Read Quechua Bolivia DC Bible TOBIT 3 Bible Online

TOBIT 3 - Quechua Bolivia DC Bible bible

TOBIT 3

¹Noqataj sonqo nanasqa phutikuywan, waqarqani, qallarerqanitaj Diosmanta mañakuyta jik'un jik'unta kay jinata: Cheqan sonqoyoj kanki, Señor. Tukuy ruwasqasniykita maychus kajta ruwanki. Khuyakuywan cheqan kaywantaj tukuy imata ruwanki. Qanqa tukuy runaspata juezninku kanki.

³Kunanqa, Señorníy, yuyarikuway, qhawawaytaj. Juchasniymanta ama castigawaychu. Ama castigawaychu mana yachaspalla mana allin kajta ruwasqaymantapis, nitaj mana yachaspalla ñaupa tatasniypa ruwasqasninkumantapis. Paykunaqa contraykipi juchallikorqanku.

⁴Manataj nisqaykita uyarikorqankuchu. Munasqaykirayku suwachikorqayku, karu llajtasman apachikorqayku, wañuchisqastaj karqayku. Mayqen llajtaspipis cheqerasqas kashajtiyku munayniykirayku, munallarqankitaj chay llajtasmanta runasqa sutisniykuta oqharinankuta, asipayanawaykuta, millayta tratanawaykuta ima.

⁵Kunantaj, allinta ruwanki maychus kajtataj juchasniyrayku nanaykuchiwaspa. Noqaykoqa nisqaykita mana uyarikorqaykuchu. Ñaupaqeykipi mana cheqan kajtachu ruwarqayku.

⁶Noqawanqa imallatapis ruway munasqaykiman jina. Nillayña wañupunayta, kay mundomanta llojsinaypaj, jallp'aman tukunaypajtaj. Kausakunaymantaqa noqapaj aswan walej wañupunay. Runasqa millayta tratawanku tumpawaspa. Llakiywanqa junt'asqa kani. Señor, kay phutiymanta llojsichiway. Wiñay samarikuyman ripunayta saqellay. Señor, uyaykita ama karunchachiychu noqamanta. Wañupunayqa aswan walej noqapaj kay jina llakiywan kanaymanta kay kausaypi. Ajinamanta, mana uyarisajñachu chay runas niwasqankuta.

⁷Kasqa nin Mediapi, Ecbatana llajtapi, uj warmi Sara sutiyoj, Ragüelpata ususin. Chay kikin diallapitaj, Sarata mayta rimaykushasqa uj warmi, Ragüelpa uywasqan.

⁸Chay Saraqa qanchis kutitaña casarakusqa. Sapa kutipitaj uj millay supay Asmodeo sutiyoj, qharista wañurachisqa sapa ujta, manaraj Saraman qayllajtin qosan jina. Chantá, chay warmeqa Saraman nisqa: Qampuni qosasniykita wañuchinki, nispa. Qanchis qosayoj karqankiña. Mana ni ujpatapis apellidonta jap'erqankichoqa.

⁹Imajtin llakichiwaykuri qosasniyki wañupusqankumanta? Qampis paykunawan khuska ripullayña. Ojalá mana rikuykumanchu ni jayk'aj qhari wawaykitapis, warmi wawaykitapis.

¹⁰Chayta uyarispa, Saraqa, sonqon nanasqa, mayta waqaykusqa. Chantá, alto pataman wicharisqa, tatampa cuartonman, sipikuyta munaspa. Unanchaspataj nisqa: Ichapis tatayta ninkuman: K'ata ususiyki, munakusqayki, llakiywan sipikorqa, nispa. Tatayqa hombreña. Chayta ruwayman chayqa, llakiywan wañuchiyman. Mana sipikusajchu. Chaymin aswan walej. Manachayqa, Diosmanta mañakusaj wañupunayta, manaña uyarinaypaj kay kausaypi chay jinata niwasqankuta.

¹¹Chaymantataj, Saraqa, ventanaman kutirispa, makisnin oqharisqa, Diosmanta kay jinata mañakorqa: Yupaychayki, khuyakoj Dios. Sutiyki tuta p'unchay alabasqa kashan. Tukuy ruwasqasniyki alabasuchunku wiñaypaj.

¹²Kunanqa, Señor, uyayta ñawisniytapis qanman oqharini.

¹³Nillayña kay pachamanta llojsipunayta, manaña rimawasqankuta uyarinaypaj.

¹⁴Señor, qan yachanki llimphu kasqayta. Mana ni uj qharillapis qayllaykamuwanchu.

¹⁵Noqaqa mana ch'ichichanichu sutiyta, ni tataypa sutintapis kay llajtapis, maymanchus pusawanku chaypi. Tataypa k'ata wawan kani. Paypata mana waj wawan kanchu chayaqenta jap'ikunampaj. Manataj kanchu paypa ayllunmanta qharipis noqawan casarakunampaj. Qanchis qosasniy wañupunku. Imapajñataj kausasajri? Mana munankirajchu chayqa wañupunayta, Señorníy, khuyakuway. Amaña sajrata parlachunkuchu noqamanta.

¹⁶Chaypacha, Tobitpa mañakusqampis, Saraj mañakusqampis Diospaman chayarqa. Diostaj iskayninkoj mañakusqankuta uyarerqa.

¹⁷Chaymantataj Diosqa iskayninkuman Rafaelta kachamorqa. Kachamorqa Tobitman payta sanuyachinampaj, laqhayayta ñawisninmanta chinkachispa, Diospa k'anchayninta rikuyta atinampaj. Kachamorqataj Ragüelpa ususin Saraman, kacharichisqa kanampaj millay supay Asmodeomanta, casarakunampajtaj Tobitpa wawan Tobiaswan. Tobiasqa aswan derechoyoj karqa Sarawan casarakunampaj tukuy paywan casarakuyta munajkunamantaqa. Chay kikin kutillapitaj Tobitqa patiomanta wasinman yaykusharqa. Ragüelpa wawan Sarataj alto patamanta uraykamusharqa.