Read Quechua Bolivia DC Bible ESDRAS 9 Bible Online

ESDRAS 9 - Quechua Bolivia DC Bible bible

ESDRAS 9

¹Kay imas tukukojtintaj, kurajkuna qayllaykamuwarqanku israelitas, sacerdoteswan, levitaswan ima ninawampaj: Kay jallp'api kaj runakunamanta mana t'aqakunkuchu: Cananeosmanta, hititasmanta, fereseosmanta, jebuseosmanta, amonitasmanta, moabitasmanta, egipciosmanta, amorreosmanta, ima. Paykunaqa kay runaspa millay ruwanasninta ruwanku.

²Israelmanta kaj runasqa, jinataj wawasninkupis chay runakunaj warmi wawasninkuwan casararqanku. Ajinamanta waj llajtamanta kaj runakunawan llimphupaj qhawasqa aylloqa chajrukorqa. Kay juchata ñaupajta ruwajkunaqa, kurajkuna, kamachejkunawan karqanku, nispa.

³Kay jinata uyarispa sonqo nanayniyta rikuchinaypaj p'achayta llik'ikorqani, chujchayta, sunkhaytawan sik'irakorqani manchay phutisqataj tiyakorqani.

⁴Noqaman tantakamorqanku presochasqamanta kutirimojkunaj juchankurayku Israelpata Diosnimpa jasut'iyninta manchachikojkuna. Noqataj tiyaspallapuni karqani manchay phutisqa, ch'isiyaykuyta Diosman uywa wañuchisqata jaywana horaskama.

⁵Chay horaspi phutiyniymanta kutirerqani, chaywampis llik'isqa p'achaywanraj qonqoriykukuspa makisniyta Señor Diosniymanta oqharispa mañakuyta qallarerqani kay jinata: Diosníy, Diosníy, nispa. May p'enqaypi tarikuni, musphaykachashallani. Mana yachanichu imaynata qanman qayllaykusuyta. Pantasqaykoqa may jatumpuni, juchasniykutaj janaj pachakama chayamun.

⁷Unaymantapacha kunankamaqa may jatun juchapi kausayku. Sajra kausayniykurayku, noqayku, jinallataj reykunasniykupis, sacerdotesniykupis jap'ichisqas karqanku, waj llajtamanta reykunaj makisnimpi. Chantapis nanachisqas, wijch'usqas, suwasqas, p'enqachisqastaj karqanku. Kunankamataj jinallapuni kausashayku.

⁸Jinallataj kunanqa Señor Diosniyku, khuyakuyniykiman jina ruwakun uj puchoj llajta masiyku kacharisqa kananta, qampaj t'aqasqa jallp'api wasita ruwakunaykupaj. Qanqa mosoj k'anchayta rikuchiwarqayku, uj pisi kusisqa kausayta qoshawayku jap'isqa kausanayku chaupipi.

⁹Jap'isqapis kashajtiyku, mana saqewarqaykuchu presochasqa kashajtiyku. Khuyakuyniykita rikuchiwarqayku Persiapi kaj reypa ñaupaqempi. Qan kausayta qowarqayku, qanta yupaychana urmasqa wasiykita watejmanta ruwanaykupaj. Judapi jinallataj Jerusalempipis waqaychawarqayku.

¹⁰Kunanrí, Diosniyku, imata niyta atiykuman, chay tukuywampis mana allin imasta ruwasqaykumantari? Kamachisqasniykita mana junt'arqaykuchu.

¹¹Kamachisniyki profetasnejta kamachiwarqayku chaykunata. Qan willawarqaykuña kay jinata: Mayqen jallp'amanchus yaykuspa jap'inkichej chaypi kaj runakunaqa, chay jallp'api tiyakunku chay runakunaj sajra kausayninman urmasqas, chejninapaj jina mana allin ruwaykunawan, millay kausaykunata junt'aykucherqanku.

¹²Nillawarqaykutaj: Warmi wawasniykichejta qhari wawasninkuwan ama casarachinkichejchu. Paykunaj warmi wawasninkutapis ama qhari wawasniykichejwan casarachinkichejchu. Amataj jayk'ajpis mask'ankichejchu chay runakunaj kusiyninta, ni allinnintapis munaspa. Ajinamanta qankuna sinch'illatapuni sayankichej, chay jallp'amanta allin kajninta mikhunkichej, chaymantataj tukuy chayaqeta wiñaypaj mirayniykichejman saqenkichej, nispa.

¹³Mana allin imasta ruwasqankurayku, jatun juchankuraykutaj, tukuy kay imas chayamuwarqayku. Chaywampis mana ruwasqaykuman jinachu jasut'iwarqayku, manachayqa kacharisqa kausayta tarerqayku.

¹⁴Chantapis, kamachisqasniykita p'akillaykumampunichu, chay millay ruwayniyoj runakunawan aylluchakuspa? Manachu qanqa contraykuta phiñakuwaj, t'unaykuwaykumantaj mana ujllapis kausayniyoj qhepakunaykukama?

¹⁵Señor, Israelpa Diosnin, qan cheqan karqanki noqaykuwan. Qan munarqanki noqaykumanta uj puchoj t'aqa kausanaykuta, imaynatachus kunan p'unchay rikukusqanman jina. Noqaykoqa cheqamanta ñaupaqeykipi juchayoj kayku, ajinallatapuneqa mana ñaupaqeykipi kayta atiykumanchu, nispa.