Read Quechua Bolivia DC Bible ESDRAS 8 Bible Online

ESDRAS 8 - Quechua Bolivia DC Bible bible

ESDRAS 8

¹Kaykuna kanku sapa aylloj tatasninkoqa, sapa ujninkumanta qelqasqaman jina, Artajerjes kamachishajtin, Babiloniamanta noqawan khuska kutimporqanku chaykunaqa:

²Gersón, Fineespa mirayninmanta. Daniel, Itamarpa mirayninmanta. Hatús, Secaiaspa wawan, Davidpa mirayninmanta.

³Zacarías, Parospa mirayninmanta; paywan khuska pachaj phishqa chunkayoj qharis.

⁴Elioenai, Zeriaspa wawan, Pahat-moabpa mirayninmanta; paywan khuska iskay pachaj qharis.

⁵Jahazielpa wawan, Secaniaspa mirayninmanta; paywan khuska kinsa pachaj qharis.

⁶Ebed, Jonatampa wawan, Adimpa mirayninmanta; paywan khuska phishqa chunka qharis.

⁷Jesaias, Ataliaspa wawan, Elampa mirayninmanta; paywan khuska qanchis chunka qharis.

⁸Zabadías, Micaelpa wawan, Sefatiaspa mirayninmanta; paywan khuska pusaj chunka qharis.

⁹Obadías, Jehielpa wawan, Joabpa mirayinmanta; paywan khuska iskay pachaj chunka pusajniyoj qharis.

¹⁰Selomit, Josifiaspa wawan, Banej mirayninmanta, paywan khuska pachaj sojta chunkayoj qharis.

¹¹Zacarías, Bebaejpa wawan, Bebaejpa mirayninmanta; paywan khuska iskay chunka pusajniyoj qharis.

¹²Johanán, Hacatampa wawan, Azgadpa mirayninmanta; paywan pachaj chunkayoj qharis.

¹³Elifelet, Jeiel Semaiastaj, paykuna karqanku Adonicampa qhepa kaj miraynin; paykunawan khuska sojta chunka qharis. Tukuy paykunataj aswan qhepata kutiporqanku.

¹⁴Utai Zabudwan, Bigvaejpa mirayninmanta karqa; paykunawan khuska qanchis chunka qharis karqanku.

¹⁵Noqa Esdras tukuyninkuta tantaykorqani Ahava nisqa llajtaman mayu jamushan chaynejpi. Chaypitaj kinsa p'unchay junt'ata jarakorqayku. Maypachatajchus runasta jinataj sacerdotesta waturerqani chaypacha, paykuna ukhupitaj levitakunamanta ni mayqentapis tarerqanichu.

¹⁶Chaynejta kacharqani Eliezerta, Arielta, Semaiasta, Elnatanta, Jaribta, Elnatanta, Natanta, Zacariasta, Mesulamtawan. Paykunaqa kuraj runas karqanku. Ajinallataj Joiaribta, Elnatantawan, kaykuna yachachejkuna karqanku.

¹⁷Paykunata kamacherqani Idota watukunankuta, Casifia sutiyoj jallp'api kamachejta. Nillarqanitaj imatachus Idoman willanankuta, paypa yanapajkunasninman ima, paykunaqa Diosta yupaychana wasipi ruwajkunamanta Casifiapi kasharqanku, Diosninchejta yupaychana wasipi runasta pusamunawanchejpaj.

¹⁸Gracias Diosman kachun, Serebiasta pusamuwarqayku, sumaj yachayniyoj runata. Payqa Mahli sutiyoj levitaj mirayninmanta karqa. Wawasninwan wauqesninwantaj chunka pusajniyoj runas karqanku.

¹⁹Chantapis paykuna pusamuwarqayku Hasabiasta Jisaiastawan, paykunataj Merarej mirayninmanta karqanku. Wawasninwan wauqesninwantaj iskay chunka yupakorqanku.

²⁰Diosta yupaychana wasipi llank'ajkunamanta; chaykunaj tatasninkuta Davidwan, kamachejkunasninwan, levitasta yanapanankupaj churarqanku, chaykunaqa iskay pachaj iskay chunkayoj karqanku. Tukuyninku paykunaqa sutisninkurayku señalasqas karqanku.

²¹Chay qhepata Ahavá mayu qayllapi ayunota ruwanaykuta nerqani juchasniykumanta Diosniykoj ñaupaqempi k'umuykukunaykupaj, paymanta mañakunaykupaj, allillanta pusanawaykuta, familiasniykuta, jinallataj tukuy kapuwajniykutapis.

²²P'enqakorqani reymanta mañakuyta caballospi purej soldadosta, ñampi enemigosniymanta waqaychanawampaj. Imaraykuchus reyman nerqaykuña Diosqa waqaychaj kasqanta payta mask'ajkunata, urmachimusqantataj atiyninta phiñakuynintawan, payta saqerajkunaj patanman.

²³Ajinamanta ayunarqayku, mañakorqaykutaj Diosmanta kay tukuyrayku, paytaj uyariwarqayku.

²⁴Chanta, chunka iskayniyoj kamachejkunata sacerdotesmanta t'aqarqani: Serabiasta, Hasabiasta, chunka yapajkunasninkutawan.

²⁵Paykunamantaj qolqeta, qorita, Diosta yupaychanapaj imastawan pesaspa jaywarqani; chaykunata rey, chanta yupaychajkunasninwan, kurajkunawan, tukuy chaypi kaj israelitaspiwan qosqanku Diosninkoj yupaychana wasimpaj.

²⁶Paykunaman pesaspa jaywarqani, iskay chunka ujniyoj waranqa tawa pachaj phishqa chunkayoj kilo qolqeta, qolqemanta ruwasqa imasta pachajta, kinsa waranqa kinsa pachajniyoj kilo qoritawan.

²⁷Astawanqa iskay chunka qori vasosta, pusaj kilosniyojta, aswan sumaj broncemanta ruwasqa iskay lliphipej vasostawan, qorimantapis kankuman jina may valorniyojta.

²⁸Chanta paykunaman nerqani: Qankunaqa Señorpaj t'aqasqas kankichej, jinallataj Diosta yupaychanapaj, imaspis, qoripis, Señorpaj, tatasninchejpa Diosnimpaj kanku.

²⁹Kay imasta allinta qhawaychej, waqaychaychejtaj, Diosta yupaychana wasinman chayanaykichejkama. Jerusalempitaj Diosta yupaychana wasimanta cuartopi, sacerdotekunajta, levitakunajta, ñaupaqenkupi ima, Israel ayllumanta kurajkunasninkoj ñaupaqenkupi ima pesanaykichejkama.

³⁰Chaypacha sacerdotes, levitaswan jap'erqanku chay pesasqa qorita, Diosta yupaychanapaj imastawan, Jerusalenmantaj aparqanku Diosninkuta yupaychana wasiman.

³¹Ahava mayumanta purirerqayku, ñaupaj kaj killapi chunka iskayniyoj p'unchay kashajtin Jerusalén cheqaman rinaykupaj. Diosniyku yanapawarqayku, waqaychawarqaykutaj ñampi sajra runakunamanta wañuchinawaykupaj wateqajkunamantawan.

³²Jerusalenman chayaspa, kinsa p'unchayta samarikorqayku

³³Tawa kaj p'unchaypitaj pesasqa karqa chay qolqe, qori, chanta Diosninkuta yupaychana imaspiwan, Diosninkuta yupaychana wasimpi. Tukuynin chay imas qopusqa karqa Meremot sacerdoteman, Uriaspa wawan sacerdoteman qosqa karqa. Paywantaj kasharqanku Ferespa wawan Eleazar, levitakunamantataj karqanku, Josuejpa wawan Jozabad, Benuypa wawan, Noadías ima.

³⁴Chay p'unchaypacha tukuyninku pesasqa, yupasqa, qelqasqataj karqa.

³⁵Chay qhepata presochasqamanta kutirimojkuna tukuynin israelitaspa sutimpi qorqanku, chunka iskayniyoj waka uñasta, isq'on chunka sojtayoj carnerosta, qanchis chunka qanchisniyoj corderostawan Israelpa Diosnimpaj q'olachinankupaj. Chunka iskayniyoj chivosta juchaj cuentanmanta jaywarqanku. Tukuyninta q'olacherqanku Señorta jatumpaj qhawaspa.

³⁶Chaymanta reypa kamachisqanta qorqanku palaciopi kamachejkunaman. Chanta Eufrates mayumanta inti yaykuy ladopi kaj provinciapi kamachejkunaman. Paykuna llajtata yanaparqanku, jinallataj Diosta yupaychana wasipipis.