Read Quechua Bolivia DC Bible 2 CRÓNICAS 36 Bible Online

2 CRÓNICAS 36 - Quechua Bolivia DC Bible bible

2 CRÓNICAS 36

¹Chaypacha Judamanta runasqa Josiaspa wawan Joacazta ajllarqanku. Jerusalempitaj tatampa cuentanmanta reyninkupaj churarqanku.

²Joacazqa iskay chunka kinsayoj watasniyoj karqa kamachiyta qallarishaspaqa. Jerusalempitaj kinsa killata kamacherqa.

³Egiptoj reynintaj Jerusalempi kamachiyninmanta qhechurparerqa, nacionninwantaj impuestota pagachikorqa, kinsa waranqa kinsa pachajniyoj kilos qolqeta, kinsa chunka kinsayoj kilostataj qorita.

⁴Chaymantataj Egiptoj reynenqa Eliaquinta churarqa, Judapi, Jerusalempiwan rey kanampaj. Eliaquemqa Joacazpa hermanon karqa, Necaoqa Eliaquinman Joacim sutita churarqa. Chaymantataj Necaoqa Joacazta jap'ispa Egiptoman aparqa.

⁵Joacemqa iskay chunka phishqayoj watasniyoj karqa kamachiyta qallarishaspa. Jerusalempitaj chunka ujniyoj watasta kamacherqa. Ruwasqasninrí mana allinkunachu karqa Señor Diosnimpa rikuynimpeqa.

⁶Babiloniaj reynin Nabucodonosortaj, Joacimpa contrampi jamorqa. Broncemanta watanaswan ch'ipaykukuytawantaj Babiloniaman aparqa.

⁷Nabucodonosorqa Babiloniaman Señorta yupaychana wasimpi kaj ruwanapaj nisqa wakin imasta apakaporqa. Chaykunatataj Babiloniapi yupaychana wasinman churaykorqa.

⁸Joacimmanta wakin willaykunasqa, chay millay ruwanasnin, imaschus payta qhatirisqasnimpis qelqasqas kashanku, Judajta Jerusalempatawan reykunasninkumanta willaj libropi. Paypa cuentanmantataj wawan Joaquín kamacherqa.

⁹Joaquenqa chunka pusajniyoj watasniyoj karqa kamachiyta qallarishaspa. Jerusalempitaj kamacherqa kinsa killata chunka iskayniyoj diatawan. Ruwasqasnenqa sajras karqanku Señorpa rikuynimpi.

¹⁰Chay wata muyurimuypitaj rey Nabucodonosorqa Joaquinta kamacherqa Babiloniaman apachinankuta, Señorpa yupaychana wasinmanta aswan valorniyojkuna imastawan khuska. Sedequiastataj churarqa Judatawan Jerusalentawan kamachinampaj. Sedequiasqa Joaquimpa ayllunmanta karqa.

¹¹Sedequiasqa iskay chunka ujniyoj watasniyoj karqa kamachiyta qallarishaspa. Chunka ujniyoj watastataj kamacherqa Jerusalempi.

¹²Ruwasqasnenqa mana walejkunachu karqa Diospa ñaupaqempi. Profeta Jeremiaspa ñaupaqempi mana k'umuykukorqachu Señorpa palabranta payman parlashajtin.

¹³Chantapis rey Nabucodonosorqa contrampi oqharikorqa, payqa Diospa sutimpi jurachisqa yanapanakupi yaykunankupaj. Sonqontapis sinch'ita rumiyacherqa, Israelpa Diosninman mana kutirikuyta munaspa.

¹⁴Jinallatataj tukuy runas, sacerdote runaspis astawan juchata yapaykukorqanku, chay waj nacionespa millay jucha ruwasqasninkuta ruwaspa, jinamanta ch'ichichaspa Señorta yupaychana wasita, Jerusalempi paypaj ajllakorqa chayta.

¹⁵Ñaupa tatasninkoj Señor Diosninkoqa palabranta apachillarqapuni paykunaman profetasninnejta khuyasqanrayku, tiyakuna wasinraykutaj.

¹⁶Jinapis paykunaqa asiykukorqanku Señorpa willarajkunasninmanta, nisqankuta qhesacharqanku, profetasninmantapis asiykukorqanku, Señorpa phiñakuyninta oqharichinankukama paykunaj contrankupi, manañataj chayta thasnuchiyta aterqankuchu.

¹⁷Chaypacha Señorqa Caldeospa reyninta puririchimorqa paykunaj contrankupi, wayna runasninkutataj kikin Diosta yupaychananku wasi ukhupi cuchillowan wañucherqanku, manataj khuyarqachu wayna runasta, nitaj sipas warmistapis, nitaj unay watasniyojkunatapis, nitaj machu runastapis, nitaj allin achachistapis. Señorqa tukuyninkuta paypa makisninman jaywaykorqa.

¹⁸Chanta caldeospa reynenqa Babiloniaman apakaporqa; Diosta yupaychana wasinmanta kaj imasta, jatuchajkunata, jinataj juch'uykunata, Diosta yupaychana wasipi valorniyoj kaj imasta, reypata kajkunata, reypa yanapajkunasnimpata kajkunatapis.

¹⁹Chay jawaqa Diosta yupaychana wasitapis ruphaykucherqanku, Jerusalén llajtaj perqasnintataj thuñirarqanku. Tukuy palaciosninmampis ninata jap'iykucherqanku. Chay valorniyoj kaj imastapis tukuyninta t'unaykorqanku.

²⁰Chay qhepatataj wañuymanta llusp'ejkunaqa Babiloniaman wijch'usqas karqanku. Paypa kamachisnin kamorqanku, jinataj wawasnimpatawan kamorqanku persaspa reyninku sayarinankama.

²¹Chay tukoyqa ruwakorqa profeta Jeremiasnejta Diospa nisqasnin junt'akunampaj. Jinamanta jallp'aqa samarikorqa tukuynin tiempospi raqaykunaspi kanankama, qanchis chunka watas junt'akunankama.

²²Persiaj reynin Ciro, ñaupaj kaj watapi kamachishajtintaj, Jeremiasnejta Señorpa parlasqan junt'akunampaj Señorqa Cirota umacharqa, tukuynin kamachiynimpi kajkunaman willarachinampaj, parlasqaspi, jinataj qelqasqaspipis, kay jinata:

²³Persiamanta rey Ciroqa kay jinata nin: Janaj pachamanta Dios makisniyman churamun kay jallp'a patapi kaj tukuy reinosta, kamachiwantaj Jerusalempi Diosta yupaychana wasita ruwapunayta, chaytaj Judá jallp'api kashan. Ajinaqa mayqennillaykichejpis, Señorpa ayllunmanta kajkunataqa, Señor Diosniykichej yanapachun, jaqaymantaj richun.