Read Quechua Bolivia DC Bible JUDIT 1 Bible Online

JUDIT 1 - Quechua Bolivia DC Bible bible

JUDIT 1

¹Nabucodonosorqa chunka iskayniyoj wataña rey karqa Nínive jatun llajtapi, Asiriospa reynin jina. Arfaxadtaj rey jina kamachisharqa Mediamanta kaj Ecbatana llajtapi.

²Arfaxad muyuykucherqa Ecbatana llajtata k'achanchasqa rumismanta perqaswan. Sapa rumej anchon karqa kinsa maki moqos jina. Perqaqa jatun karqa qanchis chunka maki moqos jina. Anchontaj phishqa chunka maki moqos jina karqa.

³Llajta punkuspi sayaricherqa jatuchej qhawanasta. Sapa qhawanaqa jatun karqa pachaj maki moqos jina. Cimientosninkutaj anchoman karqataj jallp'aj ukhumpi kaj perqas patapi. Sapa qhawanaqa sayarichisqa karqa rumi pampapi. Sapa rumi pampa, qallariyninmanta tukukuyninman, sojta chunka maki moqos jina karqa.

⁴Sapa punkoj sayaynin qanchis chunka moqos jina karqa. Anchontaj tawa chunka maki moqos jina karqa. Chayninta llojsiyta atej kanku runasqa maqanakuyman rejtinku.

⁵Chaypachapi rey Nabucodonosorqa tinkorqa maqanakupi rey Arfaxadwan Ragues llajtaj qayllampi, uj pampapi.

⁶Nabucodonosorwan khuska rerqanku orqospi tiyakojkuna. Chantaqa, Tigris mayunejpi tiyakojkuna, Eufrates mayunejpi tiyakojkuna, Hidaspes mayunejpi tiyakojkuna ima. Chaymanta, pikunachus tiyakorqanku Elammanta rey Ariocpa jallp'asnimpi. Ajina ari, ashkha runas tantaykukorqanku rinankupaj maqanakoj Queleudpa wawasninwan khuska.

⁷Asiriapi kamachej rey Nabucodonosorqa nerqa tantakamunankuta tukuy runas Persiapi tiyakojkuna, inti yaykuynejpi tiyakojkunapis: Ciliciapi, Damascopi. Libanopi, Antilibanopi ima. Chaymantataj, nillarqataj tantakamunankuta jatun qochaj chimpampi tiyakojkuna: Carmelopi, Galaadpi, pata Galileapi, Esdrelón pampapi ima.

⁹Ajinallataj, nerqataj tantakamunankuta tukuy Samaria llajtaspi tiyakojkuna. Chaymanta, pikunachus tiyakunku Jordán mayumantapacha, Jerusalénkama, inti yaykuynejpi: Batanemanta kajkuna, Quelusmanta kajkuna, Cadesmanta kajkuna ima. Chantaqa, Egiptowan lindeta ruwaj mayumantapacha: Tafnespi tiyakojkuna, Ramsespi tiyakojkuna, Gosén llajtapi tiyakojkuna ima.

¹⁰Tanismantawan, Menfismantawan aswan karupi tiyakojkunapis. Chantá, tukuy Egiptopi tiyakojkunapis Etiopiakama.

¹¹Chay jallp'aspi tiyakojkunarí mana uyarerqankuchu Asiriamanta rey Nabucodonosorpa nisqanta, manataj rerqankuchu payta yanapaj maqanakuspi. Paytaqa mana manchachikorqankuchu. Yuyarqankutaj mana ni pi payta yanapayta munasqanta. Paypa kachasnintataj millayta rimarqanku. Mana ni imayojtataj wijch'uykorqanku.

¹²Nabucodonosorqa anchatapuni phiñakorqa tukuy chay runaspa contrampi. Juramentota ruwaspa reinonrayku nerqa espadawan wañuchinanta tukuy tiyakojkunata Ciliciapi, Damascopi, Siriapi ima. Nerqataj kikillantataj ruwananta moabitaswan amonitaswampis. Chantapis, Judeamanta kajkunawan, Egiptomanta kajkunawampis, iskay qochas chaupipi tiyakojkunawan ima.

¹³Chunka qanchisniyoj kaj watapi kamachishasqanmanta, Nabucodonosorqa maqanaku runasninwan kachaykukorqa rey Arfaxadpa contrampi. Paywan tinkuspa. atiparqa. Rey Arfaxadpa runasnin ayqerparikaporqanku, caballospi rejkuna, carrospi rejkuna ima.

¹⁴Nabucodonosorqa jap'ikaporqa Arfaxadpa llajtasninta. Ecbatanakama chayarqa. Chaypitaj jark'ana torresta jap'ikaporqa. Tukuy imatataj apakaporqa wasismanta. Llajtaj k'acha kaynintaqa p'enqayman rikhuricherqa.

¹⁵Chantapis, kikin Arfaxadta presocharqa Ragues orqospi. Jap'iytawantaj, lanzasninwan wañuracherqa.

¹⁶Chaymantataj, kutimporqa soldadosninwan, payman ujchakusqanku runaswampis. Tukuyninkupi ashkha runaspuni karqanku. Chantaqa, payqa soldadosnintin tawa killa junt'ata sumajta samarqanku.