Read Quechua Bolivia DC Bible JUDIT 10 Bible Online

JUDIT 10 - Quechua Bolivia DC Bible bible

JUDIT 10

¹Chay jinata Juditqa mañakorqa qhaparispa Israelpa Diosninmanta.

²Tukuytawantaj sayarerqa. Warmi kamachinta wajyarqa. Uraykorqataj chay cuartoman maypichus kakoj samarina diaspi fiestaspipis.

³Chaypi luto p'achasninta lluch'ukuspa, mayllakorqa, q'apaj perfumewan jawikorqa, chujchasninta simp'akorqa, umanta mayt'ukorqa churakorqataj fiesta p'achanta imaynatachus churakoj qosan Manasés kausakushajtin.

⁴Chaymantataj, juk'utasninta churakorqa, walqasninta, arosninta, faluchosninta tukuy joyasnintataj. Sumajta k'achanchakorqa, qharis payta rikuspa t'ukunankupaj.

⁵Chantaqa jaywarqa warmi kamachinman uj vino uytulata, uj aceite uytulatawan. Uj canastapitaj churarqa cebada galletasta, k'isasmanta ruwasqa misk'ita, mana levadurayoj t'antastawan. Tukuy chaywan uj q'epita ruwaspa warmi kamachinman qorqa.

⁶Iskayninku rerqanku Betulia punkuman. Chaypi sayasharqanku Oziaswan, kurajkuna Cabriswan Carmiswantaj.

⁷Rikuspa Juditta jina k'achanchasqata, allin p'achallisqatataj, k'acha kayninmanta t'ukorqanku. Nerqankutaj: Ñaupa tatasninchejpa Diosnimpa khuyakuynin qanwan kachun. Pay yanapasuchun yuyasqaykita ruwanaykipaj israelitas jatunyanankupaj, Jerusalempis sumaj qhawasqa kanampaj.

⁹Juditqa sonqonta Diosman oqharispa paykunata nerqa: Kicharichipuwayku llajta punkuta llojsinaypaj, ruwanaypajtaj niwasqaykichejman jina. Paykunataj qhawajkunaman nerqanku punkuta kicharinankuta.

¹⁰Punkuta qhawajkunaqa kasorqanku. Juditqa llojserqa warmi kamachinwan. Llajta masisnin qhawasharqanku orqomanta uraykushajta purishajtataj pampanta. Chaymanta, manaña rikorqankuchu.

¹¹Rishajtinku cheqallanta, pampanta, Asiriamanta soldadosqa paykunaman qayllarqanku.

¹²Juditta taporqanku: Pikunawan kanki? Maymanta jamushanki? Mayman rishanki?, nispa. Payrí nerqa: Noqa hebrea kani. Llajtaymanta ayqerqani imaraykuchus llajta masisniy oqochikonqanku qankunawan.

¹³Noqaqa watukoj jamushani generalniykichej Holofernesta, allinta willanaypaj imaynamantachus jap'iyta atinman Betuliata. Rikuchisaj ñanta maynintachus yaykunman tukuy orqosta jap'ikunampaj, ni uj soldadollapis urmaspa.

¹⁴Uyarishajtinku parlajta, asiriosqa t'ukusharqanku k'acha kayninmanta. Nerqankutaj payta: Salvacionniykita tarinki jamuspa kamachejniykuwan tinkukoj. Rillay toldonman. Paypaman pusasusqayku.

¹⁶Ñaupaqempi kashajtiykiña, ama ni imamanta manchachikuychu. Watejmanta nillanki imatachus niwasqaykuta. Mana ni imata nasonqachu.

¹⁷Juditwan warmi kamachinwampis khuska, pachaj Asiria soldados rerqanku. Chay soldadosqa paykunata Holofernespaman pusarqanku.

¹⁸Jarapi tukuy yachasqankuña Judit jamushasqanta. Pay suyashajtinraj toldo punkupi, Holofernesman willanankukama, runas junt'ita muyuynimpi kasharqankuña.

¹⁹Tukuy t'ukusharqanku k'acha kayninmanta, nisharqankutaj: Ajina kasqanku israelitasqa, nispa. Pitaj asirikunman chay jina warmisniyoj nacionmantari? Ama saqenachu ni qharillatapi sayashajta. Kausakojkuna rinkuman mayllamampis ch'aukiyaspa.

²⁰Chaypacha llojserqankuña toldomanta Holofernespa soldadosnin capitanesnintaj, pasaykucherqankutaj Juditta.

²¹Holofernes winkusqa kasharqa qoriwan, k'acha rumiswampis k'achanchasqa puka puñunapi.

²²Holofernesman willajtinku chaypiña kasqanta Judit, pay rerqa toldo punkuman. Ñaupaqenta risharqanku qolqe k'anchanasta apajkuna.

²³Rikuspa Juditta, Holofernespis generalesnimpis mayta t'ukorqanku. Juditqa pampaman k'umuykukorqa. Holofernespa kamachisnin sayaykucherqanku.