Read Quechua Bolivia DC Bible 2 CRÓNICAS 31 Bible Online

2 CRÓNICAS 31 - Quechua Bolivia DC Bible bible

2 CRÓNICAS 31

¹Chay tukuyta ruwaytawanqa chaypi tukuy israelitas kajkunaqa, Judapi kaj tukuy llajtasman rerqanku, chay lanti rumistataj phirerqanku, Aseraman rijch'akoj lantistapis, lomas patapi lanti churana wasista, altarkunatawan. Tukuy chaykunatataj tukucherqanku Judá jallp'api Efraimpi, Manasespipis. Chaymantataj tukuy israelitas llajtasninkuman kutiporqanku, sapa ujpis wasisninkuman.

²Chaymantataj Ezequiasqa sacerdotesqa levitasta ima rak'irarqa mit'asninkupi, imaynatachus sapa uj ruwayta yachasqankuman jina, paykuna uywasta q'olachinankupaj Dioswan allinyakunapaj nisqa jaywanastapis jaywanankupaj, graciasta qospa Señorta yupaychanankupaj yupaychana wasej punkusnimpi servinankupajpis.

³Chantapis reyqa kapuyninmanta qorqa paqarimpi ch'isiyaypitaj uywasta q'olachinankupaj. Jinallataj samakuna p'unchaykunaspi, yuyarikuna fiestaspis Señorpa leynimpi imaynachus qelqasqa kasqanman jina.

⁴Jinallatataj kamacherqa Jerusalempi tiyakoj runasta, sacerdotesman, levitasmampis imastachus qonanku karqa chayta qopunankuta, jinamanta Señorpa leyninman jina ruwanasninkuta junt'anankupaj.

⁵Maypachachus chay kamachi willarakojtinkamataj israelitasqa tukuy sonqowan qorqanku ñaupaj kaj poqoykunasninkumanta, trigota, aceiteta, vinota, misk'ita, campo chajrasmanta tukuy poqoykunatawan. Jinallatataj may ashkhata aparqanku tukuy poqoykunasninkumanta chunka t'aqasmanta ujnin kaj t'aqata.

⁶Judá llajtaspi tiyakojkuna israelitas, Judamanta kajkunapis apamullarqankutaj chunkamanta ujta wakasmanta, ovejasmanta, jinataj Señor Diosninkupaj t'aqasqa kaj imasmantapis. Tukuy chaykunatataj qollu qollusta churarqanku.

⁷Kinsa kaj killapi qallarerqanku tantayta chay imasta. Qanchis kaj killapitaj tukorqanku.

⁸Ezequiaswan chay llajta kamachejkunawan chay tantasqankuta qhawaj rispataj Señorta Israel ayllutawan bendicerqanku.

⁹Chaypacha Ezequiasqa sacerdotesta, levitasta ima tapurerqa chay qollusmanta.

¹⁰Sadocpa ayllunmanta kuraj kaj sacerdote Azariastaj kuticherqa: Señorta yupaychana wasinman chay qonankuta apamusqankumantapacha mikhuyku sajsakuykutaj, may ashkharajtaj puchuwayku. Kay chhikaraj puchun, ayllunta Señorqa bendicisqanrayku.

¹¹Chayraykutaj Ezequiasqa Señorta yupaychana wasipi jallch'ana cuartosta wakichinankuta kamacherqa. Chaytataj ruwarqanku.

¹²Chaymantaj apaykorqanku chay ñaupaj poqoykunata apamusqankuta chunka t'aqasmanta ujta qosqankumanta, jinataj Señorpaj nispa t'aqasqanku imastapis. Chay tukuyta qhawanampajtaj levita Conaniasta churarqanku, hermanon Simeitaj payta yanapanampaj churasqa karqa.

¹³Conaniaspa wauqen Simeipapiwan kamachiynimpi chay imasta qhawanankupaj, ajllasqas karqanku kaykuna: Jehiel, Azazías, Nahat, Asael, Jerimot, Jozabad, Eliel, Ismaquías, Mahat, Benaiaspiwan. Tukuy kaykunaqa churasqas karqanku rey Ezequiasnejta Diosta yupaychana wasimpi kuraj kaj sacerdote Azariasnejta ima.

¹⁴Inti yaykuynejta qhawajqa, Imnaj wawan levita Coré karqa. Payqa kikinmanta jaywanasta Diospaj apamusqankumanta, jinataj Diospaj nisqa imasta rak'inampaj, Diospaj t'aqasqa imastawan qhawanampaj churasqa karqa.

¹⁵Coretataj sacerdotespa llajtasnimpi allinta yanaparqanku: Edén, Miniamín, Jesúa, Semaías, Amarías, Secanías ima; wauqesninku ukhupi rak'inakunankupaj uj rejllata juch'uyman jatunman, mit'asninkuman jina.

¹⁶Jinataj pischus yupaychana wasiman ruwanasninkuta sapa día junt'aj jamoj kanku chaykunaman, mit'asninkuman jina, ruwayninkuman jinataj. Chaykunaqa karqanku ayllusninkuman jina qelqasqas kinsa watasniyojmantapacha pataman.

¹⁷Sacerdotesqa familiasninkuman jina qelqasqas karqanku, levitaspis iskay chunka watayojmantapacha pataman, ruwanasninkuman jina, mit'asninkuman jinataj.

¹⁸Chay librospi qelqasqasllataj karqanku juch'uy wawas, warmisninku, qhari wawas, jinataj warmi wawaspis, tukuynin runas ayllunkumanta, Diospaj t'aqasqa imasta jap'ikusqankurayku ñapis llimphuchasqasña karqanku.

¹⁹Tukuynin llajtaspi runas churasqas karqanku mikhunasta rak'iranankupaj, Aarompa ayllunmanta kajkuna sacerdotesman, jinataj levitasmampis, sutisninku qelqasqas karqanku chaykunaman, chay sacerdotespa llajtasninkupi michinas jallp'asninkupi tiyakusharqanku chaykunaman.

²⁰Ezequiasqa kay jinata ruwarqa tukuynej Judá jallp'api. Ruwasqasnenqa cheqan, allintaj Señor Diosnimpa ñaupaqempi karqa.

²¹Diosta yupaychana wasipi tukuy ima ruwasqasnin, Diospa kamachiykunasninman, leyman jinataj ruwarqa, Diosta tukuy sonqowampuni mask'aspa, chayrayku paytaqa tukuy imapi allin rerqa.