Read Quechua Bolivia DC Bible 2 CRÓNICAS 23 Bible Online

2 CRÓNICAS 23 - Quechua Bolivia DC Bible bible

2 CRÓNICAS 23

¹Qanchis kaj watapitaj Joiadaqa kallpachakuspa pachaj soldadosta kamachejkunata wajyachimorqa: Jerohampa wawan Azariasta, Johanampa wawan Ismaelta, Obedpa wawan Azariasta, Adaíaj wawan Maasiasta, Zincrej wawan Elisafatta ima. Chaykunawantaj uj tratota ruwarqa.

²Paykunaqa Judata purimuspa tantaykamorqanku levitasta tukuy Judá llajtasmanta, jinataj Israelmanta wasi ayllusta kamachejkunasninkutapis, tukuyninkutaj Jerusalenman rerqanku.

³Chaypitaj tukuy tantakojkunaqa, reywan uj tratota ruwarqanku, Diosta yupaychana wasimpi. Joiadataj nerqa: Kaypi qankunawan reypa wawan kashan. Paymin reyqa kanan tiyan, imaynatachus Señorqa Davidpa mirayninmanta parlasqanman jina.

⁴Qankuna kay jinata ruwankichej: Tukuy qankunamanta kinsa t'aqasmanta ujnenqa, sacerdoteswan levitaswan, samakuna p'unchaypi sirvinaykichej chaykunaqa, yupaychana wasej punkusninta qhawaj qhepakunkichej.

⁵Ujnin t'aqataj reypa palaciompi qhepanqanku, ujnin t'aqataj Cimiento nisqa punkupi kanqanku. Chaykamataj tukuy aylloqa Señorta yupaychana wasej patiompi kashanqanku.

⁶Amataj pipis yupaychana wasiman yaykuchunchu, manachayqa sacerdoteswan, levitaswan serviciopi kashanku chaykunalla. Paykunalla yaykuyta atenqanku Señorpaj llimphuchasqas kasqankurayku, tukuy ayllutataj Señorpa ñaupaqempi qhawaspa kashanqanku.

⁷Levitasqa reypa muyuynimpi muyurisqata sayaykukorqanku, sapa ujpis makisninkupi armasnintin. Pillapis yupaychana wasiman yaykuyta munajqa wañonqa. Rey maytapis rejtenqa paywan khuska renqanku.

⁸Levitasqa jinataj Judamanta runaspis sacerdotej Joiadaj tukuy kamachisqanman jina ruwarqanku. Sapa ujpis kamachejkunamantaqa runasninkuta kamachiyta qallarerqanku, samakuna p'unchaypi qhawaj yaykojkuna, chaymanta llojsejkunapis, sacerdote Joiadaqa mana saqejchu ripojta mit'ankuta junt'ajkunatapis.

⁹Chaypacha Joiadaqa chay pachaj soldadosta kamachejkunaman jaywarqa Davidpa armasninta, lanzasta, tukuy laya escudosta, Diospa yupaychana wasimpi kasharqanku chaykunata.

¹⁰Chaymantataj yupaychana wasej ujnin k'uchunmanta ujnin k'uchunkama altarpa muyuynimpipis sinrullata sayaykucherqa sapa ujtapis lanzasniyojtakama reyta chaywan jark'anankupaj.

¹¹Chaypacha Joiadawan wawasninwan ima reypa wawanta orqhomorqanku, pillutataj umanman churaykorqanku, Diospa leyninmanta uj librotataj qorqanku. Umanman aceitewan jich'aykuytawantaj qhaparerqanku: Kausachun reyninchejqa, nispa.

¹²Ataliataj uyarispa chay runas qhaparisqankuta, correykachaspa, qhaparispataj reyta jatunchasqankuta, rerqa Diosta yupaychana wasiman, tukuyninku tantasqas kasharqanku chayman.

¹³Chaypitaj reyta rikorqa, yaykuna chaynejpi sayantan qayllampi sayashajta. Ladompitaj kasharqanku kamachejkunasnin, trompetasta waqachejkunaspis. Tukuy runastaj may kusisqas trompetasta waqachispa, takejkunapis tocanasninkuwankama takichisharqanku yupaychana takiykunasta. Chaypacha Ataliaqa p'achanta llik'ikorqa, qhaparerqataj: Wasanchawanku, wasanchawanku!, nispa.

¹⁴Sacerdote Joiadataj soldadosta kamachejkunata orqhomuspa nerqa: Chay ukhumanta jawaman orqhoychej, payta qhatimojtarí espadawan wañuchiychej! Sacerdoteqa kamachisqa Señorta yupaychana wasi ukhupi ama wañuchinankuta.

¹⁵Paykunaqa Ataliata jap'iytawan reypa palacionman caballos yaykuna punkunejta orqhomorqanku, chaypitaj wañurparicherqanku.

¹⁶Chaymantataj Joiadaqa uj tratota ruwacherqa, tukuy aylluta reytawan ima, paykuna Señorpa ayllun kanankupaj.

¹⁷Chaymantataj tukuyninku rerqanku Baalpa yupaychana wasinman, phirirparimorqankutaj, t'unaraspa altaresninkuta, lantisninta ima. Baalpa sacerdoten Matantataj altarespa ñaupaqempi wañucherqanku.

¹⁸Chaymantataj Joidaqa yupaychana wasipi ruwananta churarqa, sacerdotespa, jinataj levitaspa makisninkupi, imaynatachus Davidqa yupaychana wasipi mit'asta rak'isqanman jina, mit'asninkuman jina yupaychana wasipi sirvinankupaj, uywata ñak'aspa Señorpaj q'olachinankupaj, Moisespa leynimpi escribisqa kasqanman jina, may kusiywan takirispa imaynatachus rey David nerqa jinata.

¹⁹Jinallatataj Señorpa yupaychana wasinman yaykuna punkusman qhawajkunata churarqa, mana ni pi ch'ichipaj qhawasqa runa ni maynejta yaykunampaj.

²⁰Chaymantataj chay soldadosta kamachejkunata pusariykukuspa allichaj runasninta, llajtapi kamachejkunasta, tukuynin runastapis reyta pusarqanku yupaychana wasimantapacha reypa palacionkama, jatun kaj punkunejtataj yaykorqanku. Chaymantataj reypa tiyananman reytaqa tiyaykucherqanku.

²¹Tukuynin ayllu runastaj kusikorqanku. Atalía espadawan wañuchisqa kasqanmantaqa chay llajtapeqa mana ima ch'ajwapis karqachu.