Read Quechua Bolivia DC Bible NEHEMÍAS 8 Bible Online

NEHEMÍAS 8 - Quechua Bolivia DC Bible bible

NEHEMÍAS 8

¹Chaypacha tukuy ayllu ujllapi tantakorqanku, Yaku Punku nisqaj ñaupaqen plazapi. Yachachej Esdrasmantaj nerqanku Moisespa leynin qelqasqa librota apamunanta, Señorqa Israel aylluman qosqa chayta.

²Qanchis kaj killamanta ñaupaj kaj diapi sacerdote Esdrasqa laymanta qelqasqa librota apamorqa qharis, warmis, tukuy yuyayniyoj yachaqajkunapis tantasqas kashajtinku.

³Sut'iyaymantapacha chaupi p'unchaykama tukuypa ñaupaqempi leerqa, Yaku Punku nisqaj ñaupaqen plazapi. Tukuy ayllustaj sumajta uyarisharqanku chay leyniyoj qelqasqa libromanta leesqankuta.

⁴Yachachej Esdrastaj sayasharqa maderamanta ruwasqa patachapi. Chay kutillapaj chaytaqa ruwasqanku. Paña ladompitaj sayasharqanku: Matatías, Sema, Anías, Urías, Hilcías, Maasías ima. Lloq'e ladompitaj sayasharqanku: Pedaías, Misael, Malquías, Hasum, Hasbadana, Zacarías, Mesulam ima.

⁵Chaypacha Esdrasqa librota kicharejtin tukuy ayllu rikorqanku, tukuyninkumanta astawan patapi sayashasqanrayku. Librota kicharejtinkamataj tukuy ayllu sayarikorqanku.

⁶Chaypacha Esdrasqa Tukuy Atiyniyoj Señor Diosta yupaycharqa, tukuy ayllutaj makisninkuta patata oqharispa kuticherqanku: Ajina kachun, ajina kachun, nispa. Chaymantataj pampakama k'umuykuspa Señorta yupaycharqanku.

⁷Kay levitas: Josué, Bani, Serebías, Jamín, Acub, Sabetai, Hodías, Maasías, Kelita, Azarías, Jozabet, Hanan, Pelaía ima ayllutinman leymanta yachachisharqanku. Chaykamataj runasqa kikin sayasqallankupipuni kasharqanku.

⁸Paykunaqa sut'ita qhaparispa leerqanku Diospa leynin qelqasqa librota. Leesqankutataj allinta sut'inchaspa uyaricherqanku.

⁹Tukuynin ayllutaj chay leymanta librota leesqankuta uyarispa waqarqanku, kamachej Nehemías, chanta yachachej sacerdote Esdraspis, leymanta yachachejkuna levitaspis, tukuy runasmantaj nerqanku: Ama llakikuychejchu, amataj waqaychejchu, kay diaqa Señor Diosman t'aqasqa kasqanrayku, nispa.

¹⁰Chay jawa Esdrasqa nillarqataj: Riychej, sumaj sumajllata mikhumuychej, misk'i kaj vinotataj ujyarikamuychej; mana mikhuna chayasqayoj kajta wajyarikuychej, kay diaqa Señorpaj t'aqasqa kasqanrayku. Ama llakikuychejchu, imaraykuchus Señorpa kusikuynenqa kallpachawanchej, nispa.

¹¹Ajinallatataj levitaspis runasta ch'inyacherqanku, nerqankutaj amaña waqaychejchu, kay diaqa Señorpaj t'aqasqa kasqanrayku.

¹²Chaypacha tukuynin runas riporqanku mikhoj, ujyajtaj. Mikhuytapis wajkunaman jaywarerqanku, sumaj fiestataj ruwarerqanku, imaraykuchus uyarisqasninkuta sumajta umankupi jap'erqanku.

¹³Q'ayantin diataj, sapa familiamanta kurajkunasninku, chanta sacerdote, levitaspis, yachachej Esdraswan tantakorqanku, ley imatachus nisqanta yachanankupaj.

¹⁴Chaypitaj tarerqanku Señorpa kamachisqan Moisesnejta qelqasqa kasqanta, chay qanchis killa kaj yuyarikuy fiestata ruwashaspaña ramadas ukhupi israelitasqa tiyakunankuta.

¹⁵Chaypacha tukuy llajtapi, jinataj kikin Jerusalenmampis willachimorqanku runasqa monteman mask'aj rinankuta iskay laya olivo ramasta, arrayan ramasta, palmera ramasta, chayri waj ima ch'ampa sach'aspa ramasnintapis, chaymantataj ramadasta ruwanankupaj, leypi qelqasqa kasqanman jina.

¹⁶Runasqa llojserqanku, kutimuspataj sach'a ramaswan ramadasta ruwarakorqanku wasi pataspi, patiospi, Diosta yupaychana wasimpa patiompipis, Yaku Punku nisqa plazapipis, Efraín Punku nisqa plazapipis.

¹⁷Presochaspa apachisqas waj llajtasmanta kutimpojkuna, tukuy runaspis ramadasta ruwakorqanku, chaypitaj tiyakorqanku, Numpa wawan Josuejpa tiemponmantapacha chay diakama manaraj jayk'ajpis chayta ruwasqankuchu. May jatun kusiytaj chaypacha karqa.

¹⁸Qanchis diatapuni Diosta yuyarikunanku fiestata ruwarqanku. Ñaupaj kaj diamantapacha tukukunan p'unchaykama Esdrasqa sapa día leellarqapuni Diospa leynin libromanta. Pusaj kaj p'unchaypitaj yachasqaña kasqanman jina jatun tantakuyta ruwarqanku.