Read Quechua Bolivia DC Bible 2 CRÓNICAS 30 Bible Online

2 CRÓNICAS 30 - Quechua Bolivia DC Bible bible

2 CRÓNICAS 30

¹Chaymanta Ezequiasqa wajyacherqa tukuy Israelmanta kajkunata, Judamanta kajkunatawan, Efrainmanwan, Manasesmanwampis cartasta apacherqa wajyachispa Jerusalempi Señorta yupaychana wasiman jamunankuta, chaypi Israelpa Señor Diosnimpa Pascuanta fiestachakunankupaj.

²Reytaj chay yanapajkunasnimpiwan, Jerusalenmanta kajkunawan ima parlanarikuspataj, nerqa Pascua fiesta ruwanankuta iskay killallapi.

³Chaykama manaraj fiestachayta atisqankuchu, chaypaj sacerdotesmanta manaraj llimphuchasqas ashkharajchu kasqankurayku, nillataj tukuy israelitaspis Jerusalempi tantakusqankurajchu.

⁴Chay parlanakusqankoqa reyman allin rijch'arqa, tukuy ayllumampis.

⁵Chaytataj tukuy Israelman willarachinankuta nerqanku Beer-sebamantapacha, Dan chaynejkama, Jerusalempi Israelpa Señor Diosnimpa Pascuanta fiestachaj jamunankuta. Ñaupajpeqa mana jinatachu tantakuspa ruwasqanku, imaynachus kamachisqa kasqanman jina.

⁶Ajinata willarajkunaqa llojserqanku tukuy Israel jallp'aman, Judá jallp'amampis, reypa, jinataj yanapajkunasnimpa cartasninwan, reypa kamachisqanta willamorqanku: Israel ayllumanta kajkuna Señorman kutirimpuychej, Abrahampa, Isaacpa, Israelpa Diosninman. Paytaj qankunaman kutirimusonqachej Asiriaj reykunasnimpa makisninmanta qhepakorqankichejraj chaykunaman.

⁷Ama ñaupa tatasniykichej jinachu, nitaj wauqesniykichej jinachu kaychej. Paykunaqa qhesacharqanku ñaupa tatasninkoj Señor Diosninta, chayrayku payqa jaywaykorqa llakiyta ruwasqa kanankupaj, imaynatachus rikushaykichej jina.

⁸Chayrayku ama ñaupa tatasniykichej jinaqa sonqosniykichejta rumiyachiychejchu, Señorta kasuychej, jamuychejtaj llimphu nisqa wasinman, Señor wiñaypaj llimphuchanan chayman, Señor Diosniykichejta sirviychej, paytaj qankunapaj phiñasqa kayta saqenqa.

⁹Qankuna Señorman kutirikunkichej chayqa, wauqesniykichejta wawasnintinta presosta enemigosniykichejqa jap'ishanku chay paykunamanta khuyakonqanku, kay jallp'ankumantaj kutimponqanku, imaraykuchus Señor Diosniykichejqa, may munakuyniyojmin, khuyakuyniyojtaj. Manataj qankunata qhesachasonqachejchu qankuna payman kutirinkichej chayqa.

¹⁰Chay willarajkunaqa purimorqanku Efrainta, Manasés jallp'atawan llajtamanta llajta rispa Zabulonkama chayarqanku. Runastaj paykunamanta asikorqanku, alqochakorqankutaj.

¹¹Chaywampis wakin runas Aser ayllumanta kajkuna, Manasesmanta kajkuna, Zabulonmanta kajkunapis sonqonkuta llamp'ucharqanku, rerqankutaj Jerusalenman.

¹²Jinallatataj Judamanta kaj runaspis Diosqa sonqosninkuta kuyucherqa, reypa jinataj kamachejkunaspa nisqankuman jina junt'anankupaj, Señor imaynatachus kamachisqanman jina.

¹³Ajinaqa iskay kaj killapi tantaykukorqanku may chhika runas Jerusalempi, mana levadurayoj t'antasta mikhuna nisqa fiestata ruwanankupaj.

¹⁴Qallarerqankutaj qhechuyta, Jerusalempi karqa chay altaresta, inciensota q'osñichina altarestapis, wijch'orqankutaj Cedrón wayq'oman.

¹⁵Iskay kaj killapi chunka tawayoj kaj p'unchaypi Pascua corderota wañucherqanku. Sacerdoteswan levitaswantaj llimphuchakorqanku, p'enqakuspa paykuna kikinkumanta, Señorpa yupaychana wasinmantaj uywasta Señorpaj q'olachinankupaj.

¹⁶Chaymantataj ruwanasninku mit'asman yaykuporqanku, imaynatachus Diospa runan Moisespa leynimpi nishan jinata. Sacerdotesqa ch'ajchorqanku levitas jaywarqanku chay yawarta.

¹⁷Runas ukhumanta ashkhasraj mana llimphuchakusqankuchu, chayrayku levitasqa chay mana llimphuchasqa runaspaj uywasta wañucherqanku, jinamanta Señorllapaj llimphuchasqas kanankupaj.

¹⁸May ashkha runastaj Efrainmanta, Manasesmanta, Isacarmanta, Zabulonmanta ima, Pascua fiestapi mikhorqanku mana llimphuchakuspalla, nitaj qelqasqa kasqanman jinachu. Paykunaraykutaj Ezequiasqa Diosmanta mañarqa: Khuyakoj Señor, perdonapuy tukuy cheqan sonqoyoj qanta mask'asojkunata.

¹⁹Qan Señorta ñaupa tatasninkoj Diosninkuta amapis llimphuchasqachu yupaychana wasiykipi kachunku llimphuchakuykunaman jinaqa.

²⁰Señortaj uyarerqa Ezequiaspa mañakusqanta, tukuynin ayllutataj perdonaporqa.

²¹Ajinata qanchis p'unchaykunasta Jerusalempi kasharqanku, israelitas sinch'i kusiywan ruwarqanku mana levadurayoj t'anta jatun fiestata. Sacerdoteswan levitaswantaj sapa p'unchay Señorta yupaychasharqanku, sinch'ita sonaj tocanaswan takispa.

²²Ezequíastaj tukuynin levitasman allinta parlaykorqa kusiyninta rikuchispa ajinata Señorta yupaychasqankumanta. Qanchis p'unchay junt'ata mikhorqanku chay jatun fiestapi ñak'asqa uywasta aywasqankumanta, allinyakunapaj uywasta ñak'aspa, ñaupa tatasninkoj Señor Diosninkuta yupaychaspataj.

²³Tukuy runastaj nerqanku qanchis diastawan fiestata ruwanankuta, jinataj may kusisqas chayta ruwarqanku.

²⁴Judamanta rey Ezequiastaj chay tantasqa runasman qorqa waranqa torillosta, qanchis waranqa ovejastawan. Jinallataj kamachejkunaqa qollarqankutaj waranqa torillosta, chunka waranqa ovejastawan. Ashkha sacerdotestaj llimphuchakusharqanku.

²⁵Judamanta tukuy runastaj, kusikorqanku, sacerdotespis, levitaspis Israelmanta jamojkuna tukuy runaspis waj llajtayojkuna Israel jallp'amanta jamojkunapis, chay Judá jallp'api tiyakojkunapis.

²⁶Ajinamanta sinch'i kusiypuni karqa Jerusalempeqa. Israelpa reynin Davidpa wawan Salomompa tiemposninmantapacha mana jayk'ajpis ajinaqa ruwakusqachu Jerusalén llajtapeqa.

²⁷Chaymantataj sacerdotes jinataj levitaspis sayarikuspa aylluta bendicerqanku, Señortaj paykunata uyarerqa, mañakusqankupis janaj pachakama chayarqa maypichus Santo Dios tiyakun chaykama.