Read Quechua Bolivia DC Bible TOBIT 13 Bible Online

TOBIT 13 - Quechua Bolivia DC Bible bible

TOBIT 13

¹Tobit nerqa: Diosqa yupaychasqa kachun. Pay kausakun kamachintaj wiñaypaj. Pay castigota apachimun. Chaywampis, khuyakun. Wañuy ukhuman runata yaykuchin. Jatun chinkaymantataj kacharichin. Mana ni pi atiyninmanta ayqenmanchu.

³Payta yupaychaychej, Israelpa wawasnin, tukuy runaspa ñaupaqenkupi. Paymin qankunataqa ch'eqeracherqa tukuy laya runas ukhupi.

⁴Paymin, chay llajtaspi maypichus kashankichej chaypi, jatun kayninta rikuchisorqachej. Payta yupaychaychej tukuy runaspa ñaupaqenkupi. Paymin Señorninchej. Paymin Diosninchej tatanchejtaj wiñaypaj.

⁵Payqa runata nanaykuchin sajra kajta ruwasqanmanta. Chaywampis, tukuy qankunata khuyasunkichej. Qankunata tantakamonqa, karu llajtasmanta wajyasuspa, maymanchus pusachikorqankichej chay llajtasmanta.

⁶Diosman kutirikunkichej chayqa tukuy sonqo, cheqanta kausaspa ñaupaqempi, pay qankunaman kutirenqa, manañataj pakakonqañachu ni jayk'aj.

⁷Rikuychej kunanqa, imatachus qankunarayku ruwasqanta. Qhaparikuspataj agradecekuychej. Señorta yupaychaychej, cheqan kajta ruwajta. Yupaychaychej wiñaypaj kamachejta.

⁸Noqa payta yupaychani kay llajtapi, maypichus wijch'umuwarqanku chaypi. Noqa rikuchini juchallikoj runasman Diospa atiyninta jatun kaynintawan. Noqa nini paykunamanqa: Juchasapa runas, Diosman kutiriychej. Imachus cheqan ñawisnimpa ñaupaqempi, chayta ruwaychej. Ichapis allin ñawiwan qhawasonqachej khuyakuspa.

⁹Noqa Diosniyta yupaychani, janaj pachapi kamachejta. Sonqoy kusikun jatun kayninmanta yuyaspa.

¹⁰Tukuy runas payta yupaychachunku agradecekuspa, Jerusalempi. Jerusalén, Diospa ajllasqan llajta. Diosqa castigota apachimusonqa, chaypi tiyakojkunaj mana allin ruwasqasninkurayku. Watejmantataj khuyakonqa cheqan sonqoyoj runasmanta.

¹¹Agradecekuy Señorta tukuy sonqo. Wiñaypaj kamachejta yupaychay. Chayta ruwaspaqa, temployki watejmanta sayarichisqa kanqa kusikuywan.

¹²Qanman kutirimojtinkutaj qharqosqas kajkunaqa, Diosninchej paykunata kusikuywan junt'achenqa. Khuyakuywan qhawanqa jallp'asninkumanta wijch'usqasta. Chaymin kanqa wiñaypaj.

¹³Lliphipej k'anchayniyki k'ancharenqa mundontimpi sapa k'uchupi. Imaymana laya runas karumanta qanman jamonqanku. Kay pachaj k'uchusninmanta jamonqanku Señor Diosninchejpa sutinta qhaparej. Makisninkupi apamonqanku regalosta janaj pachata kamachejpaj. Tukuy tiemposmanta yupa runas qanrayku kusikonqanku. Diospa ajllakusqan llajtaj sutinrí wiñaypaj kakullanqa.

¹⁴Maldicisqas kanqanku qampaj rimajkuna. Maldicisqasllataj kanqanku qanta t'unarparichejkuna, perqasniykita urmachejkuna, jark'ana torresniykita raqayman tukuchejkuna, wasisniykita larwarichejkunataj. Chantaqa, bendicisqas kanqanku wiñaypaj qanta watejmanta sayarichejkuna.

¹⁵Chaypacha, mayta kusikunki sumaj sonqoyojkunarayku. Tukuyninku tantakamonqanku, yupaychanqankutaj kay pachaj Señorninta. Kusikuyniyoj kanqanku munakusojkuna. Kusikuyniyoj kanqanku allin tiyasqa kanaykita mask'ajkuna.

¹⁶Kusikuyniyoj kanqanku pikunachus llakikonqanku ñak'ariyniykimanta. Qhepanta kusikonqanku qanrayku, rikuspa mana tukukoj kusikuyniykita. Sonqóy, yupaychay Señorta, jatun reyta.

¹⁷Jerusalén sayarichisqa kanqa. Señorpa templon wiñaypaj kakullanqa. Jatun kusikuy noqapaj kanqa aylluymanta mayqempis qhepakojtin k'anchayniykita rikunampaj, yupaychanampajtaj janaj pachapi kamachejta. Jerusalén punkusqa ruwasqas kanqanku zafiro rumiswan, esmeralda rumiswan ima. Perqasnenqa may k'acha rumismanta kanqanku. Qhawana altosnin llimphu qorimanta ruwasqas kanqanku. Jerusalén callesta k'acha rumiswan rumiykuchenqanku.

¹⁸Punkus kusikuspa takenqanku. Wasispis nillanqanku: Señorqa yupaychasqa kachun. Israelpa Diosnin yupaychasqa kachun. Qampi yupaychanqanku santo sutinta wiñaypaj.