Read Quechua Bolivia DC Bible TOBIT 5 Bible Online

TOBIT 5 - Quechua Bolivia DC Bible bible

TOBIT 5

¹Tobiasqa, chayta uyarispa, kay jinata tatanman nerqa: Tukuy niwasqaykita junt'asajmin.

²Imaynamantataj Gabaelqa chay qolqeta kutichiwanqa? Ima nispa uyarichikusajri qolqeta qonawampaj? Chantapis, mana ñanta rikunichu Mediaman chayanaypaj.

³Tobitqa nerqa: Gabaelqa qowarqa uj recibota sutinwan. Noqapis uj papelta qollanitaj sutiywan. Chay papelniytaqa khuskanmanta llik'erqani. Khuskanta qolqewan khuska mayt'orqani. Iskay chunka wataña pasan chaymanta. Kunanqa, wawáy, riy mask'aj uj cheqan sonqoyoj runata Mediaman pusasunampaj, chay qolqeta mañamunaykipaj. Kutimpojtiyki chay pusasojman pagallasunchej.

⁴Tobías llojserqa mask'aj uj runata Mediaman pusanampaj. Llojsiytawan, tinkukumpacha ángel Rafaelwan. Tobiasqa mana yacharqachu Diospa angelnin kasqanta.

⁵Tinkukuytawanqa Tobías taporqa: Maymanta kanki, joven?, nispa. Angelrí kutichikorqa: Noqaqa israelita kani, qan jinallataj. Kayman jamorqani trabajota mask'aj. Tobiastaj taporqa: Rikunkichu Mediaman apaj ñanta?, nispa.

⁶Angeltaj nerqa: Rikunipuni, nispa. Ashkha kutita chaypi karqani. Chay ñankunapi purej kani. Chayajpuni kani Mediamanqa. Ragues llajtapi puñoj kani Gabaelpapi. Paypis israelitallataj. Ecbatanamanta iskay diallapi chayanchej Raguesman, usqhayta purispa. Chay iskay llajtasqa orqospi kashanku.

⁷Tobiastaj nerqa: Suyarillaway, joven. Tatayman willamusaj. Pusariwankiman. Pagapullasqayki, nispa.

⁸Angelrí nerqa: Kosalla. Suyarisqayki, pero ama tardakuychu.

⁹Tobías, wasinman yaykuspataj, tatanta nerqa: Tariniña uj runata, noqanchej jina israelitata. Tobit nerqa: Wajyamuy, wawáy. Tapukusaj ima ayllumantachus pay. Yachanay tiyan confianzamantachus manachus, pusasunampaj.

¹⁰Tobías llojserqa Rafaelta wajyaj, nerqataj: Joven, tatay wajyashasunki, nispa. Angelqa wasiman yaykorqa. Tobitqa saludaykorqa. Angelqa kutichikorqa, sumajta karikunanta nispa. Tobitqa nerqa: Maymanta sumajta rikukuymanri? Ciego kani. Mana atinichu intej k'anchayninta rikuyta. Laqhapi kashani wañusqa jina, manaña k'anchayta rikuyta atispa. Wañusqa jina kausashani. Runastaqa uyarini parlakushajta. Rikuytaqa mana atinichu. Ángel nerqa: Sonqochakullay. Diosninchej sanuyasonqa. Sonqochakuy. Tobit nerqa: Tobías waway Mediaman riyta munashan. Atiwajchu pusayta? Imallatapis pagallasqayki. Angelrí nerqa: Arí, pusayman. Chay ñankunataqa rikuni. Ashkha kutista Mediaman rerqani. Chay pampasninta, chay orqosninta purej kani. Rikuni chay ñankunataqa.

¹¹Tobit nerqa: Niway, ima ayllumanta, ima familiamanta kankiri?

¹²Angelqa nillarqataj: Imapajtaj yachayta munanki ima ayllumantachus kasqayta? Watejmanta Tobitqa nerqa: Amigóy, yachanay tiyan pichus kasqaykita.

¹³Payrí nerqa: Noqaqa Azarías kani, Ananiaspa wawan. Tataytaqa nej kanku jatun Ananías. Aylluykimanta kani, nispa.

¹⁴Tobitqa nerqa: Imaynalla kanki, wauqéy. Ama phiñarikuychu yachayta munasqaymanta ima ayllumantachus kasqaykita. Kunanqa yachaniña kikin aylluymanta kasqaykita. Allin familiamanta kanki. Rejsini Ananiastawan, Natantawan, jatun Semeiaspa wawasninta. Paykunawan khuska rej kani Jerusalenman, Diosta yupaychaj. Paykunaqa mana karunchakunkuchu cheqan ñanmanta. K'acha runas kanku. Allin familiayoj kanki. Kusikuni rejsisusqaymanta.

¹⁵Chaymanta nillarqataj: Uj dracma qolqeta pagasqayki sapa diamanta. Tukuy necesitasqaykitapis qosqayki, imaynatachus wawayman qoni, ajinallatataj.

¹⁶Wawayta Mediaman pusay. Astawanraj pagasqayki.

¹⁷Angelqa nerqa: Paywan risaj. Ama manchachikuychu. Sanos kutimusqayku. Ñanqa sumaj. Chayta uyariytawantaj Tobit nerqa: Diosninchej bendicisuchun, wauqéy. Chantá, wawanta wajyarqa, nerqataj: Wakichikullayña, wawáy, rinaykipaj kay amigonchejwan khuska. Patapi kaj Diosninchejqa waqaychasunkichej, yanapasunkichejtaj sanos noqaman kutirinaykichejpaj. Diospa angelnin qankunawan richun, tukuy mana allinmantataj qankunata jark'achun, wawáy. Tobiasqa tatantawan mamantawan much'aykuspa ñanta jap'erqa. Tobitqa qhaparerqa: Allinta risuchun!

¹⁸Tobiaspa maman waqayta qallarerqa, nerqataj Tobit qosanman: Imapajtaj wawayta kacharqankiri? Payqa tojnunchej, noqanchejwampuni mayllamampis purikoj.

¹⁹Imapajtaj aswan qolqeta munanchejri? Aswan allin kanman chay qolqe chinkananqa wawanchej chinkanamantaqa.

²⁰Kausananchejpajqa kosalla karqa Diosninchej qowasqanchej.

²¹Tobit nerqa: Ama chayta parlaychu. Wawanchej sanolla kutiponqa. Qampuni chayta rikunki kutimojtin.

²²Ama llakikuychu. Uj sumaj ángel paywan khuska renqa. Allinta chayanqa, allintataj kutimonqa.

²³Warmirí mana waqarqañachu.