Read Quechua Bolivia DC Bible TOBIT 12 Bible Online

TOBIT 12 - Quechua Bolivia DC Bible bible

TOBIT 12

¹Casamiento fiesta pasajtintaj, Tobitqa wajyarqa Tobías wawanta, nerqataj: Wawáy, ama qonqapuychu paganaykimanta puriyniykipi pusasojman. Nisqanchejmantaqa astawan pagapuy, nispa.

²Tobías nerqa: Tatáy, imata qoymanri? Apamusqaymanta khuskantapis qoyman chayqa, mana ni imanawanmanchu.

³Pay sanota chayachiwarqa. Warmiyta qhawarqa. Qolqenchejta apamorqa. Chantapis, sanoyachisorqa. Imatataj qoymanri tukuy chaykunamantaqa?

⁴Tobitrí nerqa: Khuskampuni chay apamusqanmanta paypaj kanan tiyan.

⁵Tobías wajyacherqa Rafaelta nerqataj: Apamusqaykimantaqa khuskanta apakapuy. Sonqo tiyasqa ripullay, nispa.

⁶Rafaeltaj iskayninkullaman nerqa: Diosta yupaychaychej. Tukuy runasman willamuychej Diospa sumaj ruwasqasninmanta maychus kajta. Ama sayk'uychejchu agradecekuymantaqa.

⁷Reypa nisqantaqa mana willanachu. Diospa ruwasqasnintarí willanapuni. Sumaj kajta ruwaychej. Chayta ruwankichej chayqa, imachus mana allin mana jamusonqachejchu.

⁸Sumajqa Diosmanta mañakuymin ayunota ruwaspa. Sumajmin limosnata qoyqa, cheqan kajtataj ruwayqa. Tukuy chayqa aswan walejmin qhapaj kaymanta, rumi sonqo kaymantataj. Aswan walej limosnata qoyqa, qolqeta tantakuymantaqa.

⁹Limosnaqa wañuymanta jark'an, tukuy juchasmantapis llimphuchan. Limosnata qojkunaqa unayta kausanqanku.

¹⁰Juchallikojkuna, sajra kajta ruwajkuna ima, kikin paykunata nanaykuchikunku.

¹¹Kunanqa, cheqan kajta willasqaykichej. Mana ni imata pakasajchu. Nerqaykichejña reypa nisqanta mana willanata. Nillarqaykichejtaj willana kasqanta Diospa ruwasqasninta.

¹²Allinta uyariway, Tobit. Qampa mañakusqasniykita, Saraj mañakusqasnintapis, noqaqa chayachej kani Diospa ñaupaqenman, gloriampaman. Kikillantataj ruwaj kani maypachachus p'ampaykoj kanki ayasta.

¹³Diosninchej noqata kachamuwarqa ima sonqoyojchus kasqaykita yachanampaj, maypachachus qanqa jatarerqanki mesamanta, mikhuykita mana llamirispalla, chay wañusqa runata p'ampanaykipaj.

¹⁴Kunampis Diosninchej kachamullawarqataj sanoyachisunaypaj, Sara qhachuniykitapis supaymanta kacharichinaypaj.

¹⁵Noqaqa Rafael kani, Señorta sirvej qanchis angelesmanta ujnin. Noqaqa paykuna jina, qayllayta atini Diospaman.

¹⁶Chayta uyariytawantaj, iskayninku anchatapuni mancharikorqanku. P'ampaman k'umuykukorqanku qonqorikuspa, manchachikuywan.

¹⁷Angeltaj nerqa: Ama manchachikuychejchu. Diospa sonqochasqa kaynin qankunawan kachun. Diosta yupaychaychej wiñaypaj.

¹⁸Noqaqa qankuna ukhupi karqani Diospa munayninrayku. Payta yupaychaychej tuta p'unchay agradecekuspa.

¹⁹Rikuwashajtiykichej mikhushajta, ujyashajta ima, uj rikhurimuyllata rikoj kankichej.

²⁰Kunanqa, kay pachaj Señorninta agradecekuychej. Diosta yupaychaychej. Noqa Diospaman wicharisaj, kayman kachamuwajpaman. Papelpi escribiychej tukuy ima pasasqanta. Chayta niytawantaj janajman riporqa.

²¹Paykuna jatarikorqanku pampamanta, manañataj rikuyta aterqankuchu angeltaqa.

²²Diosta agradecekuyta qallarerqanku, sumaj ruwasqasninmanta yupaychaspa. Diospa angelnenqa paykunaman rikhurimusqa!