Read Quechua Bolivia DC Bible NEHEMÍAS 6 Bible Online

NEHEMÍAS 6 - Quechua Bolivia DC Bible bible

NEHEMÍAS 6

¹Sanbalat, Tobías, árabe Gesem, jinataj chay ujkuna enemigos ima yacharqanku noqa watejmanta perqata oqharichisqayta mana uj q'asayojta saqespa chaywampis punkus churana karqaraj maypichus karqa chaykunasman.

²Sanbalat, jinataj Gesempis willachimuwarqayku tantakunaykuta Ono vallepi kaj ujnin ranchopi. Paykunataj yuyarqanku noqaqa ima sajratapis ruwayta.

³Chaypacha noqa willajkunata kacharqani nichispa, uj sumaj ruwanapi kaspa mana tiempoyoj kashasqayta, manataj riyta atisqayta. Paykunawan tinkoj rejteyqa llank'anay sayakapunanta willachispa.

⁴Kikin willayta apachimuwarqanku tawa kutista, sapa kutipiri kikillantapuni kuticherqani.

⁵Chaypacha Sanbalatqa, phishqa kaj kutitaña ujnin uywasqannejta chay willayta apachimullawarqataj uj kicharisqa cartapi.

⁶Chay cartaqa kay jinata nerqa: Runas parlashanku, chanta Gesempis nillantaj, qan, jinataj judiospis yuyashankichej reypa contrampi oqharikuyta. Chayraykutaj perqata watejmanta oqharichishankichej. Chay nisqasninkuman jinaqa qan reyninku kanki.

⁷Profetasta churankiña Jerusalempi reypaj ajllanasunkuta ninankupaj Judá jallp'api rey kasqantaña. Chay ch'ajwaykunasta rey Artajerjes uyarispa ima nenqachu. Ajinaqa jamuy ari, iskayninchej parlarisunchej, nispa.

⁸Chaypacha noqa kuticherqani willachispa, chay tukoyqa mana jinachu kasqanta. Manachayqa nerqani, chaykunaqa yuyayninmanta orqhosqalla kasqanta.

⁹Paykunaqa mancharichiyta munawarqanku jinamanta iskayrayanaykupaj, manataj llank'anata tukuychanaykupaj; chaywampis noqaqa aswan kallpawanraj ruwarqani.

¹⁰Chaymanta Delaíaj wawan Semaiaspa wasinman rerqani. Payqa Mehetabelpa allchhin karqa. Payqa wasimpi wisq'aykukuspa kasharqa, niwarqataj: Diosta yupaychana wasimpi tantaykukunachej, chay llimphupaj qhawasqa kaj wasin ukhupi, punkusninta wisq'aykukunachej, kunan ch'isi wañuchej jamuyta wakichikushanku, nispa.

¹¹Noqataj kuticherqani: Noqa jina runasqa mana ayqenkuchu, nitaj Diosta yupaychana wasiman ayqeykunkuchu kausayninkuta salvakunankuraykullaqa. Noqaqa mana pakakusajchu, nispa.

¹²Chay jawaqa repararqani, payqa mana Diospa nisqantachu parlawasqanta. Manachayqa chay tukuyta nisharqa Sanbalat, jinataj Tobías pakaymanta lluk'iykusqanrayku.

¹³Chayta lluk'iykorqanku noqata mancharichinawankurayku, jinamanta juchallichinawankupaj. Chay jinamanta sajrapi rikhurinaypaj, p'enqaypitaj rikhurichinawanrayku.

¹⁴Diosníy: Yuyarikuy ari Sanbalatwan, Tobiaswan ruwasqankumanta. Nillataj qonqapuychu warmi profetisa Noadiasmanta, nillataj qoqapuychu chay waj profetasmantapis mancharichiyta munawarqayku chaykunamanta.

¹⁵Chay perqaqa tukusqa karqa Elul killamanta iskay chunka phishqayoj p'unchaynimpi. Chaytataj ruwarqayku phishqa chunka iskayniyoj diaspi.

¹⁶Enemigosniyku qayllasniykupi tukuy kaj nacionespis chayta yachaspa, mayta mancharikorqanku. Chay wapu wapu kajkunamanta k'umuykukorqanku, tukuy ruwasqaykupi Dios yanapawasqaykuta yachaspa.

¹⁷Chay diaspeqa kutin kutinta cartasta Tobiaswan Judamanta kuraj kaj runasninwan apachinakorqanku.

¹⁸Judá ayllumanta ashkha runas Tobiaswan ujchakusqanku Araj wawan Secaniaspa tolqan kasqanrayku. Mesulamqa Berequiaspa wawan karqa.

¹⁹Chayrayku Tobiasqa allin ruwasqasninmanta noqaj uyarinayta mayta alabaj kanku, noqaj nisqaytapis willarqamojpacha kanku. Tobiastaj cartasta qelqamuwaj mancharichiwayta munaspa.