Read Quechua Bolivia DC Bible 2 CRÓNICAS 29 Bible Online

2 CRÓNICAS 29 - Quechua Bolivia DC Bible bible

2 CRÓNICAS 29

¹Ezequiasqa kamachiyta qallarerqa iskay chunka phishqayoj watasniyoj kashaspa, Jerusalempitaj kamacherqa iskay chunka isq'onniyoj watasta. Mamanqa Zacariaspa warmi wawan Abi karqa.

²Ezequiaspa ruwasqasnintaj Señorpa rikuynimpeqa cheqampuni karqa, ñaupa tatan Davidpata jina.

³Payqa ñaupaj kaj watapi kamachishajtin, ñaupaj kaj killapi Señorta yupaychana wasej punkusninta kicharispa watejmanta allincharqa.

⁴Chaymantataj wajyachispa sacerdotesta levitasta ima, inti llojsimuynej plazapi tantacherqa.

⁵Nerqataj: Levitas uyariwaychej: Kunan llimphuchakuychej, Señor Diosnimpa wasintapis llimphuchallaychejtaj, ñaupa tatasniykichejpa Señornimpaj t'aqasqa cheqamanta tukuy ch'ichi kajta wijch'uychej.

⁶Imaraykuchus ñaupa tatasninchejqa mana cheqantachu purerqanku, may sajra kajtataj Señor Diosninchejpa ñaupaqempeqa ruwarqanku. Payta saqerparispa Señorpa tiyakunan wasita qhesacharqanku, manañataj qhawarerqankuchu.

⁷Yupaychana wasej ñaupaqen punkuntataj wisq'arqanku, k'anchanastapis wañuchiporqanku, yupaychana wasipitaj Israelpa Diosnimpaj manaña inciensota q'osñichiporqankuchu, ñak'asqa uywastapis mana q'olachiporqankuchu.

⁸Chayrayku Señorqa phiñakorqa, Judapaj Jerusalempajwan, may llakiyta saqerparin, tukuy chayta rikuspa t'ukunankupaj, asipayachikunankupajtaj, imaynatachus kikin ñawisniykichejwan rikushankichej jina.

⁹Chayraykumá tatasninchejqa maqanakupi wañorqanku, qhari wawasninchej, warmi wawasninchej, jinataj warmisninchejpis presos apasqas karqanku.

¹⁰Noqaqa niniña Israelpa Señor Diosninwan tratota ruwanayta, jinamanta phiñakuyninta noqanchejmanta t'aqanampaj.

¹¹Kunanqa, wawasníy, ama qhellasqa kaychejchu, Señorqa ajllasorqachej paypa ñaupaqempi kanaykichejpaj, Diospa wasimpi ruwanaykichejpaj, inciensota q'osñichinaykichejpajtaj.

¹²Levitas chay rato llank'ayta qallarerqanku chaykunaqa karqanku: Coatpa ayllunmanta kajkuna, Amasaejpa wawan Mahat, Azariaspa wawan Joel, Mirarimanta kajkuna, Abdej wawan Cis, Jehaleelpa wawan Azarías; Gersonmanta kajkuna Zimaj wawan Joa, Joaj wawan Edén ima.

¹³Elizafanmanta kajkuna ayllumanta Simriwan, Jehielwan ima; Asafmanta kajkuna Zacariaswan, Mataniaswan;

¹⁴Hemanmanta kajkuna Jehielwan, Simeiwan, Jedutunmanta kajkuna, Semaiaswan, Uzielwan ima.

¹⁵Ñaupajtaqa tantaykorqanku levita masisninkuta, tukuyninkutaj llimphuchakorqanku; chaymantataj yupaychana wasiman yaykorqanku llimphuchanankupaj reypa kamachisqanman jina, Señorpa nisqanman jinataj.

¹⁶Chaymantataj sacerdotesqa yupaychana wasiman yaykorqanku llimphuchanankupaj. Patiomantaj tukuy ch'ichista yupaychana wasi ukhupi tarisqasninkuta orqhomorqanku. Levitastaj chaykunata Cedrón wayq'oman aparqanku.

¹⁷Llimphucharakuyta qallarerqanku ñaupaj kaj killapi, ñaupaj kaj p'unchaypi. Chay killamanta pusaj p'unchaynimpitaj Señorta yupaychana wasej punkunman jamorqanku. Chay yupaychana wasitataj pusaj p'unchaypi llimphucharqanku. Chay killaj chunka sojtayoj p'unchaynimpajqa ñapis tukusqankuña.

¹⁸Chaymantataj rey Ezequiaspa palacio wasinman yaykuspa, nerqanku: Ña llimphuchayta tukuykuña Diospa wasinta, uywa wañuchisqata q'olachina altarta, imaschus kaypi ruwanapaj kajkunata, chay ukhupi t'antasta churanapaj mesatapis, imaschus chaypi ruwanapaj kajkunatawan.

¹⁹Jinallatataj, llimphuchaykuñataj chay tukuy imastachus rey Acaz kamachishaspa qhesacharqa Señorta saqerparisqanrayku. Kunantaj Señorpa altarnimpa ñaupaqempiña kashanku.

²⁰Rey Ezequiastaj tutamanta jatarikuspa chay llajtapi kamachejkunata tantaykorqa, Señorpa yupaychana wasinmantaj rerqa.

²¹Aparqankutaj qanchis waka uñasta, qanchis carnerosta, qanchis corderosta, qanchis cabritosta ima. Chaykunata aparqanku reypa ayllumpa juchallikusqanrayku jaywanankupaj, yupaychana wasirayku, jinataj Judá aylluraykupis. Reyqa kamacherqa Aarompa ayllunmanta kaj sacerdotesta, rikuchikusta altar patapi ruphachinanta.

²²Sacerdotestaj wachay waka uñasta wañucherqanku, yawarninta jap'ispataj chaywan altarta ch'ajchorqanku. Jinallatataj carneroswan, corderoswampis ruwarqanku.

²³Chaymantataj chay juchaj cuentanmanta, chivitosta, reypa ñaupaqenman, tukuy runaspa ñaupaqenmantaj aparqanku, paykunataj chay uywaspa patankuman makisninkuta churarqanku.

²⁴Chaymantataj sacerdotesqa chay uywasta wañucherqanku, yawarninta jap'ispataj altar pataman ch'ajchumorqanku juchasmanta jaywanata jina, tukuy Israelpa juchasninmanta perdonta tarinapaj. Imaraykuchus rey kamachisqa tukuy Israel ayllurayku jaywanankuta chay q'olachinapaj kajta, chay jucharayku kajtapis.

²⁵Rey Ezequiasqa Señorpa yupaychana wasinman churallarqataj levitasta platillosnintinta, salteriosnintinta, arpasnintinta ima, imaynatachus kamacherqa rey David, profeta Get, jinataj profeta Natampis. Chay kamachisqataqa Señorpuni qosqa profetasninnejta.

²⁶Levitasqa sayasqas kasharqanku, Davidpa tocanasninkuwankama, sacerdotestaj trompetaswankama.

²⁷Chaypacha Ezequiasqa kamacherqa altar patapi uywa wañuchisqata q'olachinankuta. Q'olachiyta qallarejtinkukamataj Señorta yupaychaspa takiytapis qallarillarqankutaj, trompetasta waqachiytapis, rey Davidpa tocanasta ruwasqasninwan ima yanapachikuspa.

²⁸Runastaj qonqoriykukuspa yupaycharqanku, taguiykunata takisharqanku. Trompetasta tocajkuna waqachisharqanku. Ajinata ruwarqanku chay q'olachiy tukukunankama.

²⁹Chay q'olachiyta tukojtinkukamaqa, reywan tukuy runaspiwan yupaychanankupaj qonqoriykukorqanku.

³⁰Chaymantataj rey Ezequías, jinataj kamachejkunapis levitasta kamacherqanku Señorta yupaychanankuta Davidpa takiykunasninwan, profeta Asafpa takiykunasnimpiwan. Paykunataj tukuy kusiywan ruwarqanku, qonqoriykukuspataj yupaycharqanku.

³¹Chaymantataj Ezequiasqa runasman nerqa: Qankunaqa ña Señorpaj llimphuchakunkichejña, qayllaykuychej uywa wañuchisqata apamuspa, agradecespa jaywanaswan ima Señorpa yupaychana wasimpaj. Chaypacha chay runasqa uywasta apamorqanku wañuchinankupaj, agradecespa jaywanastapis, pischus sonqonkupi khuyakuyniyoj kajkuna, chay q'olachinapaj jaywanasta apamorqanku.

³²Tukuy runas uywasta q'olachinapaj apasqankoqa karqanku qanchis chunka toros, pachaj carneros, iskay pachaj corderospiwan. Kay tukuyqa karqa Señorpaj q'olachinapaj.

³³Tukuynimpi jaywasqanku uywasqa karqanku sojta pachaj toros, kinsa waranqa ovejaspiwan.

³⁴Pisilla sacerdotes kasqankuraykutaj, q'olachinapaj kaj uywaspa qarasninta ch'uskiyta mana tukuchiyta aterqankuchu, chaynejta levitasqa hermanosninkuwan yanapachikoj kanku tukunankukama. Levitasqa llimphuchakunankupaj sacerdotesmanta nisqaqa aswan k'uchis karqanku.

³⁵Q'olachinasta jaywanaqa ashkhawanraj karqa, jinataj allinyakuy jaywanasmanta wiraswan, vinowan chay q'olachinaswan khuska jaywanaspiwan. Jinamanta Señorpa wasimpi yupaychaykunasta qallaricherqanku.

³⁶Ezequiaspis tukuy runaspiwan kusikorqanku, jinata Dios ruwasqanmanta tukuy ayllunwan, chay imasqa usqhayllata ruwakusqankurayku.