Read Quechua Bolivia DC Bible 2 CRÓNICAS 7 Bible Online

2 CRÓNICAS 7 - Quechua Bolivia DC Bible bible

2 CRÓNICAS 7

¹Salomón mañakuyta tukojtinkamataj janaj pachamanta nina urmamorqa, ruphaykorqataj q'olachinapaj jaywasqa uywata, chay ñak'asqa kaj waj uywastawan. Chanta Señorpa k'anchaynin chay yupaychana wasiman junt'aykorqa.

²Chayraykumá sacerdotesqa yupaychana wasiman mana yaykuyta aterqankuchu.

³Tukuy israelitastaj nina urmamojta rikuspa, jinataj Señorpa k'anchaynintapis yupaychana wasi pataman uraykamojta, chaypacha qonqorikorqanku, k'umuykukorqankutaj pampapi rumi losawan uyanku tinkunankama. Yupaychasharqankutaj graciasta qospa Señorman kay jinata kutin kutinta: Payqa may k'achamin, khuyakuynenqa wiñaypajmin.

⁴Chay qhepatataj reywan tukuy aylluwan khuska, ñak'asqa uywasta Señorman jaywarqanku.

⁵Rey Salomontaj ñak'asqa uywasta Señorman jaywarqa, iskay chunka iskayniyoj waranqa torosta, pachaj iskay chunkayoj waranqa ovejasta ima. Ajinata reyqa tukuy israelitaspis Diospa yupaychana wasinta paypaj t'aqarqanku.

⁶Sacerdotesqa ruwanasninkupi kasharqanku, jinataj levitaspis, sapa ujpis Señorpaj tocanasninkuwankama. Chaykunataqa rey David churasqa chay takejkunata takichinankupaj, wiñaypajmin khuyakuynenqa, nisqa takiyta, David maypachachus takej chaypacha. Sacerdotestaj paykunaj ñaupaqenkupi trompetasinkuta waqachisharqanku, chaykamataj tukuy israelitasqa chakipi sayasqas kasharqanku.

⁷Salomonqa Señorpaj t'aqapullarqataj patioj chaupinta, Señorta yupaychana wasej ñaupaqempi kasharqa chayta, chaypi uywasta ñak'aspa q'olachisqanrayku, allinyakuy wirastawan jaywasqanrayku. Chay broncemanta ruwasqa altarqa mana wakisqachu ñak'asqa uywasta q'olachinapaj, chanta ch'aki mikhuykunata, wirastawan ima jaywanapajpis.

⁸Chay kutipeqa Salomonwan tukuy israelitaspiwan may jatun tantakuyta ruwarqanku, Hamat llajtaman yaykunankama, chaymantapacha Egipto wayq'okama, chaypitaj qanchis diata jatun fiestata ruwarqanku.

⁹Qanchis kaj diapitaj uj jatun tantakuyta ruwarqanku, imaraykuchus qanchis p'unchay junt'ata fiestachasqanku, altarta Diospaj t'aqasqankurayku, qanchis diata jatun fiestata ruwasqankuraykutaj.

¹⁰Qanchis kaj killapi iskay chunka kinsayoj p'unchaynimpi, reyqa tukuy aylluta wasisninkuman ripunankupaj kacharpayaporqa, kusisqastaj sonqosninkupi Davidwan, Salomonwan jinataj tukuy Israel ayllunwampis, Señorqa allin kajta ruwasqanrayku.

¹¹Salomonqa Señorpa yupaychana wasinta, jinataj reypa wasinta, tukuy imastachus chaykunapi ruwananta, yuyasqantawan tukuchisqanmantañaqa, Señorqa Salomonman rikhurerqa tutapi, nerqataj: Mañakuwasqaykita uyarini, kay cheqatataj ajllakuni ñak'asqa uywasta jaywana wasipaj.

¹³Sichus apachimuyman uj ch'akiyta, manataj saqeymanchus paramunanta, chayri langostasta jamuchiyman camposta q'araykunankupaj, chayri aylluyman uj onqoyta apachimuyman chayqa, sitajchus sutiyta apan chay aylloyqa k'umuykakamuwanman, mañakamuwanman, mask'awanman, saqenmantaj sajra puriyninta chayqa, chaypacha noqa janaj pachamantapacha uyarisaj, juchasninmanta perdonasaj, jallp'ankumampis allin kayta kutichisaj.

¹⁵Kunanmantapacha qhawamusajpuni, uyarisajtaj allinta kay lugarpi mañakamuwasqasninkuta.

¹⁶Kunan yupaychana wasita ajllani, llimphuchanitaj, chaypi wiñaypaj sutiy kanampaj. Waqaychallasajpuni, yuyayniymantataj mana llojsenqachu.

¹⁷Kunanqa, qanchus sumajta ñaupaqeypi purinki, imaynatachus tatayki David purerqa, jinata, tukuy kamachisusqayta ruwaspa, jinataj qosusqay kamachiykunasniyta kasuspa, chanta tukuy nisusqasniytapis chayqa, noqa sayachisaj reinoykita tatayki Davidwan ruwasqayman jina; imaynachus nerqani mana pisinanta ayllumpi uj qhari wawa Israelta kamachinampaj.

¹⁹Qankunataj noqamanta t'aqakuwankichej chayqa mana junt'aspa leykunasniyta, kamachiykunasniyta qankunaman qorqaykichej chaykunata, manachayqa waj dioskunata kasuwajchej, yupaychawajchejtaj, chaypacha qankunataqa qorqaykichej chay jallp'amanta orqhosqaykichej, wijch'usajtaj ñaupaqeymanta yupaychana wasiyta llimphucharqani chayta, ruwasajtaj tukuy tiempo tukuy naciones ukhupi asipayasqapuni kananta.

²¹Kay yupaychana wasitaj may gloriayoj kasqampiwan, chaynejta tukuy pasajkuna t'ukunankupaj kanqa, nenqankutaj, tapurikonqankutaj, imaraykutaj Señorqa kay jinata ruwarqa kay jallp'ata, jinataj kay yupaychana wasitawampis, nispa.

²²Kutichenqankutaj ñaupa tatasninkuta, Egiptomanta orqhomorqa chay Señor Diosninkuta saqerparisqankurayku. Sinch'i kallpawantaj waj dioskunata jatunchanqanku, yupaychanqankutaj. Chayraykumá paykunaman chay jina jatun llakiyta apachimorqa.