Read Quechua Bolivia DC Bible NEHEMÍAS 2 Bible Online

NEHEMÍAS 2 - Quechua Bolivia DC Bible bible

NEHEMÍAS 2

¹Uj diapi Nisán nisqa killapi iskay chunka watastaña rey Artajerjes kamachishajtin, vinota oqhariytawan payman jaywarqani. Reytaj sinch'i llakisqata rikuwarqa.

²Tapuriwarqataj: Imamanta llakisqa uya kashankiri? Imataj qhatirisunkiri? Mana onqosqapischu kashanki, ima llakiyniykichari tiyan, nispa. Chay ratopacha sinch'ita mancharikorqani.

³Reytataj nerqani: Wiñaypaj kausayniykeqa kachun reyníy! Imaraykutaj mana llakikusajchuri? Tatasniy p'ampasqas kashanku chay llajtasqa raqaykunasllaña, punkusnimpis ninaj q'olasqan.

⁴Imatataj qanrayku ruwaymanri?, nispa reyqa tapuriwarqa. Chaypacha janaj pachapi kaj Diosmanta mañarikorqani.

⁵Reymantaj kuticherqani: Sichus qan reyniyman allin rijch'asunki chayqa, khuyayniykitataj tarini chayqa, qanmanta mañayki Judaman kachanawaykita, ñaupa tatasniy p'ampasqas kashanku chay llajtaman watejmanta jatarichimunaypaj.

⁶Reyqa ladompi reina tiyashajtin kutichiwarqa; Mayk'ajkamataj rinkiri? Mayk'ajtaj kutimpunkiri?, nispa. Noqa willarqani mayk'ajchus kutimpunayta, paytaj rejta saqewarqa.

⁷Chaywampis nerqani: Sichus allin kajta ruwawaj chayqa, qowankiman uj qelqasqa kamachiyta kamachejkunapaj chay Eufrates mayuman inti llojsimuy ladopi kajkunaman, jinamanta saqenawankupaj Judakama chayajta.

⁸Waj qelqasqa kamachiytataj apachiway Asafman. Payqa reypa sach'a montesninta qhawajnin, maderata qonawampaj, chaywan Diosta yupaychana wasej qayllampi punkusta wisq'aykunaypaj, jinallataj llajtaj perqasnimpaj, chanta maypichus tiyakusaj chay wasipajpis, nispa. Reytaj tukuy mañasqayta qowarqa, Diospa yanapayninwan kasqayrayku.

⁹Chaytaqa Eufratesmanta inti llojsimuynejpi kashanku chay kamachejkunaman chayarqani. Chaypacha reypa qelqasqan kasqanta paykunaman jaywarqani. Reyqa noqawan kachallarqataj soldadosta kamachejkunata, caballospi rejkuna soldadostawan.

¹⁰Horonmanta Sanbalatwan, kamachej amonita Tobiaswan, chayta yachaspa sinch'ita phiñakorqanku, israelitasta allinman yanapayta munaspa chayamojpaj.

¹¹Jerusalén llajtaman chayamorqani. Chaypitaj kinsa diasta karqani.

¹²Chaymantaqa tuta jatarikorqani noqawan rej wakin runaswan, manataj pimampis nerqanichu imatachus Dios sonqoyman churawasqanta Jerusalempi ruwanaypaj chaymantaqa. Mana waj caballostaqa aparqanichu, mayqempichus purisharqani chayllata aparqani.

¹³Chay kikin ch'isipacha llojserqani, Valleman llojsina punku nisqa chayninta, chanta Dragón yaku juturi nisqa chayninta, Q'opa jich'ana nisqa chay punkunejman. Qhawarqanitaj Jerusalempa urmasqa perqasninta, ruphasqa punkusnintawan.

¹⁴Chaymantataj rillarqanipuni yaku juturi sutiyoj llojsina punkunejta, chantá reypa yaku qochan chaynejtapis, jinapis caballoyqa mana chayninta pasayta aterqachu.

¹⁵Allin tutaraj kajtintaj chay wayq'onta pataman wicharerqani. Chay perqasta qhawaqaspañaqa kutiporqani Valleman llojsina nisqa punkunta yaykupuspa kutipuspa.

¹⁶Chay llajtapi kamachejkunaqa mana yacharqankuchu maymanchus noqa risqayta, nitaj imata ruwaspachus noqa purishasqaytapis. Nillataj noqapis chaykama pi judiosmampis willarqanichu. Niyta munani chay sacerdotesman, kamachejkuna sumachaj runasmampis nillataj ujkunamampis, pischus yanapanawayku karqa chaykunamampis.

¹⁷Kay jinatataj paykunaman nerqani: Qankuna allinta yachankichej jinaqa sinch'i llakiypi rikukusqaykichejta, Jerusalén llajtanchejqa raqaykunasllapiña kashan, punkusnimpis ninaj q'olasqasnin kashanku. Noqawan ujchakuychej, Jerusalempa perqanta watejmanta jatarichinachej amaña asipayachikunanchejpaj, nispa.

¹⁸Chanta willarqani Dios chhikata khuyakuyninwan yanapwasqanta, jinataj imastachus rey parlawasqasninmantapis. Paykunataj kutichiwarqanku: Perqata watejmanta oqhariyta qallarinapacha. Ujkuna ujkunataj sumaj sonqowan kallpachakorqanku.

¹⁹Horonmanta Sanbalatwan, kamachej amonita Tobiaswan, chanta árabe Gesempis chayta yachaspa noqanchejmanta asiykukuwarqayku, qhesachaspataj niwarqayku: Imatataj pakaymanta ruwanayashankichejri? Reypa contrampichu oqharikuyta munashankichej?, nispa.

²⁰Noqataj nerqani: Janaj pachapi kaj Dios atipachiwasqayku. Noqayku kay kamachisqa watejmanta perqasninta jatarichisqayku. Qankunataj Jerusalenwanqa mana imatapis ruwanaykichejchu tiyan.