Read Quechua Bolivia DC Bible TOBIT 11 Bible Online

TOBIT 11 - Quechua Bolivia DC Bible bible

TOBIT 11

¹Caserín llajtaman chayasharqankuña. Chimpampi kashan Nínive. Rafaelqa nerqa Tobiasman: Yachanki tataykita onqosqata saqesqanchejta.

³Ñaupaykunachej wasita wakichinanchejpaj wajkuna chayanankukama.

⁴Iskayninku ñaupakorqanku. Rafael nillarqataj Tobiasman jayaqeta orqhonanta. Alqoqa qhepankupi risharqa.

⁵Ana, chaykama, tiyasqanmanta qhawasharqa ñanta maynintachus wawan rikhurinan karqa chayta.

⁶Jamusqantaña yachaspa, Tobitta wajyarqa: Wawayki chayamushanña pusajninwan!, nispa.

⁷Manaraj wasiman chayashajtinkuraj, Rafaelqa nerqa Tobiasman: Tatayki sanoyanqa.

⁸Jawiykunki ñawisninta challwaj jayaqenwan. Chaywanqa ñawi laqhayaynin chinkanqapacha. Tatayki watejmanta ñawisniyoj kanqa, rikuyta atenqataj k'anchaytaqa.

⁹Anaqa thaskispa tinkoj llojserqa. Chayaytawantaj wawanta abrazaykorqa, nispa. Rikuykiña, wawáy. Kunanqa wañupuyta atiniña. Waqarikorqataj.

¹⁰Tobit sayarerqa. Misk'aspa misk'aspa wasi punkunta llojserqa.

¹¹Tobiasqa, challwaj jayaqenta jap'ispa, tatanman chimpaykorqa. Allinta makinmanta jap'ispa, ñawisninman phukuykorqa nispa: Sonqochakuy, tatáy. Chantá jawiykorqa.

¹²Chantataj, iskay makisninwan ñawi k'uchusmanta qarachasninta orqhoykorqa.

¹³Tobitqa abrazarqa wawanta, waqaspataj nerqa: Rikuykiñaqa, wawáy, ñawisniypa k'anchaynin!

¹⁴Nillarqataj: Yupaychasqa kachun Diosninchej. Yupaychasqa kachun jatun sutin. Bendicisqa kachunku santo angelesnin. Yupaychasqa kachun jatun sutin wiñaypaj. Payqa ñak'arichiwarqa. Chantaqa, khuyakuwarqa. Kunanqa atiniña watejmanta waway Tobiasta rikuyta.

¹⁵Tobiasqa yaykorqa wasinman may kusisqa, Diosta yupaychaspa, qhaparikuspa. Chantaqa willarqa tatanman puriyninmanta, tukuy ima allin kasqanta, qolqeta apamusqanta, Ragüelpa wawan Sarawan casarakusqanta ima. Nillarqataj Saraqa Niniveman chayamushasqantaña.

¹⁶Tobitqa kusikuywan junt'a, Diosta yupaychaspa, llojserqa llajta ñanman qhachuninta taripaj. Nínive runas t'ukorqanku rikuytawan Tobitta purishajta, mana ni piwan yanapachikuspalla. Tobitqa willaykorqa Diosqa paymanta khuyakusqanta ñawisninta sanoyachispa.

¹⁷Chaymanta chimparqa qhachunin Saraman nispa: Imaynalla, wawáy? Yupaychasqa kachun Diosninchej noqaykuman pusasusqanmanta. Tatayki bendicisqa kachun. Waway Tobías bendicisqa kachun. Qampis bendicisqallataj kay, wawáy. Kusisqa wasiykiman yaykuy bendionniykuwan. Pasaykamullay, wawáy, nispa. Chay diapeqa jatun kusikuy karqa tukuy judíos ukhupi Ninivepi.

¹⁸Tobitpa sobrinosnin Ajicarwan Nadabwan jamorqanku paywan khuska kusikoj.