Read Quechua Bolivia DC Bible NEHEMÍAS 3 Bible Online

NEHEMÍAS 3 - Quechua Bolivia DC Bible bible

NEHEMÍAS 3

¹Chaypacha kuraj kaj sacerdote Eliasibwan, sacerdote masisninwan Ovejaspa yaykunan Punku nisqata ruwarqanku. K'aspistaraj churaspa punkusta churaykaporqanku, perqatataj oqharerqanku. Pachajkuna nisqa torremantapacha Hananeel nisqa torrekama.

²Chaymanta rej perqatataj Jericomanta kajkuna oqharerqanku. Chaymanta rej perqatataj ruwarqa Irmej wawan Zakur.

³Senaaj mirayninmanta kajkunataj Challwa nisqa punkuta jataricherqanku. K'aspita churaykuytawankama punkusninta churaykorqanku llavenasnintinta jark'anasnintawa.

⁴Chaymanta rej perqatataj Cospa allchhin Uriaspa wawan Meremot. Chaymanta rej perqatataj ruwarqa Mesezabeelpa allchhin Berequiaspa wawan Mesulam. Qhepantataj ruwarqa Baanaj wawan Sadob.

⁵Chaymanta rej perqatataj Tecoamanta kajkuna ruwarqanku. Allichaj runasnenqa mana munarqankuchu yanapayta chay ruwachejkuna kurajkunata.

⁶Paseah wawan Joiada, Besodiaspa wawan Mesulam ima ruwarqanku Jesana Punku nisqata. K'aspista churaykuytawankama wisq'anasta churaykorqanku, fierro trancana barranta ima.

⁷Chaymanta rej perqatataj ruwarqanku Gabaonmanta chay Malatías, Meronotmanta Jadón, chanta Gabaonmanta Mizpamanta ima runas. Chaykunaqa Efratesmanta inti llojsimuy ladomanta kajpa kamachejkunajta karqanku.

⁸Chaymanta rej perqatataj Harhaíaj wawan Uziel ruwarqa. Chay runaqa qolqeta llajllajkunamanta karqa. Chaymanta rej perqatataj Hananías ruwarqa, payqa q'apaj jampista ruwayta yacharqa. Paykuna iskayninku ruwarqanku Jerusalén perqamantapacha ancho perqakama.

⁹Chaymanta rej perqatataj Hurpa wawan Refaías ruwarqa. Payqa Jerusalén khuskan llajtata kamachej karqa.

¹⁰Chaymanta rej perqatataj Harumafpa wawan Jedaías ruwarqa; wasin chimpallapi chay ruwananqa karqa. Chaymanta rej perqatataj Hasabniaspa wawan Hatús ruwarqa.

¹¹Chaymanta rej perqatataj Harimpa wawan Malaquiaswan, chanta Pahat-moabpa wawan Hasubwan ruwarqanku. Hornos Torre nisqatapis paykunallataj ruwarqanku.

¹²Chaymanta rej perqatataj Halohespa wawan Salum, chantá warmi wawasnin ima ruwarqanku. Payqa Jerusalén llajtaj ujnin kaj khuskannimpa kamachejnin karqa.

¹³Hanunwan, chanta Zanoapi tiyakojkunawan ruwarqanku valleman yaykuna punku nisqata. Wisq'anasnintataj churaykaporqanku, llavesninta fiero trancana barrasnintinta. Ruwarqankutaj tawa pachaj phishqa chunkayoj metros perqata chay Q'opa wijch'una punku nisqakama.

¹⁴Recabpa wawan Malquistaj ruwarqa Q'opa wijch'una punku nisqata. Wisq'anata ruwaykaporqa llavesnintinta, barrantinta. Payqa llajta ukhupi Bet-haquerem nisqa cheqapi kamachej karqa.

¹⁵Colhozej wawan Salumtaj Mizpa chaynejmanta kamachej karqa, ruwarqataj Yaku Qocha Punku nisqata. Payqa techonta ruwaspa wisq'asnasnintinta churaykaporqa llavenasnintinta, chay barrasnintawan. Ruwallarqataj reypa t'ika huertan nisqa chaynejpi, Siloi qocha chaynejpi perqata, Davidpa llajtanman uraykuna gradas chaynejkama.

¹⁶Azbucpa wawan Nehemiastaj chaymanta rej perqata ruwarqa, payqa Bet-sur llajtaj khuskanninmanta kamachej karqa, Davidpa ayan p'ampasqa kashan chay chimpakama. Chaymanta yaku churanakamataj, jinataj soldadospa yachananku wasikama.

¹⁷Chaymanta rej perqataj levitas ruwarqanku: Banej wawan Rehum, aswan ñaupajmantaj Hasabías ruwarqa, payqa Keila llajtapi kamacherqa, llajtampa sutimpitaj ruwarqa.

¹⁸Chaymanta rej perqatataj ruwarqanku masisninmanta, Hanadadpa wawan Bavaiwan. Payqa Qeila llajta ukhupi uj cheqapi kamachej karqa.

¹⁹Josuejpa wawan Ezertaj ruwarqa chay esquinapi armasta jallch'ana wasiman wicharinaj chimpampi, payqa Mizpa llajtapi kamachej karqa.

²⁰Chaymanta rej perqatataj Zabaejpa wawan Baruc ruwarqa, esquinasninmantapacha jatun sacerdote Eliasibpa wasi punkunkama.

²¹Chaymanta rej perqatataj Uriaspa wawan Meremot ruwarqa, payqa Cospa allchhin karqa, Ruwarqataj Eliasibpa wasi punkunmantapacha chay wasin tukuykuyninkama.

²²Chaymanta rej perqatataj Jordán vallepi tiyakojkuna sacerdotes ruwarqanku.

²³Chaymanta rej perqatataj ruwallarqankutaj Benjaminwan, Hasubwan wasinku chimpapi karqa chayta. Chaymanta rej perqatataj Maasiaspa wawan Azarías Ananiaspa allchhin ruwallarqataj. Chaynejpi paypa wasin karqa.

²⁴Chaymanta rej perqatataj Henadadpa wawan Binuy ruwarqa Azariaspa wasinmantapacha kikin esquinakama.

²⁵Chaymanta rej perqatataj Uzaejpa wawan Palal ruwarqa esquinaj chimpan perqata, chantá reypa palaciompi aswan jatun kaj torrentawan ruwarqa, chaytaj soldadospa patiompi kashan. Chaymanta rej perqatataj Farospa wawan Pedaías ruwarqa,

²⁶Yaku punku nisqa chay chimpamantapacha inti llojsimuynejman jina, chanta chay aswan jatun kaj torretawan. Ofelpi tiyakojkunaqa Diosta yupaychana wasipi ruwajkuna karqanku.

²⁷Tecoamanta kajkunataj chaymanta rej perqata ruwarqanku, chay jatun torrej chimpanmantapacha Ofelpa perqasninkama.

²⁸Sacerdotespis sapa uj wasisninku chimpampi kajta ruwarqanku, Caballos punku nisqa chaynejmantapacha.

²⁹Chaymanta rej perqatataj Imerpa wawan Sadoc ruwallarqataj wasin chimpapi kashan chayta. Chaymanta rej perqatataj Secaniaspa wawan Semías ruwarqa. Payqa inti llojsimuy punku nisqata qhawaj soldados karqa.

³⁰Chaymanta rej perqatataj ruwallarqataj Selemiaspa wawan Hananías, Hanonwan khuska. Hanonqa Salafpa sojta kaj wawan karqa. Chaymanta rej perqatataj Berequiaspa wawan Masulam, wasin chimpata ruwarqa.

³¹Chaymanta rej perqatataj Malquías ruwarqa. Payqa qolqeta llajllayta yacharqa, ruwarqataj yupaychana wasipi ruwajkunaj wasinkukama, jinataj qhatojkunaj wasinkukama, chay Qhawana Punku nisqa chimpapi, chay chawana esquinakama.

³²Qolqe ruwajkunawan chay qhatojkunawan ruwallarqankutaj chaymanta rej perqata, chay esquinapi soldadospa qhawananku chaymantapacha Ovejas punku nisqa chaynejkama.