Read Quechua Bolivia DC Bible 2 CRÓNICAS 26 Bible Online

2 CRÓNICAS 26 - Quechua Bolivia DC Bible bible

2 CRÓNICAS 26

¹Chaypacha Judamanta tukuy ayllutaj Uziasta jap'ispa reyninku kanampaj churarqanku, tatan Amasiaspa cuentanmanta. Chaypacha Uziasqa chunka sojtayoj watasniyoj karqa.

²Paymin tatampa wañupusqanmanta qhepamanqa jataricherqa ujtawan Elat llajtata. Chaytataj watejmanta Judá ayllupaj jap'erqa.

³Uziaspataqa chunka sojtayoj watasnin karqa kamachiyta qallarishajtin, Jerusalempitaj phishqa chunka iskayniyoj watasta kamacherqa. Mamampataqa Jecolías sutin karqa, payqa Jerusalenmanta karqa.

⁴Uziaspa ruwasqasnenqa cheqan karqanku Señorpa rikuynimpeqa, imaynatachus tatan Amasías ruwarqa chayman jina.

⁵Zacarías kausashajtenqa Diosta mask'aj churakorqa. Zacariasqa yachacherqa Diosta manchachikuna kasqanta. Diospa qayllampi kanankama, Señorqa payta yanaparqa.

⁶Uziasqa filisteospa contrampi maqanakoj llojserqa, perqasninkutataj thuñiramorqa, Gat llajtajta, Jabniajta, Asdodpata ima, oqharicherqataj llajtasta Asdodpi, jinataj filisteospa jallp'asninkupipis.

⁷Dios yanaparqa filisteospa contrankupi rejtin, Gur-baalpi tiyakorqanku chay arabespa contrankupi rejtinkupis, meunitaspa contrankupipis.

⁸Amonitasqa Uziasman impuestota pagaj kanku. Uziaspa sutenqa may uyarisqa karqa Egipto jallp'anejkama, imaraykuchus atiyniyojmampuni tukusqa.

⁹Jerusalempipis torresta jatarichillarqataj Esquina Punku nisqa patapi, jinataj valleman llojsina nisqa punku patapi, chay waj esquinapiwan, chay tukuytataj sumaj perqaswan jark'aykucherqa.

¹⁰Oqharillarqataj torresta, ch'in pampanejpi, allarqataj ashkha pozosta. Ashkha uywasniyoj kasqanrayku chay ura pampasnimpi, jinataj orqosnejpipis. Campospi llank'aj runasnimpis kallarqankutaj, uvas sach'asniyoj huertasnimpi chay orqosnejpi, pampasnejpi huertasnimpipis, imaraykuchus payqa chajra sonqo karqa.

¹¹Uziaspataqa kallarqataj maqanakupaj wakisqa soldadosnin, paykunaqa llojsej kanku maqanakusman, t'aqaspi rak'inasqa, listata ruwasqankuman jina, reypa qelqerin Jeielnejta, chanta Masiasnejta, Hanasiaspa kamachimpa yanapayninwan. Kay Hanasiasqa reypa ujnin kaj soldadosnimpis kamachejnin karqa.

¹²Wapu maqanakojkuna soldados familiapi kamachejkunaqa, tukuypi karqanku iskay waranqa sojta pachajniyoj.

¹³Paypa kamachiynimpitaj kinsa pachaj qanchisniyoj waranqa phishqa pachajniyoj maqanakupaj wakisqa soldados karqanku kallpayoj wapu runas reyta yanapanankupaj maqanakuyninkupi.

¹⁴Uziasqa wakicherqa tukuynin soldadospaj, escudosta, lanzasta, monterasta, sinch'i pechoquerasta, wach'inasta, rumista choqanapaj warak'astawan.

¹⁵Chay jawaqa Jerusalempi ruwacherqa maqanakupaj nisqa sumaj yachaywan ruwasqa maquinasta, chaykunastataj torres pataman perqaspa, altosninman ima churaspa, chaykunawan ch'anqanampaj flechasta jatuchaj rumistawan ima. Jinamanta sutenqa may karukama uyarisqa karqa. Diosqa t'ukunapaj jina yanaparqa, may atiyniyoj rikhurinankama.

¹⁶Rey kasqanwan kallpachaykukojtinñaqa sonqompi wapuykachayta qallarerqa, chayraykutaj mana allinchu rerqa, Señor Diosnimpa contrampi oqharikorqa, Señorpa yupaychana wasinman inciensota q'osñichej yaykorqa chay incienso altarpi.

¹⁷Paypa qhepantataj sacerdote Azarías yaykorqa, Señorpa pusaj chunka wapu sacerdotesnimpiwan.

¹⁸Paykunaqa reywan tinkuspa nerqanku: Rey Uzías, Señorman inciensota q'osñichinanqa mana qampa ruwanaykichu kashan, chayqa Aarompa ayllunmanta kajkuna sacerdotespa ruwananmin. Paykunaqa chayta ruwanankupaj t'aqasqas kanku. Qanqa llojsiy chay Diospaj t'aqasqa cheqamanta, imaraykuchus qanqa juchallinki Señorpa contrampi, chayrayku Diosqa mana allimpajchu qhawasonqa.

¹⁹Uziastaj, incienso q'osñichinata makimpi jap'isharqa, q'osñichinampaj, chaypacha chay sacerdotespaj phiñarikorqa. Chay kikin ratotaj Señorpa yupaychana wasin ukhupi kashajtin, incienso altar chaynejpi, sacerdotespa ñaupaqempitaj, frentempi lepra onqoy jatarerqa.

²⁰Kuraj kaj sacerdote Azarías, sacerdoteswan imaqa, payta qhawarispa rikorqanku onqoyniyoj kashasqanta, chay ratopacha chay ukhumanta qharqomorqanku. Rey kikimpunipis ushqhayta llojsimuyta munarqa jinata Señor jasut'isqanrayku.

²¹Rey Uziasqa wañupunankama lepra onqoyniyoj karqa, jinamanta reyqa sapan kausakorqa waj wasipi, Señorpa yupaychana wasinmantaj mana yaykunanta munarqankuchu, wawan Jonatantaj cuentanmanta kamacherqa, tukuy ayllutataj kamacherqa.

²²Uziasmanta wakin willaykunasta qallariymanta tukuykuyninkamaqa, Amozpa wawan Isaías profeta qelqarqa.

²³Uzías wañupojtintaj reypa jallp'ampi, ñaupa tatasnimpi p'ampakunankupi p'amparqanku, lepra onqoywan kasqanrayku. Paypa cuentampitaj kamacherqa wawan Jotam.