Read Quechua Bolivia DC Bible 2 CRÓNICAS 34 Bible Online

2 CRÓNICAS 34 - Quechua Bolivia DC Bible bible

2 CRÓNICAS 34

¹Josiasqa pusaj watasniyoj karqa, kamachiyta qallarishaspa. Jerusalempitaj kamacherqa kinsa chunka ujniyoj watasta.

²Josiaspa ruwasqasnenqa Señorpa rikuynimpeqa cheqan karqanku, paypa ñaupa tatampa Davidpa ñankunasninta qhaterqa, mana chaymanta pañaman nitaj lloq'eman t'aqakuspa.

³Pusaj watastaña kamachisqanmantataj, waynallaraj kashaspa, ñaupa tatan Davidpa Diosninta mask'ayta qallarerqa. Chunka iskayniyoj watasta kamachisqanmantataj, Judamanta, Jerusalenmantawan qhechuyta qallarerqa lomas patapi yupaychana wasista, Asera lantisninta, llajllasqa lantisninta, metalmanta jich'asqa lantistapis.

⁴Ñaupaqempitaj thuñerqanku Baal lantispa altaresninta. Thuñichillarqataj patampi kasharqanku chay incienso q'osñichina altarestapis, chanta thuñichillarqankutaj Asera lantista, llajllasqa lantista, metalmanta jich'asqa karqanku chay lantistapis, chay tukuyta ñut'uman tukuchispa. Chaywan qhalliykorqa uywasta chay lantisman ñak'aspa jaywarqanku chaykunaj sepulturasninkoj patanman.

⁵Chay jawaqa sacerdotespa tullusninkuta altaresninkoj patallampitaj ruphacherqanku, ajinata llimphucharqa, Judata Jerusalentawan.

⁶Manasespa llajtasnimpi kikillantataj ruwarqa, Efraimpapi, Simeompapi, Neftalejpapi, chay llajtaspa muyuynimpi, ranchosnintimpiwan.

⁷Thuñerqa altaresta, Asera lantista, llajllasqa lantistawan ñut'uta ruwaraspa. Tukuy Israel jallp'api incienso q'osñichina altarestapis phiricherqa. Chaymantataj Jerusalenman kutiporqa.

⁸Chunka pusajniyoj watastaña kamachisqanmanta, chanta jallp'ankuta, yupaychana wasitapis llimphuchasqankumantaña kacharqa Azaliaspa wawan Safanta, chay llajtamanta kamachejkuna Amasiasta, Joacazpa wawan qelqeri Joata. Tukuy paykunata kackarqa, Señor Diosninkoj wasinta jallch'amunankupaj.

⁹Chaypacha paykunaqa watukamorqanku kuraj kaj sacerdote Hilciasta. Paymantaj qolqeta jaywarqanku, chay Diospa yupaychana wasinman apamorqanku chaytaqa chay punku qhawajkuna levitas tantasqanku, Manasés ayllumanta, jinataj Efraín ayllumanta ima. Israelpa ayllunmanta qhepakorqanku chaykunamanta, jinallataj Judamanta, Benjaminmanta, Jerusalenmantapis.

¹⁰Chaymantataj qorqanku Señorpa yupaychana wasinta ruwachinankupaj churasqas karqanku chaykunaman, paykunataj paganankupaj yupaychana wasi jallch'aypi llank'ajkunaman.

¹¹Chay qolqeta jaywarqanku carpinterosman, ruwachejkunamanwan ch'eqosqa rumista rantinankupaj, maderasta jap'ichinankupaj, jinataj maderastapis kurkuspaj, chay wasisman wajterasta churanankupajpis, Judamanta reykunaspa urmachisqasninku wasispi.

¹²Chay runasqa allin sonqowan llank'arqanku. Qhawaspa ruwachejkunataj karqanku levitas, Jahatwan, Abdiaswan, Merarej ayllunmanta, chanta Zacariaswan, Mesulamwantaj Koatpa ayllunmanta karqanku. Paykunaqa ruwachejkuna karqanku. Levitasmantataj tukuyninku tocayta yachajkuna karqanku.

¹³Paykunaqa q'epejkunatapis qhawallarqankutaj, chay wasi ruwaypi llank'ajkunatapis. Levitasmanta wakinkunataj qelqeris, kamachejkuna, punku qhawajkuna ima karqanku.

¹⁴Señorpa yupaychana chay wasinman churasqa chay qolqeta orqhoshaspataj sacerdote Hilciasqa tarerqa, Señorpa leyninmanta Moisesnejta qosqa chay librota.

¹⁵Hilciasqa qelqeri Safanman nerqa: Señorta yupaychana wasipi leymanta librota tarini, nispa. Safanmantaj chay librotaqa jaywapusqa.

¹⁶Safantaj chay librota reyman aparqa. Chaymanta willaspataj nerqa: Reyníy, kamachisniykeqa ruwashanku, tukuy imata kamachisqasniykiman jina.

¹⁷Yupaychana wasipi karqa chay qolqetapis tantaykuspa, chay qhawaspa llank'achishanku chaykunaman, llank'ajkunamanwan jaywanku.

¹⁸Chaymanta qelqeri Safanqa reyman willallarqataj: Sacerdote Hilciasqa uj librota jaywawarqa. Chaytataj Safanqa reyman ñaupaqempi leerqa.

¹⁹Reytaj leypa nisqasninta uyarispa, p'achanta llik'ikorqa.

²⁰Chay rato kamacherqa Hilciasta, Safamps wawan Ahicanta, Micaiaj wawan Abdonta, qelqeri Safanta, reypa yanapajnin Asaiastawan, kay jinata nispa:

²¹Riychej Señorta tapumuychej noqamanta, Israelpi, Judapiwan puchojkuna runasmanta, kay tarisqaykichej libropi nisqasninmantawan. Señorqa sinch'i phiñasqa kashan noqanchejpaj, imaraykuchus ñaupa tatasninchejqa mana waqaychasqankuchu Señorpa nisqanta, manataj ruwasqankuchu kay libropi qelqasqa kasqanman jina.

²²Hilciaswan, reywan kamacherqa rinankuta chaykuna rerqanku profetisa Huldaman. Payqa Saluimpa warmin karqa. Salumtaj Ticvaj wawan karqa Harhaspa allchhintaj. Payqa yupaychana wasipi p'achasta jallch'anampaj churasqa karqa. Huldaqa Jerusalempi tiyakorqa chay mosoj llajtanejpi. Paymantaj chay palabrasta nerqanku:

²³Paytaj kuticherqa kay jinata: Israelpa Señor Diosnenqa nin: Niychej pichus tapojta kachamuwasunkichej chay runaman:

²⁴Ajinata noqa Señorqa nini: Uj jatun llakiyta apachimusaj kay cheqaman, chaypi tiyakojkunamampis, imaynatachus Judáj reynimpa ñaupaqempi leenkichejña chay libropi, llakiykunas jamunanmanta nisqanman jina.

²⁵Paykunaqa saqerpariwanku, waj dioskunamantaj inciensosta q'osñichinku, jinamanta waj ruwasqasninkuwan phiñachiwaspa, chayrayku kay cheqaj contrampi phiñakuyniyta apachimusaj, manataj thasnukonqachu.

²⁶Judáj reyninman, pichus kachamusunkichej Señorta tapurejta, chayman niychej: Israelpa Señor Diosnin ajinata nin: Chay libroj palabrasninta uyarisqankurayku, sonqoykita wawayachispa Diospa ñaupaqempi k'umuykukusqaykirayku, kay cheqaj contrampi, chaypi tiyakojkunaj contrampiwan, imastachus nisqasniyta uyarispa, ñaupaqeyman k'umuykakamuwasqaykirayku, p'achaykita llik'ikusqaykirayku, ñaupaqeypi waqasqaykiraykutaj noqapis uyarillaykitaj mañakuwasqaykita. Ajinamanta nin Señorqa:

²⁸Noqa ruwasaj allillanta wañupunaykita, ñaupa tatasniykiwantaj ujchasqas kamunaykita, mana rikuspalla ima llakiykunastachus kay cheqapi tiyakojkunasman ima apachimusaj chayta. Reypa kachasnenqa kutiporqanku chay willayta reyman apamuspa.

²⁹Chaypacha reyqa kacharqa wajyajta, tantacherqataj Judamanta, Jerusalenmantawan tukuy kurajkunata.

³⁰Chaymantataj reyqa, jinataj Judamanta, Jerusalenmantawan tukuy runaswan, sacerdoteswan, levitaswan, tukuy nacionmanta kajkunapiwan, juch'uymanta jatunkama Señorpa yupaychana wasinman rerqanku. Chaypitaj reyqa jatunmanta leerqa Señorpa wasimpi tarisqanku chay trato ruwasqa librota.

³¹Chaymantataj reyqa sayarikorqa sayantampa ladompi, Señorpa ñaupaqempitaj tratota ruwarqa Señorta qhatinanta, tukuy kamachisqasninta, leykunasninta, nisqasninta, tukuy almawan, tukuy sonqowan junt'ananta. Chanta imastachus chay trato libropi ruwanasta nisqanman jina.

³²Chaymantataj reyqa nerqa Jerusalenmanta, Benjaminmantawan, chaypi kasharqanku chay runasta, chay tratota junt'asaj ninankuta. Jerusalempi tiyakojkuna runastaj Dioswan trato ruwasqankuta junt'arqanku, ñaupa tatasninkoj Diosninwan trato ruwasqankuta.

³³Josiasqa qhechorqa tukuy millay ruwaykunata Israel jallp'amanta. Kamacherqataj tukuy israelitas Señor Diosninkuta sirvinankuta. Rey kausanankama mana t'aqakorqankuchu ñaupa tatasninkoj Diosninmanta.