Read Quechua Bolivia DC Bible TOBIT 8 Bible Online

TOBIT 8 - Quechua Bolivia DC Bible bible

TOBIT 8

¹Mikhuytawantaj, rerqanku cuartosninkuman puñukoj. Tobiasta pusarqanku cuartonman.

²Tobiasqa yuyarikorqa Rafaelpa nisqanmanta. Talegonmanta orqhorqa challwaj sonqonta k'iwichantawan, churarqataj sansaman, incienso ruphakusharqa chay pataman.

³Challwaj q'apaynin supayta jark'aykorqa. Supaytaj ayqekaporqa Egiptoman, karuman, phawaspa. Rafaeltaj qhepampi llojserqa. Jap'iytawan cadenaswan watarqa. Wataytawantaj kutimporqa.

⁴Ragüelwan Ednawan cuartomanta llojsispa punkuta wisq'aykorqanku. Tobiasqa puñunanmanta sayarispa nerqa Saraman: Sayariy, Saráy. Mañakuna Señormanta khuyakunawanchejta qhawanawanchejta ima.

⁵Sara jatarikorqa. Iskayninkutaj Diospa yanapayninta mañakorqanku kay jinata: Qanta yupaychayku, ñaupa tatasniykoj Diosnin. Sutiyki yupaychasqa kachun wiñaypaj. Janaj pacha yupaychasuchun. Tukuy ruwasqasniyki yupaychasuchunku wiñaypaj.

⁶Qanqa Adanta ruwarqanki. Qanqa Eva warminta ruwarqanki compañeran kanampaj, yanapanampajtaj. Iskayninkumanta tukuy runa jamorqa. Qampuni nerqanki: Mana allinchu qhari sapallan kakunanta. Ruwana payman rijch'akoj yanapajta, nispa.

⁷Kunanqa, cheqan sonqowan casarakorqani kay warmiwan, munakuywan. Iskayniykuta khuyakuwayku. Machu kayniyman chayayta munayman paywan khuska.

⁸Iskayninku nerqanku: Amén. Amén. Amén., nispa.

⁹Chayta niytawantaj puñukaporqanku.

¹⁰Chaykama, Ragüelqa jatarispa kamachisninta wajyarqa, paykunawantaj rerqa sepulturata allaj, nispa: Wañusqañachá. Pampaykullasajña, ama runas asipayanawaykupaj.

¹¹Allaytawantaj, Ragüelqa wasinman kutiriporqa, wajyarqataj warminta.

¹²Nerqataj: Kachay uj imillata rikunampaj sichus Tobías kausakushanraj. Wañusqa kanman chayqa, p'ampaykusunchej pakayllamanta, nispa.

¹³Imillata wajyacherqanku. K'anchanawan makimpi imillaqa punkuta tanqaykorqa, yaykorqataj. Iskayninku sinch'ita puñusharqanku.

¹⁴Llojsispa imillaqa willaykorqa: Mana wañusqachu, nispa.

¹⁵Chayta uyariytawantaj Ragüelqa yupaycharqa patapi kaj Diosta, kay jinata: Yupaychayki, Diosníy, llimphu yupaychakuywan. Yupaychasqa kay wiñaypaj.

¹⁶Yupaychayki kusichiwasqaykimanta. Noqaqa manchachikuywan piensasharqaniña wañupusqanta. Mana jinachu. Manachayqa, qan qhawawayku jatun khuyakuyniykiman jina.

¹⁷Yupaychayki khuyakusqaykimanta tatasninkoj kay k'ata wawasninkumanta. Qoy, Señor, paykunaman, yanapayniykita. Kausakuchunku kusisqas bendicionniykiwan.

¹⁸Chantá nerqa runasninta sepulturata wisq'anankuta.

¹⁹Ragüelqa nerqa warminman t'antata ruwananta. Corralninmanta apachimorqa iskay wakasta, tawa ovejastawan. Nerqataj wayk'ojkunaman qallarinankutaña wayk'uyta.

²⁰Tobiasta wajyachispa nerqa: Chunka tawayoj diata kaypi kakullankiraj. Kayllapi kakunki, wasiypi, mikhuspa, ujyaspa. Anchataña ñak'arerqa wawayqa. Kunanqa kusikuyta qonayki tiyan.

²¹Chaymanta, kapuwasqanmanta khuskanta apakunki, ripunkitaj sonqochakuywan tataykejpaman. Warmiywan noqawan wañupusqaykumantataj, tukuy kapuwasqayku qankunapaj kanqa. Sonqochakuy, wawáy. Noqa tatayki kani, Ednataj mamayki. Noqaykoqa aylluykimanta kayku wiñaypaj. Sonqochakuy, wawáy.