Read Quechua Bolivia DC Bible 2 CRÓNICAS 35 Bible Online

2 CRÓNICAS 35 - Quechua Bolivia DC Bible bible

2 CRÓNICAS 35

¹Josiasqa Jerusalempi Pascua fiestata ruwarqa Señorpa sutimpi. Ñaupaj kaj killapi chunka tawayoj diampi Pascua corderota ñak'arqanku chay fiestapaj.

²Sacerdotestataj ruwanasninku karqa chayman churarqa, Señorpa yupaychana wasimpi kamachita ruwanankupaj sonqocharqa.

³Jinataj tukuy israelitasta yachachejkuna, Señorpaj t'aqasqa levitasman nerqa: Diospaj t'aqasqa trato ruwasqa cajonta churamuychej, Israelpa reynin Davidpa wawan Salomompa ruwasqan yupaychana wasiman, manaña lijraspa apaykachanaykichejpaj. Kunantaj Señor Diosniykichejta sirvej churakuychej, jinataj Señorpa ayllun Israeltapis.

⁴Familiasman jina wakichikuychej, mit'asniykichejman jinataj Israelmanta rey Davidpa wawan Salomompis qelqasqata saqesqankuman jina.

⁵Diosta yupaychana wasipi qhepakuychej, familiaspi t'aqasqas kasqaykichejman jina, hermanosniykichej israelitasta familiasninkuman jina yanapanaykichejpaj, sapa familia levitasmanta chay familiasta yanapanaykichejpaj.

⁶Pascua fiesta corderota ñak'aychej, llimphuchakuychejtaj, hermanosniykichejtapis wakichiychej Moisesnejta Señorpa kamachisqasninta junt'anankupaj.

⁷Chaymantataj Josiasqa kikin uywasninmanta qorqa, Pascua fiestata ruwanankupaj tantasqas kasharqanku chay runasman: Ovejasta, corderosta, cabrasmanta ima. Tukuynimpi kinsa chunka waranqa uywasta qorqa. Torillostataj kinsa waranqata qorqa.

⁸Jinallataj reypa yanapajkunasnimpis paykunallamanta jaywanasta qorqanku tukuy aylluman sacerdotesman, levitasman ima. Jinallataj Diosta yupaychana wasipi kamachejkunapis qollarqankutaj: Hilcias, Zacarías, Jehiel ima, sacerdotesman qorqanku Pascua fiestata ruwanankupaj iskay waranqa sojta pachajniyoj ovejasta, kinsa pachaj torillostawan.

⁹Chanta levitaspa kamachejkunasninku Conanías, Natanael, Hasabaías, Jehiel, Josabat imaqa levitasman phishqa waranqa ovejasta, phishqa pachaj torillostawan jaywallarqankutaj chaykunawan Pascuata ruwanankupaj.

¹⁰Fiestachanankupaj wakichisqasña kashajtinkutaj, sacerdotesqa ruwanasninkuman yaykorqanku, levitaspis mit'asninkuman jina, reypa kamachisqanman jina.

¹¹Chaypacha Pascuapaj nisqa uywasta ñak'arqanku. Chay uywaspa yawarninwantaj sacerdotesqa altarta ch'ajchorqanku. Chaykamataj levitasqa uywasta ñak'asharqanku.

¹²Chaymantataj ruphachinapaj kajta orqhomorqanku tukuynin ayllu familiasninkuman jina Señorman jaywanankupaj, Moisespa librompi kamachisqa kasqanman jina. Torilloswampis kikillantataj ruwarqanku.

¹³Chay qhepamantataj chay uywastaqa kankarqanku Pascua fiestata ruwanankupaj; ñaupajmanta nisqa kasqanman jina, chay wakin Diospaj t'aqasqa kajkuna jaywanatataj wayk'orqanku mankaspi, jatuchaj calderaspi, paylaspi ima. Tukuynin aychatataj usqhayllata ayllumanta tukuy runasman rak'irarqanku.

¹⁴Chaymantataj levitasqa paykunapajñataj, jinataj Aarompa ayllunmanta kajkuna sacerdotespajpis wakicherqanku, imaraykuchus sacerdotesqa ch'isiyanankama ruwanaspi karqanku q'olachinasta jaywaspa, wirasnin kajtawan ruphachispa. Chayrayku levitasqa paykunapaj, jinataj Aarompa ayllunmanta sacerdotespajpis chayaqesninkuta wakicherqanku.

¹⁵Asafpa ayllunmanta takejkunaqa kanankupi kasharqanku Davidpa kamachisqanman jina, Asaf, Hemán, reypa profetan Jedutún kamachisqanman jina. Punkusta qhawajkunapis, sapa ujpis punkusninkupi kasharqanku; mana mayqenninkupis Pascuata qhawanataqa saqerparerqankuchu, hermanosninku levitasqa paykunapajwan wakichisqankurayku.

¹⁶Ajinata tukuy ima wakichikorqa Señorta yupaychanapaj jaqay diaspi Pascuata fiestachanapaj, jinataj Señorpa altarnin patapi uywasta q'olachinapaj, rey Josiaspa kamachisqanman jina.

¹⁷Israelitas chaypi kajkunaqa fiestata ruwarqanku, mana levadurayoj t'antasta mikhuna fiestatataj qanchis diata.

¹⁸Profeta Samuelpa tiemponmantapacha, mana ujtapis Israelpi fiestachakusqachu kay jina Pascuataqa, ni mayqen Israelmanta reykunapis Pascuna fiestataqa ruwasqachu Josías jinaqa, sacerdoteswan, levitaswan, Judamanta kaj runaswan, Israelmanta chaypi kajkunawan, jinataj Jerusalempi tiyakojkunawan ima.

¹⁹Chay Pascuataqa ruwarqanku chunka pusajniyoj watastaña Josías kamachishajtin.

²⁰Aswan qhepamanta Josiasqa Señorpa yupaychana wasinta allinyachisqanmantaña, Egiptoj reynin Necaoqa Eufrates mayuman kachaykukorqa Carquemispi maqanakunampaj, Josiastaj paywan tinkoj llojserqa.

²¹Necaotaj, kachasta kacharqa kay jinata nichispa: Judamanta reyqa mana ima ruwanampis kanchu qanwanqa. Mana qampa contraykipichu jamushani, manachayqa waj naciompa contrampi maqanakupi kashani chayman, Dios kamachiwan apurakunayta. Ajinaqa allinniykipaj ama churanakuychu Dioswan, payqa noqawan kashan. Pajtataj pay wañuchisunkiman.

²²Josiastaj mana ithirerqachu, manachayqa paywan maqanakoj rerqapuni mana kasuspa Necaoj willachimusqanta. Chay willayqa kikin Diosmantapuni jamorqa. Ajinaqa maqanakuman yaykorqapuni Meguido vallepi.

²³Arcota kacharejkunataj Josiasman jap'erparicherqanku. Chaypacha reyqa nerqa yanapajkunasninman: Kaymanta orqhowaychej, sinch'i nanachisqa kashani nispa.

²⁴Chay yanapajkunasnintaj maqanakunapaj carretamanta waj carretamantaj churarqanku, chaymanta Jerusalenman aparqanku. Ñaupa tatasnimpa p'ampakunampitaj p'ampaykaporqanku. Josiaspa wañupusqanmantataj mayta waqarqanku, tukuyninku Judamanta, Jerusalenmantawan kajkuna.

²⁵Jeremiasqa uj yarawita wakicherqa Josiaspa wañupusqanmanta yuyarikunapaj tukuy takiykuna qharispi warmispipis. Josiasmanta yuyarikuspa kay yarawita takinkupuni kunankama. Kay yaraweqa Israel ayllu ukhupi takisqapuni, qelqasqataj yarawi takiykuna libropi.

²⁶Josiaspa wakin ruwasqanqa Señorpa leynin libroman jina, munakuywan allin ruwasqasnimpis, qallariymanta tukukuyninkama ruwasqasnimpis qelqasqas kashanku, Israelpa, jinataj Judajpa reykunasninmanta willajkuna librospi.