Read Quechua Bolivia DC Bible TOBIT 2 Bible Online

TOBIT 2 - Quechua Bolivia DC Bible bible

TOBIT 2

¹Asaradón reyña kajtintaj, wasiyman kutimporqani, kutichipuwarqankutaj Ana warmiyta, Tobías wawaytawan. Pentecostés fiestanchejpitaj, semanas fiesta nisqa chaypi, sumaj mikhunata wakichipuwasqanku.

²Noqataj tiyakorqani mikhoj. Tiyasqaña kashajtiy, ashkha laya mikhunasta jaywariwarqanku. Chantaqa, Tobiasniyman nerqani: Wawáy, riwaj mask'aj chay israelita masisninchej ukhupi, Niniveman pusachikamorqanku chaykunamanta uj wajchata, Diosninchejmanta tukuy sonqo yuyarikoj runata. Tariytawantaj, pusamunki noqawan khuska mikhurikunampaj. Noqaqa suyarillasqayki, wawáy.

³Tobiasqa llojserqa uj wajcha israelitata mask'aj. Kutimuspataj wajyawarqa: Tatáy, nispa. Noqataj: Imanantaj, wawáy?, nerqani. Payrí: Tatáy, niwarqa. Uj israelita masinchejta wañuchisqanku! Sipiykusqanku. Plazapi wijch'usqa kakushanraj, nispa.

⁴Ni llamirinipischu mikhunataqa. Qhajpacha plazaman phawarqani. Ayata marq'aspataj wasiyman apakaporqani. Uj cuartopi saqellarqani ayataqa ch'isiyamunanta suyaspa p'ampamunaypaj.

⁵Chantá kutimuspa mayllakorqani. T'antaytataj mikhorqani may llakisqa.

⁶Yuyarikorqanitaj Amós profetaj nisqanmanta Betelmanta: Fiestasniykichej llakiyman tukonqanku. Tukuy takinasniykichejtaj waqayman tukonqanku, nispa. Chay palabrasmanta yuyarikuspataj waqarqani.

⁷Inti yaykupusqanmantaña, sepulturata allaytawan, chay ayata p'amparqani.

⁸Vecinosniy asipayawaspa nej kanku: Mana manchachikumpunichoqa. Chayta ruwasqanmanta mask'arqankuña wañuchinankupaj. Chay kuti ayqekaporqa. Kunantaj siga p'ampaykushampuni, nispa.

⁹Chay ch'isillapitaj mayllaykuytawanqa patioyman llojserqani, winkuykorqanitaj perqa urman. Ruphayrayku q'ara umalla kasharqani.

¹⁰P'isqos kasqa pataypi, chay perqa patapi. Ujta q'oñi akanku ñawisniy pataman urmamuwarqa. Ñawisniytataj chharpuyaykuchiwarqa. Rerqanitaj jampirispaman jampichikoj. Jawiwajtinkupis astawan laqhayaykuwarqa. Anchataña ñawisniy oqeyashajtintaj ciegoyarparini. Tawa wata junt'ata ciego karqani. Tukuy ayllusniy rikuwaspa llakikorqanku. Ajicarqa qhawawarqa iskay watata, Elimaydaman ripunankama.

¹¹Warmiy Anaman trabajota qorqanku.

¹²Wasillapi ruwasqanta Anaqa apaj wajkunajpaman. Ruwasqanmantataj pagaj kanku. Uj kuti, Distro nisqa killapi, qanchis kaj diapi, Anaqa awasqanta apasqa patronesninman. Paykunaqa tukuy sueldonta pagakapusqanku. Chaymantataj, uj chivotawan regalasqanku mikhurikunaykupaj.

¹³Warmiy wasiman yaykushajtintaj, chivoqa qhapariyta qallarerqa. Uyarispataj, warmiyta taporqani: Maymanta llojsimun chay chivo?, nispa. Ichapis suwarqanki. Kutichipuy dueñosninman. Suwasqataqa manapuni mikhuyta atinchejchu, nispa nerqani.

¹⁴Warmiyrí niwarqa: Kay chivota regalawarqanku. Pagawasqankumanqa yapawarqanku kay chivowan, nispa. Noqaqa manapuni creeyta munasharqanichu. Kutichipunanta nillanitaj. P'enqakusharqaniña ruwasqanmantaqa. Payrí niwarqa: Maypitaj kunan limosnasniykiri? Maypitaj kunan sumaj ruwasqasniykiri? Sut'iña kunanqa imachus kasqayki, nispa.