Read Quechua Bolivia DC Bible 2 CRÓNICAS 24 Bible Online

2 CRÓNICAS 24 - Quechua Bolivia DC Bible bible

2 CRÓNICAS 24

¹Joasqa qanchis watasniyojllaraj karqa kamachiyta qallarishajtenqa. Jerusalempitaj tawa chunka watasta kamacherqa. Mamampataqa Sibia sutin karqa, payqa Beersebamanta karqa.

²Joaspa wawasnenqa allin cheqan karqanku Señorpa rikuynimpeqa, Joiada sacerdote kausanankama.

³Joiadaqa iskay warmistawan casaracherqa. Chaykunapitaj qhari wawasnin, jinataj warmi wawasnimpis karqanku.

⁴Chaymanta mana unayninmanchu Joasqa, Señorpa yupaychana wasinta allinchachiyta munarqa.

⁵Chaypajtaj tantaykucherqa sacerdotesta, levitasta, nerqataj: Judáj llajtasninnejta purimuychej, israelitasmantataj qolqeta oqharimuychej, chaywan sapa wata Señorpa yupaychana wasinta allinchachinapaj. Usqhaytataj kay nisqayta ruwamuychej, nispa. Jinapis levitasqa mana usqhaytachu chayta ruwarqanku.

⁶Chaypacha reyqa kuraj kaj sacerdote Joiadata wajyachispa nerqa: Imaraykutaj mana mañarqankichu levitas apamunankuta Judamanta, Jerusalenmantawan runas qonanku karqa chayta, Señorpa kamachin Moisés jinataj tukuy israelitaspis kamacherqanku qonankuta ruwanapaj Señorwan parlana toldota.

⁷Atalía, chay sajra warmi, jinataj wawasnimpis Diospa yupaychana wasinman yaykuspa, orqhomusqanku chay tukuy kajta Baal nisqa lantisninkuta yupaychanankupaj.

⁸Chaypacha reyqa ruwacherqa uj cajata, chaytataj Señorpa yupaychana wasej punkunmanta jawaman churarqanku.

⁹Chantataj willacherqanku Judapi, jinataj Jerusalempipis Señorman apamunankuta, Señorpa kamachin ch'in pampapi kashajtinku qonankuta nerqa chayta.

¹⁰Tukuy kamachejkunaqa, tukuy ayllu runaspis kusiywan jamorqanku, chay qonankuta churanankupaj, chay cajonman junt'achinankukama.

¹¹Levitasqa apaj kanku chay cajonta reypa yanapajninman, ashkhaña qolqe kasqanta rikuspataj, reypa qelqerin jamoj kuraj kaj sacerdote yanapajnimpis jamullajtaj, chaykunataj chay cajata thalliytawankama watejmanta kikinman churallarqankutaj. Ajinata sapa día ruwarqanku, ashkha qolqeta jinamanta tantarqanku.

¹²Reywan, Joiadawan chay qolqetaqa jaywarqanku yupaychana wasita jallch'achinapaj churasqas karqanku chaykunaman, chay qolqewantaj mink'anankupaj rumi ch'eqojkunata, carpinterostawan. Jinallatataj fierrowan, jinataj broncewan llank'ajkunatapis, Señorpa yupaychana wasinta allinchachinankupaj.

¹³Jinamanta paykunaqa llank'aj churakorqanku, makisninkupitaj allinchana llank'ayqa ñaupajman rerqa. Watejmanta allicharqanku Señorpa yupaychana wasinta imaynatachus qallariymantapacha planospi kasqanman jina, sumaj ruwasqatataj saqerqanku.

¹⁴Maypachachus allinchachiyta tukorqanku chaypacha chay puchoj qolqeta aparqanku reyman Joidamanwan, paykunataj chay qolqewan ruwacherqanku Señorpa yupaychana wasimpaj serviciosta yupaychaykunaspaj kajta, jinataj uywasta ñak'aspa q'olachinapajpis; jatuchaj cucharasta, waj imastapis, tukuyta qolqemanta ruwacherqanku. Joiada kausashajtillanrajqa Señorpa yupaychana wasimpeqa ñak'asqa uywasta q'olachillajpuni kanku.

¹⁵Jinapis Joiadaqa viejoyaporqa, ñapis ashkha watasniyojña kaspari wañuporqa. Pachaj kinsa chunka watasniyoj wañuporqa.

¹⁶Paytaqa Davidpa llajtampi p'amparqanku, reykunaj ladompi sumaj allinta ruwasqanrayku, Israel aylluwan, Diosninwan, jinataj yupaychana wasiwampis.

¹⁷Joiada wañupusqanmanta qhepamantaj, Judamanta kamachejkuna jamorqanku reyman k'umuykukoj. Paytaj chay umachasqankuta jap'ikorqa.

¹⁸Paykunaqa ñaupa tatasninkoj Señor Diosninkoj yupaychana wasinta saqerparerqanku, Asera lantisman, waj lantismanwan yupaychaykunata qorqanku. Chay juchankuraykumari Señorqa phiñakorqa Judapaj, jinataj Jerusalempajpis.

¹⁹Chaywampis Señor kachamorqaraj profetasninta Payman kutirichinankupaj. Chay runastaj mana kasorqankuchu chay profetaspa k'amisqasninkutaqa.

²⁰Chaypacha Joiadaj wawan Zacariasman Diospa Espíritun jamorqa, uj moqonejpi sayaykuspataj ayllunman nerqa: Diosqa nin: Imaraykutaj qankunaqa mana kasunkichejchu kamachisqasniytari? Jinamanta qankuna kikiykichej llakiyniykichejta mask'ashankichejri? Noqata saqerpariwasqaykichejrayku, noqapis qankunata saqerparisqaykichej!

²¹Jinapis paykunaqa Zacariaspa contrampi churakuspa, reypa kamachiyninrayku ch'anqaykorqanku Señorpa yupaychana wasimpa patiompi.

²²Rey Joasqa qonqapusqa Zacariaspa tatan Joiada khuyakoj sonqowan payta qhawasqanmantaqa. Wañucherqataj, Joiadaj wawan Zacariastaqa, paytaj manaraj wañushaspa qhaparerqa: Señor kayta rikumuchun, cuentatataj mañachun!

²³Wata muyuykamojpi Siriamanta soldadosqa Joaspa contrampi maqanakoj jamorqanku, Judakama, Jerusalenkamataj chayamuspa chay naciompa tukuy kuraj kamachejkunasninta wañuracherqanku, tukuy kajmanta qhechuraspataj Damascoj reyninman apacherqanku.

²⁴Siriamantaqa pisi soldadoslla chayamusqankupis, jinapis chaykunaman Señorqa may ashkha soldadosta jaywaykorqa, ñaupa tatasninkoj Señor Diosninta qonqarparipusqankurayku. Jinamanta Joasqa juchanman jina jasut'isqa karqa.

²⁵Siriamanta soldados ripojtinku, reyqa nanaykunasninwan sinch'i onqosqa qhepakorqa, yanapajkunasnintaj contrampi oqharikorqanku Joiadaj wawan Zacariasta wañuchisqanrayku, kikin puñunampitaj wañurparicherqanku. Chaymantataj p'ampaykorqanku Davidpa llajtampi, jinapis mana reykunaspa p'ampakunankupichu.

²⁶Reypa contrampi oqharikojkunaqa karqanku Zabat, paypa mamanqa Simeat amonita karqa. Jinataj Jozabadpiwan paypa mamanqa Simrit moabita karqa.

²⁷Joaspa wawasninmanta impuestomanta ashkhata jap'isqanta, Diospa yupaychana wasinta watejmanta allinchachisqanmantapis, tukuy chayqa qelqasqas kashanku reykunasmanta willajkuna librospi. Paypa qhepantataj wawan Amasías kamacherqa.