Read Quechua Bolivia DC Bible 2 CRÓNICAS 32 Bible Online

2 CRÓNICAS 32 - Quechua Bolivia DC Bible bible

2 CRÓNICAS 32

¹Chay imasmanta qhepamantaj, Señorman cheqa sonqowan qayllaykusqankumanta qhepamanqa Asiriaj reynin Senaquerib jamuspa Judá jallp'aman junt'aykorqa. Jarakorqataj chay jark'achisqasniyoj llajtas qayllapi chaykunata jap'ikapuyta munaspa.

²Ezequiastaj, Senaquerib maqanakuyta munaspa Jerusalenman jamusqanta rikuspa, tapurerqa yanapajkunasninta. Soldadosta kamachejkunatapis nerqa llajta jawaspi yaku juturista p'amparanankuta, paykunataj jina kananta munarqanku.

⁴Chaypacha ashkha runas tantakorqanku, chay yaku juturistataj p'amparqanku, jinataj jallp'a urata larq'a risharqa chaytapis, Asiriamanta reykuna ama ashkha yakuta tarinankupaj.

⁵Ezequiasqa kallpakorqa, chay llajtaj perqa q'asasnintataj jallch'acherqa mana uj q'asayoj kanankama, chay perqa patapi torresta jataricherqataj, uj jawa kaj perqatawan ruwacherqa. Davidpa llajtampi chay Milotapis jark'achichillarqataj, ashkha lanzasta, escudostawan ruwachillarqataj.

⁶Chaymantataj churarqa maqanakupaj kamachejkunata tukuy ayllu ukhupi. Paykunatataj tantaykorqa llajtaman yaykuna chay plazapi. Chaypitaj paykunata kallpachanampaj parlarqa kay jinata:

⁷Kallpachakuychej, wapuchakuychejtaj. Ama mancharikuychejchu, nitaj iskayrayaychejchu Asiria reypa ñaupaqempi; chay ashkha soldadosnimpa ñaupaqempipis. Noqanchejpataqa aswan ashkharaj tiyapuwanchej paypamanta nisqaqa.

⁸Payqa runaspa kallpallanwan kashan, noqanchejwantaj Señor Diosninchej kashan maqanakunasninchejpi yanapanawanchejpaj. Rey Ezequiaspa parlasqasninta uyarispataj ayllumanta runasqa may kallpachasqas karqanku.

⁹Chaymantataj Asiriaj reynin Senaqeribqa tukuy soldadosnimpiwan Laquis llajtapi maqanakushaspa Jerusalenman kacharqa yanapajkunasninta, Judáj reynin Ezequiasman, jinataj Jerusalempi kasharqanku chay tukuy tiyakojkunamampis kay jinata willachispa: Asiriaj reynin Senaquerib kayta willachimusunkichej: Pimam atienikuspataj qankunaqa jinalla kakushankichej, Jerusalempi, muyuyniykichejpi soldadoswan jark'achisqas kashaspapis?

¹¹Sichus Ezequías nishasunkichej, Señor Diosnin kacharichinasuykichejta chayqa, jinata nispaqa ch'aukiyashasunkichej, yarqhaymanta, ch'akiymanta wañunaykichejpajtaj tanqaykushasunkichej.

¹²Manachu Ezequías lomas patapi yupaychana wasisninta, altaresnintapis phirirarqa? Judapi kaj runasta, Jerusalempi kajkunatapis kamacherqa uj altarllapi inciensota q'olachinankutapis?

¹³Manachu yachankichej noqa ñaupa tatasniypis imastachus ruwasqankuta chay waj nacioneswanqa? Chay nacionespa dioskunasninkoqa aterqankuchu atiyniymanta llajtankuta kacharichiyta?

¹⁴Ñaupa tatasniy chay nacionesta chinkacherqanku, chaykunamanta, mayqen diostaj llajtanta makiymanta qhechuyta atinmanri? Imaraykutaj yuyankichej diosniykichej makiymanta librasunaykichejtari?

¹⁵Chayrayku ama ch'aukiyachikuychejchu, nitaj sonqoykichejta suwachikuychejchu, Ezequiastaqa amataj creeychejchu. Mana mayqen diospis chay nacionesmanta, reinonmantapis llajtankuta librayta aterqankuchu makiymanta, ñaupa tatasniypa makinmantapis. Astawanraj ari Diosniykichejqa mana atenqachu makiymanta qankunata kacharichiytaqa.

¹⁶Chay jinata wajkunastawanraj nerqanku Señor Diospa contrampi, jinataj kamachin rey Ezequiaspa contrampipis, Asiriamanta yanapajkunasnenqa.

¹⁷Senaqueribqa cartasta qelqarqa Israelpa Señor Diosnimpa contrampi, kay jinata rimaspa: Imaynatachus waj nacionespa dioskunasninku mana aterqankuchu llajtankuta atiyniymanta kacharichiyta, ajinallatataj Ezequiaspa Diosnimpis manallataj llajtanta kacharichiyta atenqachu atiyninmantaqa.

¹⁸Senaqueribpa yanapajkunasnintaj, Jerusalén perqa pataspi kasharqanku chay runasman, hebreo parlaypi sinch'ita qhaparerqanku mancharichinankupaj, qharkachinankupajtaj, jinamanta llajtata jap'ikapuyta munaspa.

¹⁹Jerusalempi kaj Diospa contrampi parlarqanku, kay pachapi waj nacionespa dioskunasninkumanta jina. Chaykunaqa runaspa ruwasqasnin dioskunalla kanku.

²⁰Chaypacha rey Ezequiasqa, jinataj Amospa wawan profeta Isaiaspis mañakorqa janaj pachamanta yanapata mañakuspa.

²¹Chaypacha Señorqa kachamorqa uj angelta, paytaj wañuracherqa wapu soldadosninta, kamachejkunasninta, kurajkunasnintawan rey Asiriaj jarampi. Paytaj may p'enqasqa llajtanman kutiporqa. Diosnimpa yupaychana wasinman yaykojtintaj paypa wawasnillantaj chay kikimpi espadawan wañurparicherqanku.

²²Jinamanta Señorqa Ezequiasta kacharicherqa, jinataj Jerusalempi tiyakojkunatapis atiyninmantapis. Señortaj sonqo tiyasqa kausayta qorqa, qayllankupitaj tukuy nacioneswan.

²³Chaypacha ashkhas aparqanku Jerusalenman Señorman jaywanasninkuta, Judáj reynin Ezequiaspajtaj valorniyoj t'inkasta aparqanku. Chaymantapachataj Ezequiasqa waj nacionespaj aswan jatunchasqa karqa.

²⁴Chay tiempopi Ezequiasqa sinch'ita onqoywan urmarqa. Chaypacha Señormanta mañakorqa, paytaj mañakusqanta kuticherqa uj milagrowan.

²⁵Chay allin kajta jap'ishaspapis Ezequiasqa mana chaymanta Señorman agradecerqachu, manachayqa mayta umanta oqharerqa. Chaymanta Señorqa paypaj phiñakorqa, jinataj Jerusalempaj, Judapajpis.

²⁶Wapuykachasqanmanta qhepamanqa Ezequiasqa Diospa ñaupaqempi k'umuykacharqa, jinallataj Jerusalempi tiyakojkunapis. Señortaj phiñakuyninta mana paymanqa apachimorqachu Ezequías kausanankama.

²⁷Ezequiasqa mayta qhapajyarqa, jatumpaj qhawasqataj karqa, ashkha qolqeta, qoritawan tantarqa, jinataj valorniyoj rumista, q'apaj jawinasta, escudosta, tukuy laya valorniyoj imastawan.

²⁸Jatarichillarqataj wasista, chajra poqoykunata, vinota, aceitetawan jallch'anapaj, jinataj tukuy sapa laya uywaspaj corralkunata ruwacherqa.

²⁹Jinataj ruwachillarqataj llajtasta, uywasnintaj may chhikas karqanku wakasmanta, jinataj ovejasmantapis, Dios qorqa chay chhika qhapaj kayta.

³⁰Kay Ezequiasllataj, Gihón yaku juturej pata kaj llojsinanta p'ampaykucherqa. Chay yakutataj jallp'a uranta larq'annejta pusarqa, Davidpa llajtanman, inti yaykuy ladonejman. Ajinamanta Ezequiastaqa tukuy ima ruwasqampi allillampuni rerqa.

³¹Maypachachus Babiloniamanta kamachejkuna watunankupaj kachasta kachamorqanku, yachanankupaj chay nacionespi Diospa milagron imaynachus ruwasqas kasqanta. Chaypacha Diosqa sapallanta Ezequiasta saqerqa allinta yachayta munaspa, imaynatachus sonqompi yuyarqa chayta.

³²Ezequiaspa wakin ruwasqasnin, khuyaywan allin ruwasqasnimpis qelqasqas kashanku Amozpa wawan profeta Isaiaspa jamoj imasmanta qelqas librompi, jinallataj Judamanta Israelmantawan, reykunasninkumanta willajkuna librosninkupi.

³³Ezequías wañupojtintaj p'amparqanku Davidpa ayllumpa p'ampakunampi aswan pata kajpi. Tukuy Judapi, Jerusalempi tiyakojkunapis wañuynimpi paymanta allinta parlarqanku. Cuentampitaj wawan Manasés kamacherqa.