Read Quechua Bolivia DC Bible TOBIT 4 Bible Online

TOBIT 4 - Quechua Bolivia DC Bible bible

TOBIT 4

¹Chaypacha Tobit yuyarikusqa qolqenmanta, Gabaelman mañasqan chaymanta. Chay Gabaelqa Mediamanta karqa, Ragues llajtamanta.

²Tobitqa kay jinata sonqompi unanchashasqa: Diosmanta mañakorqani wañupunayta. Kausakushajtillayraj Tobías wawayta wajyayman willanaypaj kay qolqemanta, nispa.

³Chantaqa, Tobitqa wajyasqa Tobías wawanta. Wawan chayaytawantaj Tobitqa nisqa: Wawáy, wañupojtiy maychus kajman jina p'ampawanki. Mamaykita respetowampuni qhawanki. Ama ni jayk'aj saqerparinkichu kausaynimpi. Imatachus munasqanta ruwankipuni. Amataj ni imallapipis llakichinkichu.

⁴Yuyarikunki, wawáy, nanayniyoj kasqanmanta qanrayku wijsampi kashajtiyki. Wañupojtintaj, ladoypi kikin sepulturapi p'ampanki.

⁵Señormanta yuyarikunkipuni tukuy kausayniykipi. Ama juchallikuychu, amataj Diospa kamachisqasninta p'akiychu. Tuta p'unchay sumajta kausay. Ama sajraman pusaj ñanta jap'iychu.

⁶Sonqoykiman jina kausanki chayqa, tukuy imapi allin risonqa.

⁷Ajinallataj kanqa sumajta kausajkunapajpis. Kapususqanmanta ama mich'a kaychu. Ama uyaykita karunchankichu wajcha runamanta. Chayta ruwanki chayqa, Diosninchej uyanta mana qanmanta karunchanqachu.

⁸Atisqaykiman jina qollay limosnataqa. Ashkha qolqeyoj kaspa, ashkhata qoy. Pisi qolqeyoj kaspataj, chay pisi qolqeykimanta qollaypuni imallatapis.

⁹Chayqa sirvisonqa pisichikojtiykipis.

¹⁰Limosnaqa wañuymanta jark'an runata, ama laqhayman yaykunampaj.

¹¹Patapi kaj Diosqa kusikuywan limosnata qhawan uj rikuchikuta jina.

¹²Ama millayta purinkichu, wawáy. Casarakunki kikin aylluykimanta kaj warmiwan. Ñaupa tatasninchej profetas karqanku. Chayrayku, amapuni casarakuychu waj aylluyoj warmiwan. Yuyarikuy, wawáy, ñaupa tatasninchej Abrahammanta, Isaacmanta, Jacobmantawan. Paykunaqa ajllakorqanku ayllunkumanta warmista. Diosqa paykunata bendiciykorqa wawasninkupi. Paykunamanta jamojkunaqa jap'enqanku chayaqenkupaj chay jallp'ata, qopunan karqa chayta.

¹³Wawáy, tukuy israelitasta munakunki hermanosniykita jina. Ama jatunyakuychu sonqoykipi. Ama paykunata qhesachaychu, mana israelita warmiwan casarakuspa. Oqharikoj runaqa chinkayman chayan. Qhella runataj wajchaman tukun. Qhella kayqa yarqhayman runata pusan.

¹⁴Usqhayllata paganki qampaj llank'ajkunaman. Diosman k'umuykukunki chayqa, Diosqa pagapusonqa. Unanchakuspa ruwanayki tiyan tukuy imata. Yachakuchumpuni sumaj uywasqa kasqayki.

¹⁵Imatachus mana munankichu wajkuna ruwasunankuta, ama chaytaqa wajkunaman ruwankichu. Ama vinotaqa ujyaychu machanaykikama. Ama puriychu machasqalla.

¹⁶T'antaykimanta yarqhachikojman qoy. P'achaykimanta thanta p'achayojman qoy. Imallapis pukusojtin, chayta wajchasman qoy. Limosnata qojtiyki ama mich'a kaychu.

¹⁷Cheqan sonqoyoj runa wañupojtin, t'antaykita jaywanki. Juchasapa wañupojtintaj, ama chayta ruwankichu.

¹⁸Sonqoyojkunaman tapukunki imachus ruwanaykita. Ama qhesachankichu sumaj simitaqa.

¹⁹Sapa kuti Diosninchejta yupaychay. Paymanta mañakuy allin risunanta tukuy ruwasqasniykipi. Mana creejkunaqa mana yachayniyoj kayta atinkumanchu. Señormanta jamun tukuy ima sumaj. Munaspaqa, pay atin runata k'umuykuchiyta ukhukama. Wawáy, sonqoykipi waqaychay nisusqayta. Amapuni umaykimanta ripuchunkuchu.

²⁰Kunanqa, wawáy, ujta nisqayki: Kinsa pachaj kinsa chunka qolqe kapuwan Gabrej wawan Gabaelpapi, Mediapi, Ragues llajtapi.

²¹Ama llakikuychu, wawáy, wajchasman tukusqanchejmanta. Diosta respetowan qhawanki chayqa, tukuy juchamanta ayqespa, ruwaspataj imatachus sumaj, Diospa ñaupaqempi qhapaj kanki.