Read Quechua Bolivia DC Bible TOBIT 1 Bible Online

TOBIT 1 - Quechua Bolivia DC Bible bible

TOBIT 1

¹Kay libroqa Tobitpa kausayninmanta willan. Tobitqa Tobielpa wawan karqa. Tobieltaj Ananielpa wawan. Ananielrí Aduelpa wawan. Aduelrí Gabaelpa wawan. Gabaelrí Rafaelpata wawan. Rafaeltaj Ragüelpata wawan. Tukuyninkojpata ñaupa tatanku Asiel karqa. Asieltaj Neftalí ayllumanta karqa.

²Salmanasar Asiriapi rey kashajtintaj, Tobitqa Tibé llajtamanta qharqosqa karqa. Chay Tibé llajtaqa Neftalimanta Cedes llajtaj urannejpi kashan, Pata Galileapi, Asor llajtamanta aswan karupiraj, inti yaykuy ladopi, Sefat llajtaj patannejpi.

³Noqa, Tobit, cheqantapuni purej kani tukuy kausayniypi, sumaj kajllatataj ruwaj kani. Ashkha qolqeta qoj kani ayllusniyman, llajta masisniymampis, noqawan khuska wijch'usqas karqanku Asiriaman, Nínive llajtaman, chaykunaman.

⁴Tiyakushallajtiyraj llajtaypi, Israel ayllupi, waynallaraj kashajtiy, Neftalí ñaupa tataypa tukuy ayllun, rey Davidpa familianmanta, Jerusalén llajtamantataj t'aqakorqa. Chay Jerusalén llajtaqa tukuy ayllus ukhumanta ajllasqa karqa, chaypi tukuy ayllus rikuchikusninkuta Diosman jaywanankupaj. Chaypi templota ruwarqanku, maypichus Dios tiyakun chayta. Chay templotaqa Diospajpuni oqharerqanku wiñaypaj.

⁵Chaypacha, tukuy Israel aylluswan khuska, Neftalí ñaupa tataypa ayllonqa, rikuchikusta jaywaj kasqa chay torilloman, mayqentachus Israelpa reynin Jeroboam oqharichisqa Dampi, Galilea orqos patapi.

⁶Mashkha kutis, noqa sapitallay Jerusalenman rej kani, fiestaspaj, imaynatachus tukuy Israelman kamachisqa kashan wiñaypaj. Usqhayllata purej kani Jerusalenman cosecha oqharikusqaypa ñaupa poqoyninta apaj, kuraj uywastapis. Apallajtaj kani sapa chunka ovejasniymanta ujta. Ajinallatataj, millmatapis, ñaupajta ruthukusqay chayta.

⁷Tukuy chaytaqa Aarompa wawasnin sacerdotesman jayway kani, altarpaj. Levitasmanrí, Jerusalén templopi sirvejkuna chaykunaman, qoj kani trigota, vinota, aceiteta, granadasta, higosta, waj poqoykunata ima. Tukuy chaykunataqa sapa chunkamanta ujta qoj kani. Chantapis, sojta wata junt'ata, puchusqanmanta, sapa chunkamanta ujta qhatuman apaj kani.

⁸Ajinallatataj, wakinta wajcha wawasman, warmi sapasmampis qoj kani. Chaymantataj, karu llajtayojkunamampis, israelitas ukhupi tiyakunku chaykunaman qollajtaj kani. Chaytaqa paykunaman jaywaj kani sapa kinsa watata. Puchojtataj mikhuykoj kayku yuyarikuspa Moisespa kamachisqanmanta, yuyarikuspataj imatachus yachachiwarqayku jatun mamay Débora, Ananiel tataypa maman. Tatayqa wañupusqaña wajchata saqerpariwaspa.

⁹Jatunña kajtiy, aylluymanta kaj warmiwan casarakorqani. Paypa sutenqa Ana. Payqa uj wawata nacechipuwarqa, pitachus Tobiasta suticharqani.

¹⁰Asiriaman wijch'usqata apawajtinku, noqaqa Nínive llajtaman chayarqani. Aylluymanta kajkunaqa, waj israelitaspis, mana creejkunaj mikhuyninkuta mikhullajtaj kanku.

¹¹Noqarí, mamapuni mikhojchu kani mana creejkunaj mikhuyninkutaqa.

¹²Noqaqa tukuy sonqo Diosman k'askakoj kani.

¹³Chayrayku, patapi kaj Diosninchejqa munarqa Salmanasar rey allinta qhawanawanta. Ajinamanta, rey wajyawarqa rantej runan kanaypaj.

¹⁴Reypa rantej runan kaspataj, Media llajtaman kachaykukoj kani rantipunanrayku. Chayta ruwaj kani rey wañupunankama. Uj kuti, Mediamanta Ragues llajtapi, Gabrej wawan Gabaelpapi kinsa pachaj kinsa chunka qolqeta saqerqani.

¹⁵Salmanasar wañupusqanmanta, qhepampi rey karqa paypa wawan Senaquerib. Chay pachaqa, Media llajtaman pusaj ñankuna mana purinapaj jinachu karqa. Chay jawa, mana aterqaniñachu chay llajtaman riyta.

¹⁶Salmanasar rey kashajtinraj, ayllu masisniyman qolqeta qoj kani limosnata jina.

¹⁷Yarqhachikojkunaman t'antaymanta qoj kani. Mana p'achayojkunatapis p'achallichej kani. Ninivepi wijch'uyta yachaj kanku perqa wasaman israelitaspa ayasninkuta. Rikuspa, noqaqa chay ayasta p'ampaykoj kani.

¹⁸Uj kuti Senaquerib rey Dioswan castigachikorqa, paypaj mana allintachu parlasqanmanta. Chayrayku, Judeamanta ayqekaporqa. Niniveman kutimuspataj, phiñaynimpi ashkha israelitasta wañuracherqa. Noqaqa, chaykunaj ayasninkuta pakayllamanta p'ampaykorqani. Senaqueribqa chay ayasta mask'acherqa, manataj tariyta aterqankuchu.

¹⁹Chaypacha, uj Nínive llajtayoj runa reyman willaykorqa noqa chay ayasta p'ampasqayta. Chayta yachaytawanqa, noqaqa pakaykukorqani. Yachaspaña ari reyman noqamanta parlasqankuta, yachaspataj rey mask'achiwasqanta wañuchinawampaj, manchachikuywan ayqerqani.

²⁰Tukuy kapuwasqanta apakaporqanku reypaman. Ana warmiyllata, Tobías wawayllatawan saqerqanku.

²¹Manaraj pasajtin tawa chunka día chaykunamanta, Senaqueribta wañucherqanku iskay wawasnin. Paykunaqa, chayta ruwaytawanqa, Ararat orqosman ayqekaporqanku. Senaqueribpa qhepanta reyman tukorqa waj wawan Asaradón sutiyoj. Asaradonqa wajyacherqa wauqey Anaelpa wawan Ajicarta, nerqataj reinoj yupan runan kananta. Ajinamanta, Ajicarqa jatun mayordomoman tukorqa.

²²Chantaqa, Ajicarqa reyman parlaripuwarqa. Ajinamantaqa, Niniveman kutimporqani. Senaquerib Asiriapi rey kashajtin, Ajicarqa mayordomo kasqa, reypa sellonta waqaychajnin, yupaj runan ima. Asaradonqa watejmanta chay cargosta payman qollarqataj. Ajicarqa aylluymanta karqa, wauqeypa wawan.