Read Quechua Bolivia DC Bible NEHEMÍAS 10 Bible Online

NEHEMÍAS 10 - Quechua Bolivia DC Bible bible

NEHEMÍAS 10

¹Chay tratota ruwasqankuman sutisninkuta qelqajkunaqa karqanku: Hacaliaspa wawan kamachej Nehemiaswan, Sedequiaswan. Sacerdotestaj karqanku: Seraías, Azarías, Jeremías, Pasur, Amarías, Malquías, Hatús, Sebanías, Maluc, Harim, Meremot, Obadías, Daniel, Ginetón, Baruc, Mesulam, Abías, Mijamín, Maazías, Bilgai, Semaías ima.

⁹Levitastaj karqanku: Azaniaspa wawan Josué, Binuytaj Henadadpa mirayninmanta karqa, Cadmielwan, jinataj wauqesnin Sebanías, Hodías, Quelita, Pelaías, Hanán, Micaía, Rehob, Hasabías, Zacur, Serebías, Sebanías, Hodías, Bani, Beninu ima.

¹⁴Israel aylluta kamachejkuna karqanku: Paros, Pahat-moab, Elam, Zatu, Bani, Buni, Azgad, Bebai, Adonaías, Bigvai, Adín, Ater, Ezequías, Azur, Hodías, Hasum, Bezai, Harif, Anatot, Nebai, Magpías, Mesulam, Hezir, Mesezabeel, Sadoc, Judúa, Pelatías, Hanán, Anaías, Oseas, Hananías, Hasub, Halohes, Pilha, Sobec, Rehum, Hasbana, Maasías, Ahías, Hanán, Anán, Maluc, Harim, Baana ima.

²⁸Kay tukuy Israel ayllumanta kajkunapiwan, chay sacerdotes, levitas, punku qhawajkuna, takejkuna, yupaychana wasipi imastapis ruwajkuna, tukuy chay llajtayoj runasmanta Diospa junt'anankupaj t'aqakojkuna, warmisninkuwan khuska, qhari wawasninkuwan, warmi wawasninkuwan, tukuy yuyayniyoj yachaqajkunapiwan, familiasninkuwan jinataj kurajkunasninkuwan tantaykukorqanku Dioswan uj tratota ruwanankupaj. Jurarqanku Diospa leyninman jina purinankupaj. Chaytaj qosqa karqa Diospa kamachin Moisesnejta. Ajinamanta mana pantaspa junt'anankupaj Señor Diosninkoj kamachisqasninta, nisqasninta, leykunasninta ima.

³⁰Kay jallp'api tiyakojkuna runasmanqa mana warmi wawasniykuta casaranankupaj qoykumanchu, nillataj munaykumanchu chay warmi wawasninkupis qhari wawasninkuwan casaranankuta.

³¹Chayrayku, kay llajtayoj runasmanta tukuy laya granosta, poqochisqasninkutapis samakuna p'unchaypi, nitaj ni mayqen yuyarikuna fiesta p'unchaypipis, apamuwaykuman chayqa, mana imatapis rantiykumanchu. Ajinallatataj qanchis kaj watapeqa jallp'asninkuta samarichiykuman, manusniyku kajtapis perdonapuykuman.

³²Ajinallatataj nerqayku, sapa wata tawa gramos qolqeta qonaykutapuni Diosniykoj yupaychana wasinta yanapanapaj.

³³Qollarqaykutaj Diospa ñaupaqempi nisqa t'antapaj, sapa día poqojkunamanta jaywanata, sapa día ch'aki mikhuy jaywanata jaywanapaj, sapa día q'olachinaspaj sapa killa ñaupaj diapi samakuna p'unchaypi jaywanaspaj, waj fiestaspi jaywanaspaj, tukuy laya jaywanaspaj, Israelpa juchasninmanta perdonta tarinapaj nisqa jaywanaspaj, jinallataj Diosniykoj yupaychana wasimpi ruwanapajpis.

³⁴Chay jawaqa, sacerdotes, levitas, tukuy ayllupis, sapa familiasninkuman jina suertesta choqarqayku apanaykupaj Diosniykoj yupaychana wasinman, llant'ata sapa wata apanaykupaj, mayk'ajpajchus apan karqa chayman jina, Señor Diosniykoj altarnimpi ruphachinapaj Moisespa leynimpi qelqasqa kasqanman jina.

³⁵Jinallatataj parlanakorqayku sapa wata apanaykupaj Diosniykoj yupaychana wasinman chajrasniykoj ñaupajta poqoj chajrasniykumanta, jinataj tukuy poqoj sach'asniykumantapis.

³⁶Jinallatataj aparqayku Diospa yupaychana wasinman kuraj kaj qhari wawasniykuta, wakasniykoj kuraj kaj uñasninta, ovejasniykumantapis, leypi qelqasqa kasqanman jina, yupaychana wasipi kaj sacerdotesniykoj ñaupaqempi.

³⁷Jinallatataj parlanakorqayku Diosniykoj yupaychana wasimpi jallch'anasninman, sacerdotesman apanaykuta aswan allin kaj jak'usniykuta, poqoj sach'asniykoj poqoykunasninta, vinosniykumanta, jinataj aceiteykumanta aswan allin kajninta. Chanta nillarqaykutaj apanaykuta, levitasman tukuy chajra poqoykunasniykumanta chunkaman t'aqaspa ujnin kaj t'aqata. Paykunapuni tukuy llajtasniykupi chay chunkamanta ujnin t'aqa kajta, chay chajra poqoykunasniykumanta jap'inanku karqa.

³⁸Poqoykunamanta chunkaman t'aqasqata ujnin kaj t'aqata levitas tantamoj rejtinku paykunawan khuska Aarompa mirayninmanta uj sacerdote rinan tiyan. Chaymantataj levitasñataj apananku tiyan Diosninkoj yupaychana wasinman, mikhuna jallch'ana wasisninman, chay chunkaman t'aqasqasmanta ujnin kajta tukuy jap'isqankumanta.

³⁹Israelitas, jinataj levitaspis apanqanku Señorman qonankuta: Trigomanta, vinomanta, aceitemanta ima, yupaychana wasipi jallch'ana kashanku chayman, llimphupaj qhawasqa imas kashanku chaykunawan, sacerdotes, ruwajkuna, chayman punku qhawajkunapis, jinataj takejkunapis kashanku chayman. Nerqaykutaj tratopi ruwaspa Diosniykoj yupaychana wasinta mana saqerparinaykuta.