Read Quechua Bolivia DC Bible 2 CRÓNICAS 25 Bible Online

2 CRÓNICAS 25 - Quechua Bolivia DC Bible bible

2 CRÓNICAS 25

¹Amasiasqa iskay chunka phishqayoj watasniyoj karqa, kamachiyta qallarishajtenqa, Jerusalempitaj iskay chunka isq'onniyoj watasta kamacherqa. Mamampataqa Joadán sutin karqa, payqa Jerusalenmanta karqa.

²Amasiaspa ruwasqasnenqa cheqan karqanku Señorpa rikuynimpeqa, chaywampis mana tukuy sonqowanchu ruwarqa.

³Amasías rey kaynimpi allin sayasqaña kaspaqa, tatanta wañucherqanku chay kamachista wañuracherqa.

⁴Manataj chaykunaj wawasnintaqa wañuracherqachu, Moisespa leynimpi qelqasqa kasqanman jina Señor kamachisqa: Tatasqa mana wañuyta atinkuchu wawasninkoj ima juchata ruwasqankumantaqa, nillataj wawasnimpis wañuyta atinkuchu tatasninkoj ruwasqasninkumantaqa, manachayqa sapa ujpis juchasninrayku wañonqa.

⁵Amasiasqa tantaykorqa Judamanta, Benjaminmantawan tukuy runasta familiasninkuman jina, jinataj tantasqas karqanku soldados kamachejkuna kamachiyninkupi kanankupaj. Chaymantataj yuparqa iskay chunka watasniyojmanta pataman, kasqankutaj tukuypi kinsa pachaj waranqa ajllasqa soldados maqanakupaj wakisqas, lanzasta, escudostawan jap'iyta yachajkuna.

⁶Chay jawaqa Israelmanta pachaj waranqa soldadostawan mink'amorqa, kinsa waranqa kinsa pachajniyoj kilos qolqewan.

⁷Diospa uj runantaj payman qayllaykuspa nerqa: Reyníy, qanwan ama tantakamuchunkuchu Israelpa soldadosnenqa, Señorqa mana Israelwanchu kashan, nitaj Efrainmanta kajkunawampischu.

⁸Paykunaj yanapayninwanchus soldadosniykita maqanakupaj kallpachayta munanki chayqa, Dios urmachisonqa enemigoykej ñaupaqempi, imaraykuchus Diospataqa tiyan atiynin yanapanampaj, jinataj urmachinampajpis.

⁹Amasiasqa tapurerqa Diospa runanta: Imanasajtaj kinsa waranqa kinsa pachajniyoj kilos qolqeta Israel soldadosmanta pagasqaymantari? Diospa runantaj kuticherqa: Señorpataqa ashkha atiynin tiyan chay qolqemanta aswan ashkhataraj qonasumpaj.

¹⁰Chaypacha Amasiasqa Efrainmanta soldados paykunawan tantakoj jamusqanku chaykunata t'aqarqa, wasisninkumantaj kachaporqa. Paykunataj mayta phiñarikorqanku Judáj contrampi. Wasisninkumantaj may phiñasqas kutiporqanku.

¹¹Amasiasqa kallpachakorqa, soldadosnintataj pusarqa kachi valle nisqaman. Chaypitaj Seirmanta kajkunata chunka waranqa runasta wañuracherqa.

¹²Chay jawaqa Judamanta kajkunaqa presosta jap'erqanku chunka waranqa runastawan, aparqankutaj uj chhankarara orqo puntaman, chaymantapachataj tanqaykamorqanku tukuyninkutaj t'unakorqanku.

¹³Chaykamataj Amasiasqa chay soldadosta kachaporqa amaña maqanakuman paykunawan rinankupaj. Chaykunaqa wasisninkuman ripoj jina Judáj llajtasninman junt'aykorqanku, Samariamanta Bet-horonkama, wañucherqankutaj kinsa waranqa runasta, may ashkha imastataj suwaspa apakaporqanku.

¹⁴Amasiastaj, Edonmanta kajkunata atipasqanmanta kutimpushaspa Seirpa dioskunasninta apakamorqa; paypa dioskunasnimpaj jinataj jap'erqa, yupaycharqataj, inciensotapis q'osñicherqa.

¹⁵Señortaj Amasiaspa contrampi phiñakorqa, kacharqataj uj profetata nimunampaj: Imaraykutaj chay naciompa dioskunasninman chimparqanki, paykunaqa llajtankutapis librayta mana atishajtinkuri?

¹⁶Profeta kayta nishajtintaj reyqa nerqa: Reyta umachanaykipajchu qantaqa ajllakorqayku? Ch'inlla kakuy. Chayri munankichu wañuchinasunkuta? Profetaqa mana astawan imatapis parlarqañachu, chaywampis nerqa: Yachani Diosqa nisqantaña, qanta wañuchinasunta chay ruwasqaykirayku, nisqaytapis mana jap'ikusqaykirayku.

¹⁷Judáj reynin Amasiastaj kasorqa wajkunaspa umachasqasninkuta, kacharqataj Israelpa reynin Joasman, payqa Joacazpa wawan karqa, Jehój allchhintaj, kay jinata nichispa: Jamuriy ari, uya pura parlarikusunchej, nispa.

¹⁸Paytaj kay jinata kuticherqa: Libanomanta uj khishkarara juch'uy sach'a kasharqa, Libanomanta cedroman nichispa: Qoy qhari wawayman chay warmi wawaykita warmin kanampaj. Jinapis uj jatunmanta animal chayninta pasaspa khishkata, sach'ataqa p'altarparerqa.

¹⁹Qan ninki edomitasta atipasqaykita, chaytaj umaykita oqharichishasunki, astawan jatunchasqa kaytataj munashanki. Aswan walej kanman wasillaykipi qhepakunayki. Imaraykutaj mask'anki qampa llakiyniykita, jinataj Judáj llakiynintapisri?

²⁰Chaywampis Amasiasqa mana kasuyta munarqachu, Dios jinata munasqanrayku, Joaspa makisninman paykunata jaywaykunanrayku, Edompa dioskunasninman chimpaykusqanrayku.

²¹Chaypacha Joasqa jamorqa Judáj reynin Amasiaswan maqanakamunampaj Judá jallp'api kasharqa Bet-semes llajtapitaj tinkorqanku.

²²Judaqa Israelwan atipachikorqa, sapa ujtaj wasisninkuman ayqekorqanku.

²³Israelpa reynin Joastaj Judáj reynin Amasiasta presota jap'erqa Bet-semes llajtapi. Chaymantataj Jerusalenman aparqa, chay llajtaj perqantataj q'asarparerqa pachaj pusaj chunkayoj metrosta, Efraimpa punkunmantapacha Esquina sutiyoj punkukama.

²⁴Chay jawaqa tukuy kaj qorita qolqetapis, Diospa yupaychana wasimpi kasharqanku chay tukuy imasta jap'ikaporqa. Chaykunaqa Obed-edompa makimpi kasharqanku, jinataj reypa palaciompa kaj qhapaj imastawan. Wakin runasta presosta jina jap'iraytawantaj Samariaman kutiporqanku.

²⁵Judáj reynin, Joaspa wawan Amasiasqa chunka phishqayoj watastaraj kausarqa, Israelpa reynin Joacazpa wawan Joas wañupusqanmantaqa.

²⁶Amasiasmanta wakin willaykunas qallariymanta tukukuyninkamaqa qelqasqas kashanku, Judajpamanta, jinataj Israelpamantawan reykunasninkumanta willaj libropi.

²⁷Amasías Señormanta t'aqakapojtinkamataj Jerusalempi oqharikorqanku Amasiaspa contrampi, payqa Laquisman ayqerqa, qhatiykorqankutaj chay llajtakama, chaypitaj wañurparicherqanku.

²⁸Chaymantataj ayanta caballospi aparqanku, ñaupa tatasnimpa covachampitaj p'ampamorqanku Davidpa llajtampi.