachikusqasninta. Chaypacha Ocoziasqa Jezreelman rerqa Joramta waturikoj onqosqa tarikusqanrayku.

⁷Joramta waturej jina Ocozías wañuchisqa kananqa Diosmanta jamorqa. Chayaytawankama Ocoziasqa Joramwan llojserqa Nimsej wawan Jehuwan tinkumoj. Jehutarí Diospuni ajllasqa Acabpa ayllumpi kajkunata tukuchinampaj.

⁸Maypachachus Jehoqa Acabpa ayllumpa contrampi justiciata ruwashajtin, Judamanta kurajkunata, jinataj Ocoziaspa ayllusnintawan paypa kamachimpi kasharqanku chaykunata tarispa, Jehoqa wañurparicherqa.

⁹Ocoziasta mask'aspataj Samariapi pakasqata tarerqanku, jap'ispataj Jehuman aparqanku, chaypitaj Jehoqa wañucherqa. P'ampaykorqankutaj Josafatpa wawan kasqanrayku, Señorta cheqamanta mask'asqanrayku. Jinamanta manaña pipis qhepakusqachus Ocoziaspa ayllunmanta kajkunamanta rey kanankupaj jinaqa.

¹⁰Ocoziaspa mamam Ataliaqa wawan wañusqanta yachaspa, rispa Judamanta tukuy ayllunta wañurachimorqa.

¹¹Josaba rey Jorampa warmi wawantaj Ocoziaspa wawan Joasta orqhorqa chay reypa wawasninta wañurachishajtinku, wasi ukhumantaj uywaqentawan khuskata wisq'aykorqa Ataliamanta pakaykuspa. Jinamanta mana wañucherqankuchu. Chaytaqa rey Jorampa warmi wawan Josaba ruwarqa. Payqa Ocoziaspa hermanan karqa, Joadaj warmintaj.

¹²Joastaj paykunawan khuska sojta watasta pakasqa kasharqa Señorpa yupaychana wasimpi. Chaykamataj Atalía Judá naciompi kamachisharqa.