Read Quechua Bolivia DC Bible TOBIT 6 Bible Online

TOBIT 6 - Quechua Bolivia DC Bible bible

TOBIT 6

¹Waynaqa riporqa angelwan khuska. Alqompis paykunawan khuska kachaykukorqa. Purirerqanku. Chay ch'isi Tigris sutiyoj mayunejpi puñukaporqanku.

²Waynaqa mayuman yaykorqa chakisninta mayllakoj. Ujta, uj jatun challwa yakumanta llojsispa, chakisninta qhanikuyta munasharqa. Waynaqa qhaparikorqa.

³Angeltaj nerqa: Jap'iy chay challwata! Ama kachariychu! Waynaqa challwata jap'ispa chimpaman aparqa.

⁴Angeltaj nerqa: Kicharispa orqhonki jayaqenta, sonqonta, k'iwichantawan. Chantá jallch'akapunki. Jampipaj sumajqa. Ch'unchulastaqa wijch'ullay.

⁵Waynaqa challwata khuchuykorqa. Orqhorqataj jayaqenta, sonqonta, k'iwichanta ima. Chaymantataj, uj chhikan challwata kankaykorqa, mikhukaporqataj. Puchusqanta kachinchaspa jallch'akaporqa.

⁶Watejmanta iskayninku rillarqanku. Chayasharqankuña Mediamanqa.

⁷Chantá, waynaqa angelta taporqa: Azarías wauqéy, ima onqoymantataj jampikunchej challwaj jayaqenwan, sonqonwan, k'iwichanwantaj?

⁸Angelqa nerqa: Maypachachus supaychus millay espirituchus ñak'arichin qharitachus warmitachus, ruphaykuchina chay runaj ñaupaqempi challwaj sonqonta, k'iwichantataj. Chaywanqa chay ñak'ariy tukukapun pacha, manataj watejmanta kanqañachu.

⁹Jayaqetaj jampin runaj ñawi onqoyninta. Ñawista jayaqewan jawiykuna. Chantaqa ñawisman phukuykuna. Chaywan runaqa sanuyan.

¹⁰Mediapiña kashaspa, qayllasharqankuña Ecbatana llajtaman.

¹¹Ángel Rafael nerqa waynaman: Tobías wauqéy. Tobiastaj kutichikorqa: Imataj? Angeltaj: Kunan ch'isi puñukusunchej Ragüelpa wasimpi. Payqa aylluyki. Kapun warmi wawan, Sara sutiyoj.

¹²Saraqa k'ata wawan. Tukuykunamanta qanqa aswan derechoyoj kanki paywan casarakunaykipaj, tatampa chayaqentapis jap'inaykipaj. Sipasqa umayoj, mana manchachikoj, k'acha. Tatanqa cheqan sonqoyoj runa.

¹³Qampuni mañakunayki tiyan paywan casarakunaykipaj. Uyariway, wauqéy. Kunan ch'isi papasunman parlaripusqayki casarakunaykichejpaj. Raguesmanta kutimuspa casarakunkichej. Ragüelqa manapuni negakonqachu, nitaj atinchu wajman entregayta casarakunampaj. Mana munanman chayqa ususinwan casarakunaykita, payta wañuchinkuman Moisespa leyninman jina. Pay yachan ari wajkunamanta aswan derechoyoj kasqaykita ususinwan casarakunaykipaj. Kunanqa, uyariway wauqéy, kunan ch'isipuni sipasmanta parlarisunchej casarakunaykichejpaj. Raguesmanta kutimuspa casarakunkichej, pusasunchejtaj warmiykita wasiykiman.

¹⁴Tobiastaj nerqa Rafaelman: Azarías wauqéy, niwanku chay sipasqa qanchis kutitaña casarakusqanta. Niwankutaj qanchis qosasnin wañupusqankuta ujmanta ujmanta payman qayllashajtinku casamiento ch'isipi. Nillankutaj uj supay chay qosasninta wañuchisqanta.

¹⁵Demonioqa mana ni imata nasqachu sipasta. Qharita, sipasman qayllaqojta wañuchisqa. Manchachikuni noqatapis wañuchinawanmanta. Wañupuyman chayqa, tataypis mamaypis llakiywan wañuchinawanmanta. Wañupuyman chayqa, tataypis mamaypis llakiywan wañupunkuman. Noqaqa k'ata wawanku kani. Mana waj kapunchu paykunata p'ampanampaj.

¹⁶Angeltaj nerqa: Manachu yuyarikunki tatayki nisusqanmanta? Nisorqa casarakunaykita paypa ayllunmanta kaj warmiwan. Uyariway, wauqéy. Ama manchachikuychu chay supaymanta. Sipastaqa mañakullay warmiykipaj. Kunan ch'isi payta qopusonqanku. Chaytaqa noqa yachani.

¹⁷Cuartoman yaykuytawanqa, challwaj k'iwichanta sonqontataj incienso sansa pataman churaykunki. Q'apayqa mayllamampis chayanqa. Supaytaj muskhispa ayqerikaponqa. Manañataj sipasman chimpanqachu.

¹⁸Manaraj payman qayllajtiyki, iskayniykichej janaj pachapi kaj Señormanta mañakunkichej qankunata khuyakunanta qhawanantataj. Ama manchachikuychu. Dios payta ajllapusorqa qallariymantapacha. Qampuni kacharichinayki tiyan supaypa atiyninmanta. Payqa qhatisonqa. Wawasniyoj kanki. Wawasniykitarí mayta munakunki. Ama iskaychakuychu.

¹⁹Tobiastaj uyarispalla Rafaelpa nisqanta Saramanta, yachaspataj tatampa ayllunmanta kasqanta, sonqompi munakorqaña.