Read Quechua Bolivia DC Bible JUDIT 12 Bible Online

JUDIT 12 - Quechua Bolivia DC Bible bible

JUDIT 12

¹Chantaqa Holofernes pasaykucherqa Juditta maypichus mikhun chay cheqaman, maypichus qolqe vasosnin kashan chayman. Chaypi mikhunata vinotawan jaywarqa.

²Juditrí nerqa: Noqaqa chayta mana llamiriymanchu. Llamiriyman chayqa, ichapis juchata tariyman. Qoqawi apamullasqayta mikhurisaj, nispa.

³Holofernestaj nerqa: Apamusqayki tukukapojtin, maymantataj apamuykuman kikin laya mikhunatari?, nispa. Nillarqataj: Noqayku ukhupeqa ni uj aylluykipis kanchu.

⁴Nerqataj Judit: Ama llakikuychu, wiraqochi. Señorqa yuyasqanta ruwanqaña mana tukushajtiyraj apamusqayta.

⁵Holofernespa generalesnin pusarqanku paypaj wakichisqa wasi toldoman. Chaypi Judit puñukorqa chaupi tutakama. Chhapu chhaputa jatarikorqa.

⁶Payqa Holofernesman nichimusqa: Warmi kamachiyki licenciata mañakun llojsinampaj Diosmanta mañakoj.

⁷Holofernesqa nisqa qhawaj soldadosman saqenallankuta llojsejta. Juditqa kinsa diata kakorqa jarapi. Sapa día tutamanta payqa rej Betulia wayq'oman. Juturipi mayllakoj, maypichus qhawaj soldados kashanku chaypi.

⁸Kutimuspa, mañakoj Israelpa Señor Diosninmanta, payta yanapananta ayllu masisnin sonqochasqas kanankupaj.

⁹Mayllakusqanmantataj kakullajpuni wasi toldompi. Ch'isi yaykuyta mikhunanta apaj kanku.

¹⁰Tawa kaj diapi, Holofernes mikhunanman wajyacherqa generalesninta. Wajkunataqa mana wajyacherqachu.

¹¹Holofernesqa, yanapajnin Bagoasman nerqa: Wajyay chay warmita, niripuwankitaj jamunanta noqaykuwan khuska mikhunampaj ujyanampajtaj.

¹²P'enqay kanman noqapajqa sichus mana kusirikuymanchu paywanqa. Mana munajtin chayqa, asipayawanqanku.

¹³Bagoasqa Holofernespa wasi toldonmanta llojsispa, rerqa Juditpaman. Yaykuspataj nerqa: K'acha warmi, munawajchu kunitallan riyta señorniypaman? Holofernespa chimpampi tiyakunki. Noqaykuwan vinota ujyanki. Qampis kanki Nabucodonosorpa wasimpi kashanku chay Asiria warmis jina.

¹⁴Juditrí nerqa: Pitaj noqaqa kasqani mana uyarinaypaj wiraqochi Holofernes nisqantari? Imatachus allin ñawisnimpa ñaupaqempi ruwallasaj. Chaymantataj yuyarikusaj wañupunaykama.

¹⁵Judit k'achanchakorqa tukuy k'acha imasninwan. Warmi kamachin ñaupakuspa ñaupaqempi Juditpaj pampaman mast'arqa chay oveja qarasta, Bagoas payman qosqan, patampi tiyasqa mikhunampaj chayta.

¹⁶Judit yaykuspa tiyakorqa. Holofernespa sonqonqa kusikuywan phatasharqaña. Payta rikusqanmantapacha munasharqaña payman qayllayta.

¹⁷Nerqataj Holofernes: Ujyarillay. Noqaykuwan khuska kusikuy, nispa.

¹⁸Juditrí nerqa: Ujyarillasaj, wiraqochi. Nacekusqaymantapacha mana ni jayk'aj kusikorqanichu kunan día jina, nispa.

¹⁹Juditqa, warmi kamachin wakichipusqanmanta mikhorqataj ujyarqataj, Holofernespa ñaupaqempi.

²⁰Holofernes, may kusisqa, anchatapuni tomarqa. Ni jayk'ajpis chay jina chhika vinota tomasqarajchu.