Read Quechua Bolivia DC Bible TOBIT 7 Bible Online

TOBIT 7 - Quechua Bolivia DC Bible bible

TOBIT 7

¹Ecbatanaman chayaspa, Tobías nerqa: Azarías wauqéy, cheqanta pusallawayña Ragüelpa wauqeykojpaman. Angelqa pusaykorqa Ragüelpa wasinman. Ragüelqa tiyasharqa wasi punkumpi. Qayllaspa, iskayninku napaykorqanku. Payrí nerqa: Napaykuykichej, wauqesníy. Imaynalla kashankichej? Pasaykucherqataj wasinman.

²Chantá, Edna warminman nerqa: Kay waynaqa anchata rijch'akun Tobit wauqeyman.

³Ednaqa tapukorqa: Maymantataj kankichej?, nispa. Paykunarí kutichikorqanku: Noqaykoqa Neftalí ayllumanta kayku, Nínive llajtaman apachikojkunamanta.

⁴Nerqataj Edna: Rejsinkichejchu aylluyku Tobitta? Arí, rejsiyku, nerqanku.

⁵Payrí tapullarqataj: Sanollachu?, nispa. Nerqankutaj: Sanolla. Kausakushanraj. Tobiastaj nerqa: Payqa noqaj tatay.

⁶Chayta uyarispa, Ragüelqa ujta sayaykuytawan much'aykorqa, waqarikorqataj. Nerqataj: Bendicisqa kay, wawáy. Tataykeqa k'acha runa. Anchatapuni llakikorqani willawajtinku chay jina sumaj, jatun sonqoyoj runa ciegoyasqanta. Ujtawan abrazaykorqa ayllun Tobiasta waqaspa.

⁷Warmin Edna waqaykullarqataj, jinallataj Sara ususinkupis.

⁸Ragüelqa kusikuywan paykunata wasimpi recibiykorqa. Mikhurikunankupajtaj uj corderota wañucherqa.

⁹Chantá, makisninkuta mayllaykuytawan, tukuyninku tiyakorqanku mikhoj. Tobiasqa nerqa Rafaelman: Azarías wauqéy, parlaripuway Ragüelman. Sara wawanwan casarakuyta munasqayta niripuway.

¹⁰Ragüelqa uyarisqa Tobiaspa nisqanta, nerqataj waynaman: Mikhuykuy, ujyaytaj. Kusikullay kunanqa. Tukuykunamantaqa, qanlla casarakuyta atinki Sara wawaywan, wauqéy. Mana ni piman paytaqa qoyta atiymanchu, manachayqa qanllaman, aswan qaylla aylluy kasqaykirayku. Chaywampis, wawáy, cheqan kajta nisunay tiyan.

¹¹Qanchis kutitaña payta casarachini ayllunchej qhariswan. Tukuyninku wañupunku ñaupaj kaj ch'isillapi, cuartonman yaykuytawan. Kunanqa, wauqéy, mikhuykuy, ujyaykuy. Señorninchej qosonqa khuyakuyninta allin kaynintawan.

¹²Tobiasqa nerqa: Mana mikhusajchu nitaj ujyasajchu ninawaykikama imatachus piensanki nisusqaymanta. Ragüeltaj nerqa: Jina kachun. Moisespa kamachisqanman jina, imaraykuchus Diosninchej munan qopususqa kananta, qoyki warmiykipaj aylluykimanta kaj sipasta, Sarata. Kunanmantapacha qosan kanki, payrí warmiyki. Qampataña kunanmantapacha wiñaypaj. Patapi kaj Señorqa kunan ch'isi khuyasonqachej. Paypa munakuynin allin kaynintaj qankunawan kachun.

¹³Chantaqa, Ragüelqa Sara ususinta wajyacherqa. Chayajtintaj, tatanqa makinmanta jap'ispa Tobiasman pusarqa, kay jinata nispa: Payta qopuyki imaraykuchus ajina qelqasqa kashan Moisespa librompi, kamachisqanman jina. Paywan khuska sanolla ripuy tatasniykej wasinkuman. Patapi kaj Diosninchej allin kausayta qosonqachej.

¹⁴Chayta niytawantaj Ragüelqa wajyarqa Saraj mamanta, nerqataj papelta apamunanta. Escriberqataj casamiento tratota, churaspa qosqanta Sara ususinta Tobiasman warmimpaj, Moisespa kamachisqanman jina. Tukuytawantaj, mikhoj yaykorqanku.

¹⁵Chaymantataj, Ragüel nerqa Edna warminman: Wakichillayña cuartota. Chantá, chayman Sarata pusanki.

¹⁶Ednataj cuartota wakicherqa qosan nisqanman jina, pusarqataj chayman Sara wawanta. Chantaqa, waqayta qallarerqa wawanmanta. Ñawisninta ch'akichikuspataj nerqa wawanman: Sonqochakuy, wawáy. Patapi kaj Señorninchej munanqa llakiyniyki kusikuyman tukunanta. Sonqochakuy, wawáy. Chayta nejtintaj llojsikaporqa.