Read Quechua Bolivia DC Bible TOBIT 14 Bible Online

TOBIT 14 - Quechua Bolivia DC Bible bible

TOBIT 14

¹Chay jinata Tobitqa Diosta yupaychayta tukorqa.

²Tobit wañuporqa sonqo tiyasqa, pachaj chunka iskayniyoj watayoj kaspa. Sutinta pataman oqharispa p'ampaykorqanku Nínive llajtapi. Ciegoyajtin, sojta chunka iskayniyoj watayoj karqa. Watejmanta rikuyta qallarisqanmanta, payman allin rerqa tukuy imapi. Khuyakorqa runa masisninmanta. Diosta yupaycharqapuni, jatun kayninmanta tukuyman parlaspa.

³Wañuy patapiña kashajtin, wajyacherqa Tobías wawanta, parlaykorqataj kay jinata: Wawáy, wawasniykiwan ripullayña Mediaman. Yuyarikushani Nahum profetaj nisqanmanta Diospa sutimpi Nínivej contranta. Tukuy ima junt'akonqa, tukuy ima ruwakonqa Diospa profetasnin nisqankuman jina Asiriapi Ninivepipis. Tukuy nisqanku junt'akonqapuni. Tiempo chayamojtin tukuy ima junt'akullanqa. Mediapitaj ñak'ariy mana kanqachu. Ñak'ariy chayamonqa Asiriamampis Babiloniamampis. Chaytaqa noqa yachani. Diospa nisqanqa junt'akonqapuni. Ayllu masisninchej, Israelpi tiyakojkuna, charqosqas kanqanku sumaj jallp'asninkumanta. Israel ch'in pampaman tukonqa. Samariapis Jerusalempis, kikillantaj, Diospa templon saqerparisqa kanqa larwarichisqataj uj tiempota.

⁵Diosqa watejmanta khuyakonqa paykunamanta, kutirichenqataj Israel jallp'aman. Watejmanta sayarichenqanku templota. Jinapis, manaña kanqachu k'achitu ñaupa templo jina, tiempo chayamunankama. Chantaqa, tukuyninku kutirimonqanku, ruwanqankutaj mosoj Jerusalenta, lliphipejta. Diospa wasin ruwasqa kanqa, Israelpa profetasnin nisqankuman jina.

⁶Mundontimpi kaj naciones tukuy runaspis Diosman kutirikonqanku. Tukuy sonqo payta yupaychanqanku, karunchakonqankutaj dioskunasninkumanta, paykunata ch'aukiyajkunamanta. Paykunaqa kay pachaj Diosta yupaychanqanku cheqan sonqowan.

⁷Tukuy israelitas, chay pachapi salvakojkuna, Diosmanta yuyarikonqanku cheqamanta. Tantakonqanku, renqankutaj Jerusalenman, kausanqankutaj allin tiyasqa Abrahampa jallp'ampi wiñaypaj. Jallp'aqa paykunajta kanqa. Diosta tukuy sonqo munakojkunataj kusikonqanku. Juchallikojkunarí, sajra kajta ruwajkunapis chinkanqanku tukuy jallp'asmanta.

⁸Kunanqa, wawasníy, ujta nisqaykichej. Diosta sirviychej cheqan sonqowan. Paypa munasqanman jina kausakuychej. Yachachiychej wawasniykichejta cheqan kajta ruwayta, limosnata qoyta, Diosmanta yuyarikuyta, sutintapis bendiciyta tuta p'unchay, cheqamanta, tukuy kallpayoj.

⁹Qanrí, wawáy, ripuy Ninivemanta. Ama kaypi kakuychu. Mamaykita p'ampaytawanqa ladoypi, chay kikin diallata ripunki. Ama qhepakunkichu kay llajtapi, maypichus p'enqay sajra kaytaj mirashan.

¹⁰Yuyarikuy, wawáy, imatachus Nadab ruwasqanta uywaqen Ajicarta. Kausashajta p'ampaykorqa. Diostaj castigarqa Ajicarpa ñaupaqempi. Ajicarqa kausarimporqa. Nadabrí wiñay laqhayman urmarqa, Ajicarta wañuchiyta munasqanrayku. Ajicarqa tukuy sonqo limosnata qoj. Chayrayku wañuymanta llojserqa. Nadabrí wañorqa.

¹¹Rikuychej, wawasníy, maymanchus pusasqanta limosnata qoy, maymanchus pusasqantataj sajra kay: Wañuyman. Kausayniy tukukapushanña. Chantaqa Tobitta puñunampi siriykucherqanku. Chaymanta wañuporqa, p'ampaykorqankutaj mayta alabaspa.

¹²Maman wañupuytawan, Tobiasqa p'ampaykorqa tatampa ladompi. Chantaqa, Mediaman kachaykukorqa, warminwan wawasninwan khuska. Tiyakorqa Ecbatanapi, Ragüelpapi.

¹³Warmimpa tatasninta qhawarqa yanapaspa machu kayninkupi. P'ampaykorqataj paykunata Mediapi kaj Ecbatana llajtapi. Tobiaspaj karqa Ragüelpa kapuynin, imaynatachus ñaupajta tatan Tobitpa karqa, ajinata.

¹⁴Sutin may rejsisqa kausakorqa pachaj chunka qanchisniyoj watayoj kanankama.

¹⁵Yacharqa imatachus pasasqanta Ninivepi. Rikorqa ninivitasta wijch'usqasta Mediaman, rey Ciaxarespa munayninrayku. Chaypachaqa, Diosta yupaycharqa ruwasqanmanta Ninivepitaj Asiriapitaj. Manaraj wañupushajtin yacharqa Nínive llajta chinkachisqa kasqanta, yupaycharqataj Diosta, wiñaypaj kausakojta.