Read Quechua Bolivia DC Bible JUDIT 11 Bible Online

JUDIT 11 - Quechua Bolivia DC Bible bible

JUDIT 11

¹Ama manchachikuychu, señoráy, nerqa Holofernes. Noqaqa mana ni jayk'aj llakichinichu sirviyta munajkunata mundontimpi kamachej rey Nabucodonosorta.

²Kunampis, sichus orqospi tiyakoj llajta masisniyki mana asirikunkumanchu karqa noqamanta, noqaqa mana aysaymanchu karqa lanzayta contrankupi. Paykunapuni chayta mask'akunku.

³Kunanqa, niway imaraykutaj paykunamanta ayqerqanki noqaykuman jamuspa. Chayqa salvacionniyki. Sonqochakuy! Kunan ch'isi kausakullanki, ajinallataj waj ch'isispis.

⁴Mana ni pi ni imatapis ruwasonqachu. Sumajta kakunki, imaynatachus kanku rey Nabucodonosor señorniypa kamachisnin ajinata.

⁵Judit nerqa: K'acha sonqowan uyariway noqa kamachiyki nisusqayta. Parlallayman ñaupaqeykipi. Kunan ch'isi mana llullakuspa parlasqaykichu.

⁶Uyarillay noqa kamachiyki nisusqayta. Uyariwanki chayqa, Dios yanapasonqa yuyasqaykita ruwanaykipaj. Tukuy imapitaj allin risonqa.

⁷Kausachun Nabucodonosor, mundontimpi kamachej chay! Kausachun pichus kachasunki tukuy kausakojta cheqan ñanninta purichinaykipaj. Patapi kachun paypa atiynin! Qanrayku mana runasllachu k'umuykukunku rey Nabucodonosorman. Manachayqa, k'ita animalkunapis, uywaspis, p'isqospis rey Nabucodonosorpa kamachisnin kanku, familiampatapis.

⁸Noqaykoqa uyariyku jatun sonqoykimanta, umayoj kasqaykimantataj. Mundontimpi yachallanku qanqa siria reinomanta kamachejkuna ukhupi aswan atiyniyoj kasqaykita, yachayniyojtaj, atipasqaykitataj tukuy runasta maqanakupi.

⁹Chantapis, noqayku yachayku imatachus Aquiorqa nerqa tantakuyniykipi. Betulia runasqa mana wañucherqankuchu payta. Chayrayku, payqa paykunaman willarqa imatachus qanman nerqa chayta.

¹⁰Kunanqa, wiraqochi señorníy. Uyarillay Aquiorpa nisqantaqa. Palabrasninta sonqoykipi waqaychay. Payqa mana llullakorqachu. Cheqamanta aylluyku, sichus mana juchachanqachu chayqa Diosniykoj ñaupaqempi, manapuni castigasqachu kanqa. Mana juchallikojtinku chayqa, espadaqa mana ni imata nanqachu paykunata.

¹¹Kunampuni, ama qan atipachikunaykipajqa, wañoyqa patankupiña kashan. Juchaqa sonqonkuman yaykumpacha. Juchallikusqankuwanqa phiñachinku Diosninkuta. Ajinapuni sapa juchallikojtinkoqa.

¹²Yaku pisiña kasqanrayku, paykunaqa munashanku jap'ikapuyta uywasta, imatachus Dios nerqa ama mikhunankuta chayta.

¹³Imatachus waqaychananku karqa qonankupaj sacerdotesman Jerusalempi Diosmanta mañakojkunaman, jap'ikapushankuña: Mishkha trigota, vinomanta aceitemantapis chunka parteta. Chaykunataqa mana ni pininku llankhaytapis atinchu.

¹⁴Kachankuña Jerusalenman, maypichus kikillantataj ruwashanku, kachasta licenciata mañakoj kurajkunamanta chayta ruwanankupaj.

¹⁵Kunanqa, chaynejta, maypachachus kutimonqanku chay kachas licenciata apamuspa, chay kikimpacha Diosqa paykunaqa makisniykiman jaywanqa, chinkachisqas kanankupaj.

¹⁶Chayta yachaytawankama, noqa warmi kamachiyki paykunamanta ayqerqani. Diospuni kachawan qanwan khuska ruwanaypaj imatachus mundontimpi runas yachaspa, t'ukusqas qhepakonqanku.

¹⁷Noqaqa, warmi kamachiyki, Diosmanta mañakullajpuni kani. Tuta p'unchay noqaqa janaj pachapi kaj Diosta yupaychani. Kunanqa, wiraqochi, qayllaykipi kakusaj. Ch'isiyajtin wayq'oman risaj Diosmanta mañakoj yachanaypaj ima ratotachus paykunaqa juchata ruwasqankuta.

¹⁸Chantaqa, kutimusaj willasoj, llojsinaykipaj soldadosniykiwan. Ni pi paykunamanta ñaupaqeykipi sayarenqachu.

¹⁹Tukuy Judeanta noqa pusasqayki, Jerusalenman chayanaykikama. Kikin llajta chaupipi sayarichisqayki. Chantaqa, qan paykunata pusaykunki mana michejniyoj ovejasta jina. Ñaupaqeykita ni uj alqollapis qhaparenqachu. Tukuy chaytaqa noqa yachani. Willawasqa karqa. Diostaj kachawarqa willasunaypaj.

²⁰Juditpa nisqanqa allin rijch'arqa Holofernesman generalesninmampis. Yachayninmanta t'ukuspa nerqanku: Mundoj cantonmantapacha waj cantonkama, ni maypi kanchu waj warmi kay jina k'acha, kay jina parlaj, nispa.

²²Holofernestaj nerqa: Diosqa allinta ruwarqa kachasuspa llajta masisniykej ñaupajninta. Noqayku atipasqayku. Paykunarí tukuchisqas kanqanku. Wañuchisqas kanqanku señorniyta qhesachasqankurayku.

²³K'acha warmi, sumajta parlayta yachaj, sichus nisqaykiman jina ruwanki chayqa, noqa kayta nisqayki: Diosniyki, Diosniy kanqa. Rey Nabucodonosorpa wasimpi tiyakunki, sutiykita rejsisqa kanqa tukuy pachapi.