Read Quechua Bolivia DC Bible TOBIT 10 Bible Online

TOBIT 10 - Quechua Bolivia DC Bible bible

TOBIT 10

¹Chaykama, sapa día, Tobitqa yupasharqa diasta, yuyaspa mashkha diapichus Tobías rinman karqa, mashkha diapichus kutimunman karqa. Piensasqan tiempoqa pasakaporqaña, wawanrí mana rikhurimorqarajchu.

²Tobitqa nisharqa: Qhepakucherqankuchá. Ichapis Gabael wañuporqa, manataj ni kanchu qolqeta qonampaj.

³Chayta yuyaspa, llakikuyta qallarerqa.

⁴Warmin Ana payman nej: Waway wañupun. Mana kausakushanñachu. Chayta nispa, paran paranta waqarqa.

⁵Nillajtaj: Wawáy, imapajtaj ch'inmanta rikuni ripunaykitaqa? Qanqa ñawiypa k'anchaynin karqanki.

⁶Tobiastaj nej: Ch'in kay. Ama ni imata niyñachu. Sano kakushan. Qhepakucherqankuchá. Compañajqa sumaj runa. Chantapis, ayllunchej. Ama llakikuyñachu, warmíy. Jamushanñachá, nispa.

⁷Payrí: Ama parlawaychu. Ama llullakuychu. Waway wañupun, nispa. Sapa día Anaqa jatarikuytawan, rerqa ñanta qhawaj maynintachus wawan chayanan karqa, mana ni pitapis uyarikuspa. Ch'isi yaykuyta wasinman kutimpun waqarikoj, tutantinta mana puñuyta atispa.

⁸Chay chunka tawayoj día fiesta, Ragüelpa munayninman jina ruwakusqanmanta, wawampa casamientonrayku, Tobiasqa Ragüelman qayllaspa nerqa: Ripullasajña. Tataypis mamaypis piensashankuchá manaña ujtawan rikunawankuta. Tatáy, ripuyta munani tataypaman. Niykiñaqa imaynamantachus payta saqesqayta.

⁹Ragüelqa nerqa: Kakullay, wawáy. Kakullay noqawan. Tataykiman kachasta kachamusaj qanmanta willanankupaj. Tobiasrí nerqa: Manapuni. Mana qhepakuymanchu. Tataypaman kutipunay tiyan, nispa.

¹⁰Chaymanta, Ragüelqa Sara wawanta wajyaj yaykorqa. Tobiasman qorqa kapuyninmanta khuskanta: Qhari kamachista, warmi kamachista, wakasta, ovejasta, burrosta, camellosta, p'achata, qolqeta, wasi imastawan.

¹¹Rikuspa kusisqas risqankuta, nerqa Tobiasta: Allinta risuchun, wawáy. Sonqo tiyasqa ripuy. Janaj pacha Señorqa munanqa sumajta chayanaykichejta qampis, Sara warmiykipis. Noqaqa munayman rejsiyta wawasniykichejta manaraj wañupushaspa.

¹²Sara wawanmantaj nerqa: Sonqo tiyasqa rillay qosaykej tatampaman. Kunanmantapacha qosaykej tatasnin tatasniyki kanku noqayku jina, kausayniykita qojkuna jina. Sonqo tiyasqa ripullay, wawáy. Kausashajtiyraj sumajllata uyariyta munayman qanmanta, nispa. Sumajta rinankuta nispataj, ripunankuta saqerqa.

¹³Chaykama Ednaqa Tobiasman nisharqa: Wawáy, munasqa ayllúy. Señor yanapasuchun. Pay yanapasonqa wasiykiman chayanaykipaj. Noqaqa munayman kausakuyta wawasniykichejta rikunaypaj. Chaymantaraj wañupuyman. Diospa ñaupaqempi wawayta qoyki. Qhawaykuy. Amapuni jayk'ajllapis llakichinkichu. Sonqo tiyasqa rillay, wawáy. Kunanmantapacha, noqaqa mamayki kani, Saraytaj warmiyki. Tukuyninchej sumajta kausana kay pachapi. Chantaqa, iskayninkuta much'aykorqa, kacharparerqataj sonqochasqasta.

¹⁴Sonqo tiyasqa, kusisqataj llojserqa Tobiasqa Ragüelpa wasinmanta, yupaychaspa mundontimpi kamachej Señorta, allinta risqanmanta puriynimpi. Diosmanta mañakorqa bendicinanta Ragüeltawan Ednatawan. Nerqataj: Munayman qankunata kusichiyta tukuy kausayniykichejpi.